އިންޑިއާއިން ރާއްޖެއަށް ފޯރުކޮށްދީފައިވާ އެހީގައި އޮލިމްޕަސް އިތުރަށް ތަރައްޤީކޮށްދޭނެ ބަޔަކު ހޯދުމަށް މިނިސްޓަރ އޮފް އަރޓްސް ކަލްޗަރ އެންޑް ހެރިޓޭޖުން އިޢުލާންކޮށްފިއެވެ. މި އެހީގައި އޮލޮމްޕަހުގައި ހުރި ޓެކްނިކަލް މައްސަލަތައް ޙައްލުކޮށް، ޒަމާނީ ވަސީލަތްތަކަށް ބަދަލުކުރުން ހިމެނެއެވެ.
އޮލިމްޕަސް ތަރައްޤީކޮށް އެތަނުގައި މުނިފޫހިފިލުވުމުގެ ހަރަކާތްތަކާއި، އަދި ފިލްމް އަޅުވަންފެށީ 1957އިން ފަށައިގެންނެވެ. އޮލިމްޕަހުގެ ޚިދުމަތަށް 61 އަހަރުވަނީ ފުރިފައެވެ. މިއީ މާލޭގައި އޭރު ބުރިބުރިއަށް ހަދާފައިވާ އެންމެ ފުރިހަމަ އިމާރާތައެވެ. އޮލިމްޕަހުގެ މައި އިމާރާތް މިހާރުވެސް ފެންނަންހުރީ ހަމަ އިހުގެ ގޮތަށެވެ.
ނަމަވެސް ޒަމާނާ އެއްގޮތަށް އޮލިމްޕަހުގެ އިމާރަތަށް ބައެއް ކުދިކުދި ބަދަލުތައް މީގެކުރިންވެސް ގެނެސްފައެވެ. އެންމެ ފަހުން އޮލިމްޕަހުގެ ބޮޑު މަރާމާތެއް ކުރި 2013ވަނަ އަހަރުއެވެ. އެގޮތުން އޮލިމްޕަހުގެ ގޮނޑިތައް ބަނދަލުކުރުމާއި އޭސީ ކުރުމާއި އަދި މަރާމަތުގެ އެކި މަސައްކަތްތައް ގެންގޮސްފައިވެއެވެ.
މިނިސްޓްރީ އޮފް އަރޓްސް ކަލްޗަރ އެންޑް ހެރިޓޭޖުން މިހާރު އިޢުލާންކޮށްފައި މިވަނީ އޮލިމްޕަހުގައި ހުރި ޓެކްނިކަލް ވަސީލަތްތައް ޒަމާނީ ވަސީލަތްތަކަށް ބަދަލުކުރުމަށެވެ. އޮލިމްޕަސް އަޕްގްރޭޑް ކުރުމުގެ މަޝްރޫޢުގެ 2ވަނަ ފިޔަވަހީގެ މަސައްކަތްތައް ކުރުމަށް ހަމަޖެހިފައިވަނީ 21 އޮކްޓޯބަރ 2021 ގައި ދިވެހި ސަރުކާރާއި އިންޑިއާ ސަރުކާރާއި ދެމެދު ވެވުނު "ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް"ގެ ދަށުން ދިން އެހީގައެވެ.
އެގޮތުން އޮލިމްޕަހުގައި ފިލްމް ދެއްކުމަށް ޕްރޮޖެކްޓަރެއް ހޯދުމާއި ސަރވާއާއިއެކު އިންސްޓޯލްކުރުމާއި، އޮލިމްޕަސް ހޯލްގެ ސަރައުންޑް ސައުންޑް އިންސްޓޯލްކޮށް އަދިވެސް އިތުރު ޓެކްނިކަލް މަސައްކަތްތައް ހިމެނެއެވެ. މި މަސައްކަތުގެ ބިޑް ހުށައެޅުން އޮންނާނީ މިމަހުގެ 10ވަނަ ދުވަހުއެވެ.
މީގެއިތުރުން އޮލިމްޕަސް ހޯލް އަދި ރިހާސަލް ރޫމްތައް އެކޯސްޓިކްސް ޓްރީޓް ކުރުމަށް ބޭނުންވާ އެކޯސްޓިކް ޕެނަލް، ފާރާއި ސީލިންގުގައި ޖަހާ ސްޕޮންޖް އަދި ފްލޯކާޕެޓް ސަޕްލައި ކޮށްދޭނޭ ފަރާތެއް ހޯދުމަށްވެސްވަނީ އިޢުލާންކޮށްފައެވެ. މި މަސައްކަތުގެ ބިޑަށް ހުޅުވާލާނީ މިމަހުގެ 9ވަނަ ދުވަހުއެވެ.
އޮލިމްޕަހުގައި އެންމެ ފަހުން ފިލްމް ދައްކާފައިވަނީ 2019ވަނަ އަހަރުއެވެ. ކޯވިޑް ޙާލަތާ ގުޅިގެން 2020ވަނަ އަަހރުން ފެށިގެން އޮލިމްޕަސް އޮތީ ބަންދުކޮށްފައެވެ. އަދި ފަހުންވެސް އޮލިމްޕަސް ދޫނުކޮށް އޮތީ ބައެއް އިތުރު މަރާމާތުގެ މަސައްކަތްތައް ކުރުމަށެވެ.
އޮލިމްޕަހަކީ ރާއްޖޭގެ ފިލްމީ ދާއިރާގެ ވަރަށް މުހިންމު ބިނާއެކެވެ. ރާއްޖޭގައި އެއްފަހަރާ އެންމެ ގިނަ މީހުނަށް ވަދެވޭ ސިނަމާއެވެ.