ތުރުކީވިލާތުގެ ތެރެއިން ދަތުރުކޮށް ކަޅު ކަނޑަށް ރަޝިޔާގެ މަނަވަރުތަކަށް ނުވަދެވޭނެ ގޮތް ހަދައިފިއެވެ.
ތުރުކީވިލާތުގެ ޚާރިޖީ ވަޒީރު މަވުލޫތު ޗޮވަޝޫލޫ ވިދާޅުވީ ޔޫކްރެއިނުގައި ރަޝިޔާއިން ކުރަމުންދަނީ ހަނގުރާމައެއްކަމަށާއި ހަނގުރާމައެއްގެ ދުވަސްވަރު ކަޅު ކަނޑަށް އަސްކަރީ އުޅަނދުފަހަރު ވެއްދުމުގައި ޢަމަލުކުރާ ޚާއްޞަ މުޢާހަދާތަކެއް އޮންނަކަމަށެވެ. އެހެންކަމުން ރަޝިޔާއިން ޔޫކްރެއިނުގައި ހަނގުރާމަކުރާނަމަ ތުރުކީވިލާތުގެ ތެރެއިން ދަތުރުކުރުމުގެ ދޮރު ރަޝިޔާގެ މަނަވަރުތަކަށް ބަންދުކުރަން މަޖުބޫރުވާނެކަމަށް ޗޮވަޝޫލޫ ވިދާޅުވިއެވެ. އަދި ތުރުކީވިލާތުން ބައިނަލްއަޤްވާމީ މުޢާހަދާތަކަށް ޢަމަލުކުރާނީ ދެފުށްފެންނަ ގޮތަކަށްކަމަށްވެސް އޭނާ ވިދާޅުވިއެވެ.
2014ވަނަ އަހަރުން ފެށިގެން ރަޝިޔާގެ ބާރުގެ ދަށުގައި އޮންނަ ޔޫކްރެއިނުގެ ކުރިމިޔާ އޮންނަނީ ކަޅު ކަނޑުގައެވެ. އެ ސަރަޙައްދުގައި ރަޝިޔާގެ ގިނަ ޢަދަދެއްގެ މަނަވަރުތައް ޙަރަކާތްތެރިވެއެވެ. އަދި ކަނޑުމަގުން ޔޫކްރެއިނަށް ޙަމަލާ ދިނުމަށް ރަޝިޔާއިން އެ ސަރަޙައްދު ބޭނުންކޮށްފައިވެއެވެ. ރަޝިޔާގެ މަނަވަރުތަކަށް އެ ކަނޑުއޮޅި ބަންދުކުރުމަށް ޔޫކްރެއިނުންވަނީ ތަކުރާރުކޮށް އެދިފައެވެ.
1938ވަނަ އަހަރު ސޮއިކުރި މޮންޓުރިޔޮ މުޢާހަދާގައިވާ ގޮތުން ހަނގުރާމައެއްގެ ބިރުވެރިކަން އޮތްނަމަ ނުވަތަ ހަނގުރާމައެއްގެ ތެރޭގައި ކަޅު ކަނޑަށް ވަދެވެން އޮންނަ ކަނޑުއޮޅި އަސްކަރީ އުލަނދުތަކަށް ބަންދުކުރަން ޖެހޭނެއެވެ. ނަމަވެސް އެ މުޢާހަދާގެ ދަށުން އެ ކަނޑުއޮޅި އެއްކޮށް ބަންދުކުރުމުގެ ބާރެއް ތުރުކީވިލާތަކަށް ނުލިބޭނެއެވެ.