މާތްވެގެންވާ އިސްލާމްދީނުގައި އަންގަވާފައިވާ އެންގެވުންތަކަށް ފުރިހަމައަށް އިޙްތިރާމްކޮށް، އެ ދީނުގެ މަތިވެރި ހިދާޔަތުގައި ސާބިތުވެ ތިބުމާއި، ދީނީ ފަރުޟުތަކަށާއި ވާޖިބުތަކަށް ރައްކާތެރިވެ ތިބުމުގެ ޢަޒުމް އައުކުރެއްވުމަށް، ރާއްޖޭގެ ރައްޔިތުންނަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިލްތިމާސް ކުރައްވައިފިއެވެ.އެމަނިކުފާނު މިކަމަށް އިލްތިމާސް ކުރެއްވީ ރާއްޖެ އިސްލާމްވި ދުވަހުގެ މުނާސަބަތުގައި، ރާއްޖޭގެ ރައްޔިތުންނަށް ފޮނުއްވި ޚިޠާބުގެ މެސެޖުގައި، ދިވެހި ދައުލަތުގެ ދީނަކީ އިސްލާމްދީން ކަމާށާއި، އިސްލާމްދީނަކީ ދިވެހިރާއްޖޭގެ ޤާނޫނުގެ މައިގަނޑު މަސްދަރުކަން ފާހަގަ ކުރައްވައި، މާތްވެގެންވާ އިސްލާމްދީން ނޫން އެހެން އެއްވެސް ދީނަކަށް ރާއްޖޭގައި ޖާގަ ނެތްކަން، ޤާނޫނު އަސާސީން ކަށަވަރު ކޮށްދީފައިވާކަންވެސް ފާހަގަ ކުރައްވާފައިވެއެވެ.އަދި ރާއްޖޭގައި އެއްބައިވަންތަކަމާއި އެކުވެރިކަން ދެމެހެއްޓުމާއި ޤައުމުގެ މިނިވަންކަމާއި އިސްތިޤްލާލު ހިފެހެއްޓުމުގެ ބިންގަލަކީވެސް މާތްވެގެންވާ އިސްލާމްދީންކަން ހަނދާން ނައްތައި ނުލުމަށް ރައީސުލްޖުމްހޫރިއްޔާ އިލްތިމާސް ކުރައްވާފައިވެއެވެ. އަދި ނުގުޑާފަދަ ޢަޒުމަކާއެކު މި މާތް ދީނުގެ ތެދުމަގުގައި ސާބިތުވެ ތިބުމަކީ، ކޮންމެ މީހެއްގެ މައްޗަށް އޮތް، ދީނީ އަދި ޤައުމީ ވާޖިބެއްކަންފާހަގަ ކުރައްވާފައިވެއެވެ."މިއަދަކީ މީގެ 800 އެތައް އަހަރެއް ކުރިން، މާތްވެގެންވާ އިސްލާމްދީނުގެ މަތިވެރި ނޫރުން ދިވެހިންގެ ހިތްތައް އަލިވެ، އުޖާލާވެގެންދިޔަ ދުވަސް. މިދުވަސް ޤައުމީ ފެންވަރުގައި ފާހަގަ ކުރަމުންދާއިރު، މި ފުރްޞަތުގައި، ރާއްޖޭގެ ކުޑަކުދީންގެ ހިތްތަކުގައި، އިސްލާމްދީނަށް ޝައުޤުވެރިކަން އުފެއްދެވުމަށް ކުރެއްވެންހުރި ހުރިހާ މަސައްކަތްތަކެއް ކޮށްދެއްވުމަށް މައިންބަފައިންނަށާއި ބެލެނިވެރިންނަށް އަޅުގަނޑު ގޮވާލަން،" ރައީސުލްޖުމްހޫރިއްޔާގެ ޚިތާބުގައި ވިދާޅުވެފައިވެއެވެ.