ހުޅަނގުން ހަތިޔާރު ދޭނެކަމަށް ބުނުމުން ހަނގުރާމަ ހުއްޓާލައި މަޝްވަރާކުރަން ޔޫކްރެއިނުން ފަސްޖެހެނީ
ހުޅަނގުން ހަތިޔާރު ދޭނެކަމަށް ބުނުމުން ހަނގުރާމަ ހުއްޓާލައި ޞުލްޙަ ޤާއިމުކުރުމަށް ރަޝިޔާއާ މަޝްވަރާކުރަން ޔޫކްރެއިނުން ފަސްޖެހެން ފަށައިފިއެވެ.
ފެބްރުއަރީ މަހުގެ 24ވަނަ ދުވަހު ކަނޑުމަގުންނާއި ވައިގެމަގުންނާއި އެއްގަމުން ޔޫކްރެއިނަށް ޙަމަލާ ދިނުމަށްފަހު ރަޝިޔާއިންވަނީ މަޝްވަރާގެ ދޮރުހުޅުވާލައިފައެވެ. އަދި މަތީފަންތީގެ ވަފުދެއް އެކުލަވާލައި އަވަށްޓެރި ބެލަރޫސްގެ ވެރިރަށް މިންސްކުގައި މަޝްވަރާކުރުމަށް ރަޝިޔާއިން ތައްޔާރުވިއެވެ. ނަމަވެސް ޔޫކްރެއިނުންވަނީ ބެލަރޫސްގައި މަޝްވަރާނުކުރާނެކަމަށް ބުނެފައެވެ. ސަބަބެއްކަމަށް އެ ޤައުމުން ދެއްކީ ޔޫކްރެއިނަށް ޙަމަލާ ދިނުމަށް ބެލަރޫސްގެ ސަރަޙައްދީ ރޮނގު ބޭނުންކުރުމެވެ. ބަދަލުގައި ޔޫކްރެއިނުން ހުށަހަޅާފައިވަނީ ޕޯލޭންޑުގެ ވެރިރަށް ވޯސޯއާއި ހަނގޭރީގެ ވެރިރަށް ބުޑަޕެސްޓާއި ސުލޮވޭކިޔާގެ ވެރިރަށް ބުރަޓިސްލާވާއާއި އަޒަރުބައިޖާނުގެ ވެރިރަށް ބާކޫއާއި ތުރުކީވިލާތުގެ އިސްތަންބޫލެވެ.
ރަޝިޔާގެ ރިޔާސީ ގަނޑުވަރުގެ ތަރުޖަމާނު ދިމިތުރީ ޕެސްކޯފް ވިދާޅުވީ މަޝްވަރާކުރުމުގެ ބަދަލުގައި ޔޫކްރެއިނުން ވަޤުތު ނަގާލުމަށް މަސައްކަތްކުރަމުންދާކަމަށާއި ޞުލްޙައަށް މަސައްކަތްކުރުމުގެ އެއްވެސް ވިސްނުމެއް އެ ޤައުމުން ނުގެންގުޅޭކަމަށެވެ. އެ ގޮތުން ޕެސްކޯފް ފާހަގަކުރެއްވި ގޮތުގައި މަޝްވަރާކުރުމަށް ތައްޔާރަށް އޮތްކަމަށް އެންމެ ފުރަތަމަ ބުނެފައިވަނީ ޔޫކްރެއިނުންކަމަށާއި މިންސްކުގައި މަޝްވަރާގެ ވާހަކަތައް ބޭއްވުމަށް އެންމެ ފުރަތަމަ ހުށަހެޅީވެސް ޔޫކްރެއިނުންކަމަށެވެ. ނަމަވެސް މަޝްވަރާކުރުމަށް ރަޝިޔާގެ މަތީފަންތީގެ ވަފުދެއް މިންސްކަށް ދިޔަ ނަމަވެސް ޔޫކްރެއިނުގެ ވަފުދެއް އައުމަށް ދެކޮޅުހެދިކަމަށް ޕެސްކޯފް ވިދާޅުވިއެވެ. އަދި މަޝްވަރާއަށް ޖާގަދިނުމަށް ޙަމަލާބަދަލުކުރުން މަދުކޮށްލި ނަމަވެސް ޔޫކްރެއިނުގެ ޢަމަލުތަކުގެ ސަބަބުން ޙަމަލާތައް ވަރުގަދަކޮށްފައިވާކަމަށްވެސް އޭނާ ވިދާޅުވިއެވެ.
ބެލެވޭ ގޮތުގައި ޔޫކްރެއިނުގެ ވިސްނުން ބަދަލުކުރީ ހުޅަނގުގެ ބާރުތަކުން އެ ޤައުމުގެ ދިފާޢުއަށް ޒަމާނީ ހަތިޔާރު ދިނުމަށް އެއްބަސްވުމުންނެވެ. އެ ގޮތުން އެމެރިކާއިންވަނީ އަސްކަރީ އެހީތެރިކަމުގެ ގޮތުގައި 350 މިލިޔަން އެމެރިކާ ޑޮލަރު ދިނުމަށް އެއްބަސްވެފައެވެ. އަދި ރަޝިޔާގެ ޓެންކަރުތަކާ ދެކޮޅަށް ބޭނުންކުރުމަށް 1،000 މިސައިލް ނިޒާމާއި ރަޝިޔާގެ ހަނގުރާމަމަތީ މަތިންދާބޯޓުތަކާ ދެކޮޅަށް ބޭނުންކުރުމަށް 500 މިސައިލް ނިޒާމު ފޯރުކޮށްދިނުމަށް ޖަރުމަންވިލާތުންވަނީ ނިންމައިފައެވެ. އޭގެ އިތުރުންވެސް ވިލާތުގެ 25 ޤައުމަކުން ޔޫކްރެއިނަށް އަސްކަރީ އެހީތެރިކަން ދިނުމަށްވަނީ ނިންމައިފައެވެ.
ޔޫކްރެއިނަށް ހަމަލާ ދިނުމުން ވިލާތުގެ އިއްތިޙާދުގެ 27 ޤައުމުންނާއި އިނގިރޭސިވިލާތާއި އެމެރިކާއާއި ކެނެޑާއިންނާއި އޮސްޓުރޭލިޔާއިންނާއި ޖަޕާނުންވަނީ ރަޝިޔާއާ ދެކޮޅަށް ހަރުކަށި އިޤްތިޞާދީ ދަތިކުރުމުގެ ފިޔަވަޅުތަކެއް އަޅައިފައެވެ. އެ ފިޔަވަޅުތަކުގެ ތެރޭގައި ރަޝިޔާގެ ބޭންކުތަކާއި އެއްވެސް މާލީ މުޢާމަލާތެއް ނުކުރުމަށާއި އެ ބޭންކުތަކުގެ މުދަލާއި ފައިސާ ހިފެހެއްޓުމާއި ސުޓާލިން ޕައުންޑާއި ޑޮލަރުގެ މުޢާމަލާތްތައްކުރުން މަނާކުރުމާއި ލޯނުތައް ލިބޭނެ ދޮރުތައް ބަންދުކުރުމާއި ރަޝިޔާގެ 100އަށްވުރެ ގިނަ ކުންފުންޏާއި ވަކިވަކި ފަރުދުންގެ މުދަލާއި ފައިސާ ހިފަހައްޓައި ޓެކްނޮލޮޖީގެ ދާއިރާއިންނާއި ހަކަތައިގެ ދާއިރާއިން ރަޝިޔާއިން ބޭނުންވާ ސާމާނު ނުހޯދޭނެ ގޮތް ހެދުން ހިމެނެއެވެ. އޭގެ އިތުރުން ދުނިޔޭގައި އޮންލައިންކޮށް ފައިސާގެ މުޢާމަލާތްކުރާ ނިޒާމުން ރަޝިޔާ ބާކީކޮށް އެ ޤައުމުތަކުގައި ހުރި ރަޝިޔާގެ ރައީސް ވުލަޑުމީރް ޕުޓިންގެ މުދަލާއި ފައިސާ ހިފެހެއްޓުމަށްވެސްވަނީ ނިންމައިފައެވެ.