ޔޫކްރެއިނާ ދެކޮޅަށް ރަޝިޔާއިން ކުރަމުންދާ ހަނގުރާމައިގައި ކަންތައްތައް ދަނީ އެ ޤައުމުގެ ރައީސް ވުލަޑުމީރް ޕުޓިން ހީކުރެއްވި އަދި އުއްމީދުކުރެއްވި ގޮތަކަށް ނޫންކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
މިދިޔަ އަހަރުގެ ޖަނަވަރީ މަހު އެމެރިކާގެ ވެރިކަމާ ޙަވާލުވެވަޑައިގަތުމަށްފަހު ފުރަތަމަ ފަހަރަށް އެ ޤައުމުގެ ޤާނޫނުހަދާ މަޖިލީހުގައި ތަޤްރީރުކުރައްވަމުން ބައިޑަން ވިދާޅުވީ ޔޫކްރެއިނާ ދެކޮޅަށް ރަޝިޔާއިން ކުރަމުންދާ ހަނގުރާމައިގެ ސަބަބުން ދުނިޔެއިން އެ ޤައުމު ބާކީވުން ނޫން ކަމެއް ނުވާނެކަމަށާއި ހަނގުރާމައިގެ ސަބަބުން ރަޝިޔާ ބަލިކަށިވެ ދުނިޔޭގެ އެހެން ޤައުމުތައް އިތުރަށް ވަރުގަދަވާނެކަމަށެވެ. ޔޫކްރެއިނުގައި ކުރައި ހަނގުރާމައަކީ މިނިވަންކަމާއި ޚުދުމުހުތާރުކަމާ ދެމެދުކުރަމުންދާ ހަނގުރާމައެއްކަމަށް ސިފަކުރައްވަމުން ބައިޑަން ވިދާޅުވީ ދިމީޤްރާޠީ ހަމަތައް ގެންގުޅޭ ފަރާތްތަކަށް އަބަދުވެސް ކާމިޔާބު ލިބޭނެކަމަށެވެ.
މީގެ ހަތް ދުވަސްކުރިން ރަޝިޔާއިން ފެށި ހަނގުރާމައިގެ ސަބަބުން ދުނިޔޭގެ ހަމަޖެހުމަށް ލޮޅުންއެރި ނަމަވެސް މުޅި ދުނިޔެއިންވެސް ދައްކަމުންދަނީ އެއްބައިވަންތަކަންކަމަށް ބައިޑަން ވިދާޅުވިއެވެ. އެހެންކަމުން ޔޫކްރެއިނާ ދެކޮޅަށް ހަނގުރާމައެއް އިޢުލާނުކުރައްވާފައިވާ ޕުޓިންނަށް ކުރިމަތިލައްވަން ޖެހިވަޑައިގެންފައިވަނީ އޭނާ ތައްޔާރުވެވަޑައިގެން ހުންނެވި ޙާލަތަކާ ނޫންކަމަށްވެސް ބައިޑަން ވިދާޅުވިއެވެ. އެ ގޮތުން ބައިޑަން ވިދާޅުވީ ޕުޓިން ހީކުރެއްވީ ޔޫކްރެއިނަށް ރަޝިޔާގެ ފައުޖުތައް ޙަމަލާ ދިނުމަށްފަހު އޭނާ ބޭނުންފުޅުވައި ކަންކަން ވަރަށް ފަސޭހަކަމާއެކު ޙާޞިލްކުރެއްވޭނެކަމަށާއި ދުނިޔެއިން އަޅާނުލައި އޮންނާނެކަމަށެވެ. ނަމަވެސް ކަންހިނގަމުންދަނީ އެހެން ނޫންކަމަށާއި ޕުޓިންނަށް ބޮޑު ހައިރާންކަމަކާއި ދެކޮޅުވެރިކަމަކާ ކުރިމަތިލައްވަން ޖެހިވަޑައިގެންފައިވާކަމަށް އޭނާ ވިދާޅުވިއެވެ.
އެމެރިކާ އޮތީ ވަރަށް ނާޒުކު ޙާލަތެއްގައިކަމަށް ވިދާޅުވެ ބައިޑަންވަނީ ކޯވިޑް-19އާއި އިޤްތިޞާދާއި ވޯޓުލުމުގެ ޙައްޤާއި ޖިނާޢީ ޢަދުލުގެ ނިޒާމުގެ މައްޗަށް އަލިއަޅުއްވާލައްވައި ވާހަކަދައްކަވައިފައެވެ.