ޔޫކްރެއިނުގެ ސަރުކާރު ބަދަލުކުރުމަށްފަހު އަވަހަށް މަޝްވަރާގެ މޭޒަށް އައުމަށް އެ ޤައުމުގެ އަސްކަރިއްޔާއަށް ރަޝިޔާގެ ރައީސް ވުލަޑުމީރް ޕުޓިން ގޮވާލައްވައިފިއެވެ.
ޔޫކްރެއިނުގެ ވެރިރަށް ކިޔޭވު ވަށާލުމަށްފަހު ރަޝިޔާގެ އަސްކަރިއްޔާއިން ވަރުގަދަ ޙަމަލާތަކެއް ދެމުންދާ ދަނޑިވަޅެއްގައި ޕުޓިން ވިދާޅުވީ ޔޫކްރެއިނުގެ ސިފައިންނަކީ ވަރަށް ހިތްވަރުގަދަ ބައެއްކަމަށާއި ޤައުމުގެ ބާރުތަކާ ޙަވާލުވާން ޖެހޭ ވަޤުތު ޖެހިއްޖެކަމަށެވެ. އަދި އެ ގޮތަށް ކަންތައްކޮށްފިނަމަ އިތުރު ހަނގުރާމައެއް ނުކޮށް ޔޫކްރެއިނުގައި ޞުލްޙަ ޤާއިމުކުރުމަށް ފަސޭހަވާނެކަމަށްވެސް އޭނާވަނީ ވިދާޅުވެފައެވެ. ފެބްރުއަރީ މަހުގެ 24ވަނަ ދުވަހު ޔޫކްރެއިނުގެ އަސްކަރީ މަޤާމުތަކަށް ޙަމަލާ ދިނުމަށް ރަޝިޔާގެ އަސްކަރިއްޔާ ޢަމުރުކުރެއްވުމަށްފަހުވެސް ޕުޓިންވަނީ ޔޫކްރެއިނުގެ ސިފައިން ހަތިޔާރު ބަހައްޓައި ކުރިމަތިލުމަކަށް ނުދިޔުމަށް ގޮވާލައްވައިފައެވެ. ވައިގެމަގުންނާއި ކަނޑުމަގުންނާއި އެއްގަމުން ޔޫކްރެއިނަށް ޙަމަލާ ދޭން ފެށިތާ މަދު ވަޤުރުކޮޅެއްގެ ތެރޭގައި އެ ޤައުމުގެ ވައިގެ ދިފާޢީ ނިޒާމުވަނީ ރަޝިޔާއިން ނައްތާލައިފައެވެ. އަދި ބަރުހަތިޔާރާއެކު ރަޝިޔާގެ ސިފައިންވަނީ ވަރަށް ފަސޭހަކަމާއެކު ޔޫކްރެއިނުގެ ތިން ސަރަޙައްދަކުން އެ ޤައުމަށް އަރައިފައެވެ.
ދެ ދުވަހުގެ ތެރޭގައި ރަޝިޔާއިން ހޯދާފައިވާ ބޮޑެތި އަސްކަރީ ކާމިޔާބީތަކާއެކު އެ ޤައުމުގެ ބާރުގެ ދަށަށް ކިޔޭވު ގެންދާނެކަމަށް ބެލެވިފައިވަނިކޮށް ޔޫކްރެއިނުގެ ސަރުކާރުންވަނީ ޞުލްޙައިގެ މަޝްވަރާތައް ބޭއްވުމަށް އެދިފައެވެ. ޔޫކްރެއިނުގެ ހުށަހެޅުން ޤަބޫލުކުރައްވައި މަޝްވަރާތަކުގައި ބައިވެރިވުމަށް ރަޝިޔާގެ މަތީފަންތީގެ ވަފުދެއް ފޮނުއްވަން ތައްޔާރަށް ހުންނެވިކަމަށާއި އެ މަޝްވަރާތައް އަވަށްޓެރި ބެލަރޫސްގައި ބޭއްވުމަށް ތައްޔާރަށް ހުންނެވިކަމަށް ޕުޓިންވަނީ ވިދާޅުވެފައެވެ. ނަމަވެސް ބެލަރޫސްސަކީ ޔޫކްރެއިނަށް ޙަމަލާ ދިނުމުގައި ރަޝިޔާގެ އަސްކަރިއްޔާއިން ބޭނުންކުރި ޤައުމެއްކަމަށް ބުނެ ޔޫކްރެއިނުންވަނީ ޕޯލޭންޑުގައި މަޝްވަރާތައް ބޭއްވުމަށް ހުށަހަޅައިފައެވެ. އެ މަޝްވަރާތައް ބޭއްވުމަށް ރަޝިޔާއިން އެއްބާރުލުން ދޭނީ ޔޫކްރެއިނުގެ އަސްކަރިއްޔާއިން އަމާންދިނުމުންކަމަށްވަނީ ބުނެފައެވެ.
އަމިއްލައަށް މިނިވަންކަން އިޢުލާންކޮށްފައިވާ ޔޫކްރެއިނުގެ އިރުމަތީގައި އޮންނަ ދޮންބާސްގެ ދެ ދަޢުލަތުގެ ދިފާޢުގައި އެ ޤައުމުގައި އަސްކަރީ ޙަރަކާތްތަކެއް ހިންގުމުގެ ޢަމުރުދެއްވާފައިވާކަން އިޢުލާންކުރައްވަމުން ރަޝީޔާގެ ރައީސް ވުލަޑުމީރް ޕުޓިން ވިދާޅުވީ ޔޫކްރެއިނު އިސްތިޢުމާރުކުރުމުގެ އެއްވެސް ވިސްނުމެއް ރަޝިޔާއިން ނުގެންގުޅޭކަމަށެވެ. އަދި ރަޝިޔާގެ އަސްކަރީ ޙަރަކާތްތަކުގެ ބޭނުމަކީ ދޮންބާސްގައި ފާއިތުވި 8 އަހަރުދުވަހު ޔޫކްރެއިނުގެ ފައުޖުތައް ހިންގަމުންދާ ލާއިންސާނީ ޖަރީމާތަކާއި ޤަތުލުޢާއްމު ހުއްޓުވުންކަމަށް ޕުޓިން ވިދާޅުވިއެވެ. އޭނާ ވިދާޅުވި ގޮތުގައި ރަޝިޔާގެ އަސްކަރީ ޙަރަކާތުގެ ދަށުން ޔޫކްރެއިނުގެ އަސްކަރީ ބާރުވެރިކަން ނައްތާލައި އެ ޤައުމުގެ ރައްޔިތުންނާ ދެކޮޅަށް އަނިޔާވެރިވުމުގެ ޢަމަލުތައް އިތުރަށް ނުހިންގޭނެކަން ކަށަވަރުކުރާނެއެވެ. ޔޫކްރެއިނަށް ޙަމަލާ ދިނުން ނޫން ގޮތެއް ރަޝިޔާއަށް ނެތްކަން ފާހަގަކުރައްވައި ޕުޓިން ވިދާޅުވީ ނޭޓޯގެ މެންބަރުކަން ޔޫކްރެއިނަށް ދުވަހަކުވެސް ނުދޭނެކަމުގެ ޔަޤީންކަން ދިނުމަށް އެ އިއްތިޙާދުން ދެކޮޅުހެދިކަމަށެވެ. އަދި ރަޝިޔާއާ އިންވެގެން އޮންނަ ޔޫކްރެއިނުން ނިޔުކްލިޔަރ ހަތިޔާރުގެ ޤާބިލްކަމާއި ބާރުވެރިކަން ހޯދުމުގެ ފުރުޞަތު ނުދެއްވާނެކަމަށްވެސް ޕުޓިން ވިދާޅުވިއެވެ.
2008ވަނަ އަހަރުގެ ތެރޭގައި ރަޝިޔާއާ އިންވެގެން އޮންނަ ޖޯޖިޔާގައި ދިރިއުޅޭ ރަޝިޔާ ބަހުން ވާހަކަދައްކައި ރަޝިޔާގެ ރައްޔިތުންނާ ދެކޮޅަށް ޖޯޖިޔާގެ އަސްކަރިއްޔާއިން ޤަތުލުޢާއްމެއް ހިންގުމުން ރަޝިޔާއިންވަނީ ސަރަޙައްދީ ރޮނގު ހުރަސްކޮށް ޖޯޖިޔާއަށް ވަރުގަދަ ޙަމަލާތަކެއް ދިނުމަށް އެ ސަރަޙައްދުތައް ރަޝިޔާގެ ބާރުގެ ދަށަށް ގެނެސްފައެވެ. އެ ސަރަޙައްދުތަކުން ރަޝިޔާގެ ފައުޖުތައް ފޭބީ އެ ސަރަޙައްދުތަކުގައި ދިރިއުޅޭ ރައްޔިތުންނަށް އެއްވެސް ގޯނާއެއް ނުކުރާނެކަމުގެ ޔަޤީންކަން ޖޯޖިޔާއިން ދިނުމުންނެވެ. އަދި 2014ވަނަ އަހަރުގެ ތެރޭގައި ޔޫކްރެއިނުގައި ކުރި މުޒާހަރާތަކުގައި އެ ޤައުމުގައި އޮތް ރަޝިޔާއާ ރަހްމަތްތެރި ވެރިކަން ބަދަލުކުރުން ރަޝިޔާއިންވަނީ ޔޫކްރެއިނުގެ ދެކުނުގައި އޮންނަ ކުރީމިޔާއަށް ޙަމަލާ ދިނުމަށް އެ ސަރަޙައްދު އަތުލައިފައެވެ.