އަތޮޅުތަކުގެ ބައިވެރިވުމާއެކު ޤައުމީ ދުވަސްތައް ފާހަގަކުރުމަކީ ސަރުކާރުގެ ސިޔާސަތެއް : ނަޛީރު
ދަޢުލަތުގެ ފަރާތުން ފާހަގަކުރާ ޤައުމީ ޚާއްސަ ދުވަސްތަކަކީ، އަތޮޅުތަކުގެ ފުރިހަމަ ބައިވެރިވުމާއެކު ކުރިއަށްގެންދާ ހަރަކާތްތަކަށް ހެދުމަކީ ސަރުކާރުގެ ސިޔާސަތެއްކަމަށް ހޯމް މިނިސްޓްރީގެ ސްޓޭޓް މިނިސްޓަރ އަލީ ނަޒީރު ވިދާޅުވެއްޖެއެވެ.
ޝަހީދުންގެ ދުވަސް ފާހަގަކުރުމަށް ފުވައްމުލައް ސިޓީގައި ބޭއްވި ރަސްމިއްޔާތުގައި ސްޓޭޓް މިނިސްޓަރ ވިދާޅުވީ މީގެކުރިން މިފަދަ މުހިންމު ގިނަ ދުވަސްތައް ފާހަގަކުރަމުން އައިސްފައި ވަނީ މާލެ ސަރަޙައްދުގައި އެކަނިކަމަށެވެ.
ޝަހީދުންގެ ދުވަސް ފުވައްމުލައް ސިޓީގައި ބޭއްވި މިއަހަރުގެ ޝަހީދުންގެ ދުވަހުގެ ރަސްމީ ޖަލްސާގައި ވާހަކަދައްކަވަމުން ހޯމް މިނިސްޓްރީގެ ސްޓޭޓް މިނިސްޓަރ ނަޛީރު ވިދާޅުވީ އަޅުގަނޑުމެންގެ ކާބަފައިން ފުރާނައާއި ލެއިން ޤުރުބާންވެގެން މި ޖީލާހަމައަށް ވާރުތަކޮށްފައި މިވާ އިސްލާމްދީނާއި، ދިވެހިވަންތަ ސާދާ އުޅުން ހެދިބޮޑުވަމުން އަންނަ ޖީލަށް ފޯރުކޮށްދިނުމަކީ އަޅުގަނޑުމެންގެ ކިބައިގައި އޮތް ޒިންމާއެއްކަމަށެވެ. އެކަމަށް ބޮޑު ސަމާލުކަމެއް ދިނުމަކީ ވަރަށް މުހިއްމުކަމެއްކަމަށާއި އެއީ ހަމައެކަނި ސްކޫލްތަކުގެ ޒިންމާއެއްކަމުގައި ނުދެކި ބެލެނިވެރިންވެސް އެކަންކަމާމެދު ފުންކޮށް ވިސްނަންޖެހޭކަމަށް ނަޒީރު ވިދާޅުވިއެވެ.
ޤައުމީ ފެންވަރުގައި ފާހަގަކުރާ މިކަހަލަ ހަރަކާތްތައް އަބަދު މާލޭގައި ފާހަގަކުރުމުގެ ބަދަލުގައި މުޅިރާއްޖޭގެ އެކިހިސާބުތަކުގައި މިކަން ފާހަގަކުރުމަކީ މިސަރުކާރުން އިސްކަންދޭ، މިސަރުކާރުގެ ސިޔާސަތެއްކަމަށް ސްޓޭޓް މިނިސްޓަރ ވިދާޅުވިއެވެ. މިއީ މިފަދަ ދުވަސްތައް ފާހަގަކުރުމަށް ދަޢުލަތުން ކުރިއަށްގެންދާ ހަރަކާތްތަކުގެ ފުރިހަމަ މަޤްޞަދު ޙާޞިލް ކުރުންކަމަށްވެސް ވިދާޅުވިއެވެ.
"ޤައުމިއްޔަތުގެ އަސަރު މުޅި ދިވެހިރާއްޖޭގެ އެކިހިސާބުތަކުގައި ދިރުވާ އާލާކުރުމަށް ބާރުއެޅުން. މިފަދަ ދުވަސްތައް ސަރުކާރުން ބޮޑު ޚަރަދުކޮށްގެން މިފާހަގަކުރަނީ ކަމެއްކުރާކަން އެންމެނަށްވެސް ބުނެދީ އަންގައިދިނުމަށް" ސްޓޭޓް މިނިސްޓަރ އަލީ ނަޛީރު ވިދާޅުވިއެވެ.
ފުވައްމުލަކު ބަހުރުވައިން ވާހަކަދައްކަވަމުން ސްޓޭޓް މިނިސްޓަރ އަލީ ނަޛީރު ވިދާޅުވީ ފުވައްމުލައް ސިޓީގައި ހިންގި ހަރަކާތްތަކުގެ ތެރެއިން އެނގުނީ ދިވެހި ތާރީޚާއި، ޘަޤާފަތާއި، ދިވެހި ޤައުމިއްޔަތު، އިލްމީ މައުލޫމާތުގެ ގޮތުްގައި ނުވަތަ ތަފާތު އެކިއެކި ހުނަރު މެދުވެރިކޮށްގެން ފާޅުކޮށް ދިރުވާއާލާ ކުރުމަކީ ފުވައްމުލަކުގެ ޒުވާނުންނާއި، ސްކޫލްތަކުގެ ދަރިވަރުން ވަރަށް ބޮޑަށް ބޭނުންވެފައި ތިބިކަމެއްކަންކަމަށެވެ.
"އެހެންވީމާ މިފަދަ ފުރުޞަތުތައް އިތުރުކުރަންޖެހޭ. ގިނަކުރަންޖެހޭ. އަޅުގަނޑު ސަރުކާރުގެ ފަރާތުން ސިޓީ ކައުންސިލާއި, މިރަށު ސްކޫލްތަކާއި އެހެން މުއައްސަސާތަށް ދެވެންއޮތް އެންމެ ބޮޑު އެއްބާރުލުމެއް ދޭނަން." ސްޓޭޓް ނަޛީރު ވިދާޅުވިއެވެ.
ޝަހީދުންގެ ދުވަސް ފާހަގަކުރުމަށް ފުވައްމުލައް ސިޓީގައި ބޭއްވި ރަސްމިއްޔާތުގައި ސިޓީގެ ކައުންސިލް ދަޢުލަތުގެ މުވައްސަސާތައް އަދި ރަށުގެ ފަރުދުންވަނީ ބައިވެރިވެފައެވެ.
ޝަހީދުންގެ ދުވަހާ ގުޅިގެން ދިވެހި ޤައުމިއްޔަތު ދައްކުވައިދިން ކުރެހުމުގެ މައުރަޒެއްވެސް ފުވައްމުލައް ސިޓީގައި ކުރިއަށްގެންދިޔައެވެ. އަދި ދުވަހާ ގުޅޭ މަޢުލޫމާތާއި އިލްމު ފޯރުކޮށްދިނުމުގެ ހަރަކާތްތައްވެސް ކުރިއަށްގެންދިޔައެވެ.