ކުރީގެ ރޫސީވިލާތުގެ މަޝްހޫރު ނިޔުކްލިޔަރ ރިއެކްޓަރުކަމަށްވާ ޗާނޮބިލުގައި ރަޝިޔާއާއި ޔޫކްރެއިނުގެ ސިފައިން ގުޅިގެން ޙަރަކާތްތެރިވާން ފަށައިފިއެވެ.
ފެބްރުއަރީ މަހުގެ 24ވަނަ ދުވަހު ކަނޑުމަގުންނާއި ވައިގެމަގުންނާއި އެއްގަމުން ޔޫކްރެއިނަށް ދޭން ފެށި ޙަމަލާތަކުގައި ރަޝިޔާގެ އަސްކަރީ ފައުޖުތަކުގެ ބާރުގެ ދަށަށް ޗާނޮބިލުވަނީ ގެނެސްފައެވެ. ޗާނޮބިލު އޮންނަނީ ބެލަރޫސްގެ ސަރަޙައްދީ ރޮނގު ހުރަސްކޮށް ޔޫކްރެއިނުގެ ވެރިރަށް ކިޔޭވަށް ދާން އޮންނަ މަގުމަތީގައެވެ. އެހެންކަމުން އެ ސަރަޙައްދު ރަޝިޔާގެ އަސްކަރިއްޔާގެ ބާރުގެ ދަށަށް ގެނައުމަށް ބޮޑު އިސްކަމެއް ދީފައިވެއެވެ.
ރަޝިޔާގެ ދިފާޢީ ވުޒާރާއިން ބުނެފައިވަނީ ޗާނޮބިލުގައި ތިބި ޔޫކްރެއިނުގެ ސިފައިންނާ އެއްބަސްވުމަކަށް އައިސްފައިވާކަމަށާއި އެ ސަރަޙައްދު ބެލެހެއްޓުމުގައި ދެ ޤައުމުގެ ފައުޖުތަކުން ޙަރަކާތްތެރިވާނެކަމަށެވެ. ރަޝިޔާގެ ދިފާޢީ ވުޒާރާއިންވަނީ ދެ ޤައުމުގެ ފައުޖުތައް ގުޅިގެން ޗާނޮބިލުގައި މަސައްކަތްކުރާ މަންޒަރުތައް ފެންނަ ވީޑިޔޯއެއްވެސް ޢާއްމުކޮށްފައެވެ. އަދި ރަޝިޔާގެ ފައުޖުތަކުގެ ބާރުގެ ދަށަށް ޗާނޮބިލު ގެންނަން ކުރި މަސައްކަތްތަކުގައި އެ ސަރަޙައްދުގެ އެއްވެސް ވަޞީލަތަކަށް އަދި ނިޔުކްލިޔަރ ރިއެކްޓަރަކަށް ގެއްލުމެއް ލިބިފައެއް ނުވާކަމަށާއި އެ ސަރަޙައްދުގެ ނިޔުކްލިޔަރ ހަކަތައިގެ މިންވަރަށް ބަދަލެއް ނާންނަކަމަށްވެސް އެ ވުޒާރާއިން ބުނެފައިވެއެވެ.
ދުނިޔޭގައި ހިނގި އެންމެ ނުރައްކާތެރި އަދި ގެއްލުން ބޮޑު ނިޔުކްލިޔަރ ޙާދިޘާ ހިނގާފައިވަނީ 1986ވަނަ އަހަރު ޗާނޮބިލުގައެވެ. އެ ގޮތުން ޗާނޮބިލުގެ ނިޔުކްލިޔަރ ރިއެކްޓަރެއް ގޮވައި 100އެއްހާ މީހުން މަރުވިއެވެ.