ވިލާތުގެ ކައުންސިލުން ރަޝިޔާ ސަސްޕެންޑުކޮށްފިއެވެ.
ފަރަންސޭސިވިލާތުގައި މަރުކަޒުވެފައިވާ ވިލާތުގެ ކައުންސިލުން ނެރުނު ބަޔާނެއްގައި ބުނެފައިވަނީ ޔޫކްރެއިނަށް ޙަމަލާ ދިނުމުގެ ސަބަބުން ވަކި ގޮތަކަށް ނިންމަންދެން އެ ކައުންސިލާއި ވިލާތުގެ ޤާނޫނުހަދާ މަޖިލީހުގެ ބައްދަލުވުންތަކުގައި ރަޝިޔާއަށް ބައިވެރިނުވެވޭނެކަމަށެވެ. އެ ބަޔާނުގައި ބުނެފައިވަނީ ރަޝިޔާއަކީ އަދިވެސް ވިލާތުގެ ކައުންސިލުގެ މެންބަރު ޤައުމެއްކަމަށާއި އެހެންކަމުން އެ ކައުންސިލުގެ ޤާނޫނުތަކާއި މުޢާހަދާތަކާއި އެއްބަސްވުންތަކަށް ޢަމަލުކުރަން ޖެހޭނެކަމަށެވެ. އޭގެ ތެރޭގައި އިންސާނީ ޙައްޤުތަކާބެހޭ މުޢާހަދާވެސް ހިމެނޭނެކަމަށް އެ ބަޔާނުގައި ބުނެފައިވެއެވެ. އަދި ވިލާތުގެ ކައުންސިލުން ސަސްޕެންޑުކުރި ނަމަވެސް އިންސާނީ ޙައްޤުތަކާބެހޭ ވިލާތުގެ ކޯޓަށް ރަޝިޔާއިން ބޭނުންވާ މައްސަލަތައް ހުށަހެޅޭނެކަމަށާއި ރަޝިޔާއާ ކުރަން ޖެހޭ ހުރިހާ މުޢާމަލާތެއް ކުރަމުންދާނެކަމަށްވެސް އެ ބަޔާނުގައިވަނީ ބުނެފައެވެ.
ދެވަނަ ބޮޑު ހަނގުރާމައަށްފަހު 1949ވަނަ އަހަރު ވިލާތުގެ ކައުންސިލް އުފައްދާފައިވަނީ ވިލާތުގައި ދިމީޤްރާޠީ ހަމަތަކާއި އިންސާނީ ޙައްޤުތަކާއި ޤާނޫނީ ވެރިކަން ދަމަހައްޓައި ޔަޤީންކުރުމަށެވެ. އެ ކައުންސިލުގައި ވިލާތުގެ އިއްތިޙާދުގެ 27 ޤައުމާއެކު ޖުމުލަ 47 ޤައުމު ތަމުޞީލުކުރެއެވެ.