ޔޫކްރެއިނަށް ދެމުންދާ ޙަމަލާތަކުގައި ރަޝިޔާގެ އަސްކަރީ މަޤްޞަދުތައް ޙާޞިލްކުރުމާ ގާތަށް އާދެވިފައިވާކަމަށް އެ ޤައުމުގެ ރައީސް ވުލަޑުމީރް ޕުޓިން ވިދާޅުވެއްޖެއެވެ.
ފެބްރުއަރީ މަހުގެ 24ވަނަ ދުވަހުން ފެށިގެން ވައިގެމަގުންނާއި ކަނޑުމަގުންނާއި އެއްގަމުން ޔޫކްރެއިނަށް ދެމުންދާ ޙަމަލާތަކާ ގުޅޭގޮތުން ވާހަކަދައްކަވަމުން ޕުޓިން ވިދާޅުވީ ޔޫކްރެއިނުގެ އަސްކަރީ ޤާބިލްކަން ވަރަށް ބޮޑަށް ކުޑަކުރެވިއްޖެކަމަށްށެވެ. އެ ގޮތުން ޔޫކްރެއިނުގެ ވައިގެ ދިފާޢީ ފައުޖުތަކާއި ހަތިޔާރު ގުދަންތައް ނައްތާލައި އެ ޤައުމުގެ އަސްކަރީ ބާރުވެރިކަން ފާއިތުވި 11 ވަރަކަށް ދުވަހުގެ ތެރޭގައި ވަރަށް ބޮޑަށް ކުޑަކުރެވިފައިވާކަމަށް ޕުޓިން ވިދާޅުވިއެވެ. މީގެ ކުރިން އޭނާވަނީ ޔޫކްރެއިނު އަޅުވެތިކުރުމުގެ އެއްވެސް ވިސްނުންފުޅެއް ނުގެންގުޅުއްވާކަމަށާއި ބޭނުންފުޅަކީ ޔޫކްރެއިނަކީ އަސްކަރީގޮތުން އެއްވެސް ބާރެއް ނެތް ޤައުމަކަށް ހެދުންކަމަށެވެ.
ބަރުހަތިޔާރާއެކު ރަޝިޔާއަށް ޙަމަލާދޭން ޖެހުނު ސަބަބުތަކާމެދު ވާހަކަދައްކަވަމުން ޕުޓިން ވިދާޅުވީ ފާއިތުވި އަހަރުތަކުގެ ތެރޭގައި ރަޝިޔާގެ ޤައުމީ ސަލާމަތަށް ނުރައްކާވާ މިންވަރަށް ހުޅަނގުގެ ޤައުމުތަކުން ހަތިޔާރާއި ފައިސާ ޔޫކްރެއިނަށް ފޯރުކޮށްދީފައިވާކަމަށެވެ. އަދި ހުޅަނގުގެ އަސްކަރީ އިއްތިޙާދު، ނޭޓޯގެ ޢަމަލުތަކުގެ ސަބަބުން ރަޝިޔާއަށް ކުރިމަތިލާން ޖެހިފައިވާ ނުރައްކާތެރި ޙާލަތާމެދު ހިތްހަމަނުޖެހޭކަން ތަކުރާރުކޮށް ރަޝިޔާއިން ބުނެފައިވާނެކަމަށާއި އެ ކަންބޮޑުވުންތަކަށް ހުޅަނގުގެ ބާރުތަކުން ދީފައިވަނީ ބީރު ކަންފަތެއްކަމަށްވެސް ޕުޓިން ވިދާޅުވިއެވެ. އެ ގޮތުން ނޭޓޯގެ މެންބަރުކަމާއި ނިޔުކްލިޔަރ ހަތިޔާރުގެ ޤާބިލްކަން ޔޫކްރެއިނުން ހޯދައި ރަޝިޔާއަށް ތަފާތު އިންޒާރުތައް ދެމުންދިޔަކަމަށާއި އެއީ ރަޝިޔާއިން އެއްވެސް ފިޔަވަޅެއް ނާޅައި އަޅާނުލައި ދޫކޮށްލާނެ ކަންތައްތަކެއް ނޫންކަން ދަންނަން ޖެހޭނެކަމަށްވެސް އޭނާ ވިދާޅުވިއެވެ.
2014ވަނަ އަހަރުން ފެށިގެން ޔޫކްރެއިނުގެ ސިޔާސީ މައިދާނަށް އައިސްފައިވާ ބަދަލުތަކާ ގުޅޭގޮތުން ވާހަކަދައްކަވަމުން ޕުޓިން ވިދާޅުވީ އެ ޤައުމުގެ ވެރިކަން ބަދަލުކުރުމަށް ދުރާލައި ރާވައިގެން ހުޅަނގުން މަސައްކަތްކޮށްފައިވާކަމަށް އެ ޤައުމުތަކުން އިޢުތިރާފްވެފައިވާކަމަށާއި ޔޫކްރެއިނުގެ ވެރިކަން ބަދަލުކުރަން 5 ބިލިޔަން އެމެރިކާ ޑޮލަރު ޚަރަދުކުރިކަމަށްވެސް ބުނެފައިވާކަމަށެވެ. އޭގެ ނަތީޖާއެއްގެ ގޮތުން ރަޝިޔާގެ ސަރަޙައްދީ ރޮނގު ކައިރީގައި އޮންނަ ގިނަ ޢަދަދެއްގެ މުސްލިމުން ދިރިއުޅޭ ދޮންބާސަށް ފާއިތުވި 8 އަހަރުގެ ތެރޭގައި ޔޫކްރެއިނުގެ ފައުޖުތަކުން ވަރުގަދަ ޙަމަލާތަކެއް ދީފައިވާކަމަށާއި އެ ޙަމަލާތަކުގައި ޢާއްމުންގެ 13،000 މީހުން މަރުވެފައިވާކަމަށް އދންވެސް ބުނެފައިވާކަމަށް ޕުޓިން ފާހަގަކުރެއްވިއެވެ. ދޮންބާސްގައިވެސް ދިރިއުޅެނީ އިންސާނުންކަމަށާއި އެ ސަރަޙައްދުގައި ޔޫކްރެއިނުގެ އަސްކަރިއްޔާއިން ހިންގަމުންދިޔަ ލާއިންސާނީ ޖަރީމާތައް ހުޅަނގުގެ އެއްވެސް ޤައުމަކަށް ނުފެނުކަމަށްވެސް އޭނާ ވިދާޅުވިއެވެ.
ޔޫކްރެއިނަށް ވަރުގަދަ ޙަމަލާތަކެއް ދިނުމުގެ ކުރިން އެ ޤައުމުން ނޭޓޯގެ މެންބަރުކަން ހޯދުމަށް ކުރަމުންދާ މަސައްކަތްތައް ހުއްޓާލައި ވަކި ފަރާތަކަށް ނުޖެހޭ ޤައުމެއްގެ ގޮތުގައި އޮތުމަށް ރަޝިޔާއިން ކުރި ޝަރުތުތައް ބަލައިގަންނަން ދެކޮޅުހެދިއެވެ. އެއާއެކު ޔޫކްރެއިނުގެ އަސްކަރީ މަޤާމުތަކަށް ޢަމާޒުކޮށް ރަޝިޔާއިން ދެމުންދާ ޙަމަލާތަކުގައި ޢާއްމުންގެ 500އަށްވުރެ ގިނަ މީހުން މަރުވެ 2،000 މީހުން ޒަޚަމުވެ 1.5 މިލިޔަން މީހުންގެ ގެދޮރުވަނީ ގެއްލިފައެވެ.