ހުޅުމާލޭގައި ހިނގި ނުރައްކާތެރި އެކްސިޑެންޓެއްގައި ސީރިއަސް ހާނީއްކަތަކެއް ލިބުނު މާލެ ސިޓީ އަންހެނުންގެ ތަރައްޤީއަށް މަސައްކުރާ ކޮމެޓީގެ ވިލިމާލެ ދާއިރާގެ މެމްބަރު އައިމިނަތު އީމާންގެ ފުރާނަ ސަލާމަތް ކުރެވޭތޯ އޭޑީކޭ ހޮސްޕިޓަލުގެ ޑޮކްޓަރުންގެ ޓީމުން އަންނަނީ މަސައްކަތް ކުރަމުންނެވެ.
އީމާން ނިޔާވެއްޖެ ކަމަށް ބުނެ މިއަދު މެންދުރު އާއިލާއާ ހަވާލާދީ ސިޓީ ކައުންސިލުން ހާމަކޮށްފައިވާ މަޢުލޫމާތުތައް މީޑިއާތަކުންވަނީ ގެނެސްފައެވެ. އެހެންނަމަވެސް އީމާން ނިޔާވި ކަމަށް އަދި ނިންމާފައި ނުވާ ކަމަށް އޭޑީކޭ ހޮސްޕިޓަލުންވަނީ ޕީއެސްއެމް ނިއުސްއަށް މަޢުލޫމާތުދީފައެވެ.
ޢުމުރުން 29 އަހަރުގެ އީމާން އެކްސިޑެންޓްވީ ހުޅުމާލެ ކުރެދިމާ ހިނގުމުން ސައިކަލުގައި ދުއްވާފައި ދަނިކޮށް ވެއްޓިގެންނެވެ. އެކްސިޑެންޓް ހިނގީ އިއްޔެ ހަވީރު 4:25 އެހާކަންހާއިރު ކަމަށް ފުލުހުން ވިދާޅުވެއެވެ. މަޢުލޫމާތު ލިބިފައިވާގޮތުގައި އީމާންގެ ބޮލުގެ ނާށިގަނޑު ވަނީ ފަޅައިގެން ގޮސްފައެވެ.
މި އެކްސިޑެންޓުގައި އީމާންގެ ބޮލަށް ހާނީއްކަވެ، ވަރަށްގިނައިން ލޭ ފައިބާފައި ހުރި މަންޒަރުވެސް އާންމުވެފައިވާ ވީޑިއޯއިން ފެނެއެވެ. އޭނާއަށް އަށް ފުރަތަމަ ފަރުވާ ދީފައިވަނީ ހުޅުމާލޭ ހޮސްޕިޓަލުގައެވެ. ނަމަވެސް ހާލަތު ސީރިއަސް ވެގެން ފަހުން ވަނީ އޭޑީކޭއަށް ބަދަލު ކޮށްފައެވެ.