ފުރަތަމަ ޓީ ޓެން ކްރިކެޓް މުބާރާތުގެ ސެމީއިން ސީބީއެލް، މާލޭ ސްޕޯޓްސް ކުލަބް، މިލާން ކްރިކެޓް އެކަޑަމީ އަދި ކޮމެޓްސް ޖާގަ ހޯފައިފިއެވެ.
ކުއަޓަރ ފައިނަލްގެ ފުރަތަމަ މެޗް ވިޔާންޒާއާއި ބައްދަލުކޮށް ސީބީއެލް ކާމިޔާބުކުރީ 6 ވިކެޓުންނެވެ. މެޗްގައި ވިޔާންޒާގެ ހުރިހާ ކުޅުންތެރިން ނުބައިވެގެން އެޓީމަށް ހެދުނީ 53 ލަނޑުއެވެ. ޖަވާބުގައި ސީބީއެލްއިން ކުޅެން އަރާ 8.3 އޯވަރުގެ ތެރޭގައި 3 ކުޅުންތެރިން ނުބައިވެގެން 54 ލަނޑުހެދިއެވެ. މިމެޗްގެ މޮޅު ކުޅުންތެރިއަކަށް ހޮވިފައިވަނީ ސީބީއެލްގެ ޝާޒް ހަބީބެވެ.
ދެވަނަ މެޗް މާލޭ ވެޓްރަންސާއި ބައްދަލުކޮށް މާލޭ ސްޕޯރޓްސް މެޗް ކާމިޔާބުކުރީ 24 ލަނޑުންނެވެ. މާލޭ ސްޕޯރޓްސްއިން 10 އޯވަރުގެ ތެރޭގައި 8 ކުޅުންތެރިން ނުބައިވެގެން 105 ލަނޑުހެދިއެވެ. ޖަވާބުގައި މާލޭ ވެޓްރަންސްއިން ކުޅެންއަރައި، 10 އޯވަރުގެތެރޭގައި 9 ކުޅުންތެރިން ނުބައިވެގެން އެޓީމަށް ހެދުނީ 81 ލަނޑެވެ. މިމެޗްގެ އެންމެ މޮޅު ކުޅުންތެރިއަކަށް ހޮވިފައިވަނީ މާލޭ ސްޕޯރޓްސްގެ މެހެންދި ހަސަންއެވެ.
ކުއަޓަރ ފައިނަލްގެ ތިންވަނަ ވެސްޓް ސްޕޯރޓްސް ކްލަބާއި ބައްދަލުކޮށް މިލަން ކްރިކެޓް އެކަޑަމީ މެޗް ކާމިޔާބުކުރީ 8 ވިކެޓުންނެވެ. ވެސްޓް ސްޕޯރޓްސް ކްލަބުން 10 އޯވަރުގެ ތެރޭގައި 6 ކުޅުންތެރިން ނުބައިވެގެން އެޓީމަށް ހެދުނީ 49 ލަނޑެވެ. ޖަވާބުގައި މިލާން ކްރިކެޓް އެކަޑަމީއިން ކުޅެންއަރާ 5.5 އޯވަރުގެ ތެރޭގައި އެންމެ ކުޅުންތެރިއެއް ނުބައިވެގެން 50 ލަނޑުހެދިއެވެ. މިމެޗްގެ މޮޅު ކުޅުންތެރިއަކަށް ހޮވިފައިވަނީ މިލާންގެ މުހައްމަދު އައްޒާމެވެ.
ހަތަރުވަނަ މެޗް އޮފްއެފްސީއާއި ބައްދަލުކޮށް ކޮމެޓްސް މެޗް ކާމިޔާބުކުރީ 17 ލަނޑުންނެވެ. ކޮމެޓްސްއިން 10 އޯވަރުގެ ތެރޭގައި 3 ކުޅުންތެރިން ނުބައިވެގެން 76 ލަނޑުހެދިއެވެ. ޖަވާބުގައި އޮފްއެފްސީއިން 10 އޯވަރުގެ ތެރޭގައި 9 ކުޅުންތެރިން ނުބައިވެގެން އެޓީމަށް ހެދުނީ 59 ލަނޑެވެ. މިމެޗް އެންމެ މޮޅު ކުޅުންތެރިއަކަށް ހޮވިފައިވަނީ ކޮމެންޓްސްގެ ޢަލީ ރާފިލްއެވެ.
މުބަރާތުގެ ސެމީފައިނަލްގެ ފުރަތަމަ މެޗްގައި ބައްދަލުކުރާނީ ސީބީއެލް އާއި ކޮމެޓްސް އަދި ދެވަނަ ސެމީ ފައިނަލް މެޗްގައި ބައްދަލުކުރާނީ މިލާން ކްރިކެޓް އެކަޑަމީއާއި މާލޭ ސްޕޯރޓްސް ކްލަބެވެ. ސެމީ ފައިނަލް މެޗްތައް ކުޅުމަށް ހަމަޖެހިފައިވަނީ މިއަންނަ ހުކުރު ދުވަހުއެވެ.