ޔޫކްރެއިނަށް ވަރުގަދަ ޙަމަލާތަކެއް ދެމުންދާ ދަނޑިވަޅެއްގައި ރަޝިޔާއާ ދެކޮޅަށް އދގެ ސަލާމަތީ މަޖިލީހުން ފާސްކުރަން އުޅުނު ޤަރާރަށް ރަޝިޔާއިން ހުރަސްއަޅައިފިއެވެ.
ފަނަރަ މެންބަރު ޤައުމުގެ މައްޗަށް އެކުލެވޭ ސަލާމަތީ މަޖިލީހުން ފާސްކުރަން އުޅުނު ޤަރާރު ރަޝީޔާއިންވަނީ ވީޓޯކޮށްފައެވެ. އަދި ޗައިނާއާއި އިންޑިޔާއާއި ޔޫއޭއީންވަނީ ވަކި ކޮޅަކަށް ވޯޓޫދިނުމަށް ދެކޮޅުހަދައިފައެވެ. ސަލާމަތީ މަޖިލީހުން ޤަރާރެއް ފާސްކުރެވޭނީ އެ މަޖިލީހުގެ ދާޢީމީ މެންބަރުންކަމަށްވާ ރަޝިޔާއާއި ޗައިނާގެ ރުޙުމާއެކުއެވެ. އެހެންކަމުން ޔޫކްރެއިނުގެ މައްސަލަ ދެން ތާވާލުކުރާނެކަމަށް ބެލެވެނީ އދގެ ޢާއްމު މަޖިލީހުގައެވެ. 193 މެންބަރު ޤައުމުގެ މައްޗަށް އެކުލެވޭ ޢާއްމު މަޖިލީހުގެ ރިޔާސަތުގައި އިންނަވަނީ ދިވެހިރާއްޖޭގެ ޚާރިޖީ ވަޒީރު ޢަބްދުﷲ ޝާހިދެވެ.
ރަޝިޔާއާ ގާތްގުޅުމެއް އޮންނަ ޗައިނާއިން ސަލާމަތީ މަޖިލީހުގައި އެއްވެސް ކޮޅަކަށް ނޭރުމަކީ ކާމިޔާބީއެއްކަމަށް ބައެއް ތަޖުރިބާކާރުން ބުނެއެވެ. ނަމަވެސް އެއީ ރަޝިޔާއާ ދެކޮޅުވެރިވުމަށް ޗައިނާއިން ކުރި ކަމެއްކަމަށް ބެލެވޭކަށް ނެތެވެ. އަދި ހުޅަނގާ ގާތްގުޅުންތަކެއް އޮންނަ އިންޑިޔާއާއި ޔޫއޭއީން ވަކިކޮޅަކަށް ވޯޓު ނުދިނުމަކީވެސް ކަންބޮޑުވާން ޖެހޭކަމެއްކަމަށްވެސް ތަޖުރިބާކާރުން ބުނެއެވެ.
އދގެ ސަލާމަތީ މަޖިލީހުން ފާސްކުރަން އުޅުނު ޤަރާރުގައި ރަޝިޔާއިން ޔޫކްރެއިނަށް ދެމުންދާ ޙަމަލާ ކުށްވެރިކުރުމުގެ ބަދަލުގައި ބުނެފައިވަނީ ޔޫކްރެއިނަށް ދެމުންދާ ޙަމަލާތަކާމެދު ކަންބޮޑުވާކަމަށެވެ. ފެބްރުއަރީ މަހުގެ 24ވަނަ ދުވަހު ރަޝިޔާއިން ޔޫކްރެއިނަށް ޙަމަލާ ދޭން ފަށާފައިވަނީ ސަލާމަތީ މަޖިލީހުގެ ބައްދަލުވުމެއް ބާއްވަމުންދަނިކޮށެވެ.