ޔޫކްރެއިނުގައި އުދުހުން މަނާ ސަރަޙައްދެއް ޤާއިމުކޮށްދިނުމަށް ނުވަތަ ހަނގުރާމަމަތީ މަތިންދާބޯޓު ފޯރުކޮށްދިނުމަށް އެ ޤައުމުގެ ރައީސް ރައީސް ވޮލޮދީމީރް ޒެލެންސްކީ އެދިވަޑައިގެންފިއެވެ.
ވީޑިޔޯ މެދުވެރިކުރައްވައި އެމެރިކާގެ ޤާނޫނުހަދާ މަޖިލީހުގެ މެންބަރުންނާ ވާހަކަދައްކަވަމުން ޒެލެންސްކީވަނީ ވިލާތުގެ އިރުމަތީ ޤައުމުތަކުގައި ބޭނުންކުރާ ރަޝިޔާގެ ހަނގުރާމަމަތީ މަތިންދާބޯޓުތައް ޔޫކްރެއިނަށް ފޯރުކޮށްދިނުމަށް އެދިވަޑައިގެންފައެވެ. ޔޫކްރެއިނުގައި ޢާއްމުކޮށް ބޭނުންކުރަނީ ރަޝިޔާއިން އުފައްދާފައިވާ މަތިންދާބޯޓުތަކެވެ. ނަމަވެސް ރަޝިޔާއިން އެންމެ ފުރަތަމަ ދިން ޙަމަލާތައް ޢަމާޒުކޮށްފައިވަނީ ޔޫކްރެއިނުގެ ވައިގެ ފައުޖުތަކަށްށެވެ. އެ ގޮތުން އެ ޙަމަލާތަކުގައި ޔޫކްރެއިނުގެ ހަނގުރާމަމަތީ މަތިންދާބޯޓުތަކާއި ވައިގެ ދިފާޢީ ނިޒާމުތައް މަދު ވަޤުތުކޮޅެއްގެ ތެރޭގައި ރަޝިޔާއިން ނައްތާލިއެވެ.
އެމެރިކާގެ ޤާނޫނުހަދާ މަޖިލީހުގެ މެންބަރުންވަނީ ޒެލެންސްކީ އެދިވަޑައިގެންނެވި ގޮތަށް ޔޫކްރެއިނަށް ހަނގުރާމަމަތީ މަތިންދާބޯޓުތައް ފޯރުކޮށްދިނުން މުޙިއްމުކަމަށް ވިދާޅުވެފައެވެ. ނަމަވެސް ހުޅަނގުގައި ބޭނުންކުރާ ހަނގުރާމަމަތީ މަތިންދާބޯޓުތަކަކީ ޔޫކްރެއިނުގެ އަސްކަރިއްޔާއަށް ފަރިތަ އުޅަނދުތަކެއް ނޫނެވެ. މިހާތަނަށް ހުޅަނގުން ޔޫކްރެއިނަށް ފޯރުކޮށްދީފައިވާ އަސްކަރީ އެހީތެރިކަމުގެ ތެރޭގައި ހިމެނެނީ ވައިގެ ދިފާޢީ ނިޒާމުތަކާއި ހަނގުރާމަމަތީ މަތިންދާބޯޓުތަކާ ޓޭންކަރުތަކާ ދެކޮޅަށް ބޭނުންކުރާ ރޮކެޓާއި އެނޫންވެސް ކުދި ހަތިޔާރެވެ.
ފާއިތުވި 10ވަރަކަށް ދުވަހުގެ ތެރޭގައި އެމެރިކާއިންވަނީ އަސްކަރީ އެހީތެރިކަމުގެ ގޮތުގައި ޔޫކްރެއިނަށް 350 މިލިޔަން އެމެރިކާ ޑޮލަރުގެ އަގުހުރި ސާމާނު ފޯރުކޮށްދިނުމަށް އެއްބަސްވެފައެވެ. އަދި ވިލާތުގެ އިއްތިޙާދުންވަނީ 500 މިލިޔަން އެމެރިކާ ޑޮލަރުގެ އަގުހުރި ސާމާނު ޔޫކްރެއިނަށް ފޮނުވާނެކަމަށް ބުނެފައެވެ. ނަމަވެސް އޭގެ ތެރެއިން ޔޫކްރެއިނަށް ލިބުނީ ކިހާ ސާމާނެއްކަމެއް އަދި ނޭނގެއެވެ.
ޔޫކްރެއިނުގައި އުދުހުން މަނާ ސަރަޙައްދެއް ޤާއިމުކޮށްފިނަމަ ރަޝިޔާއާ އަސްކަރީ ކުރިމަތިލުމަކަށް ދާން ޖެހިދާނެކަމަށް ބުނެ އެފަދަ ފިޔަވަޅެއް ނާޅާނެކަމަށް ހުޅަނގުގެ އަސްކަރީ އިއްތިޙާދު، ނޭޓޯއިންވަނީ ބުނެފައެވެ. ޔޫކްރެއިނަކީ ވިލާތުގެ އިއްތިޙާދަށް އަދި ނޭޓޯއަށްވެސް ނިޞްބަތްވާ ޤައުމެއް ނޫނެވެ.