މުޖުތަމަޢުގައި ހިނގާ ބޮޑެތި ކުށްތައް ހުއްޓުވުމުގައި ޢާއިލާ ބެލެހެއްޓުމުގެ މަސައްކަތްކުރާ އަންހެނުންގެ ދައުރު ވަރަށްފުޅާކަމަށް ނޭޝަނަލް ކައުންޓާ ޓެރަރިޒަމް ސެންޓަރުގެ ކުރީގެ ޑައިރެކްޓަރ ޖެނެރަލް ބްރިގޭޑިއަރ ޖެނެރަލް(ރިޓަޔާޑް) ޒަކަރިއްޔާ މަންޞޫރު، ވިދާޅުވެއްޖެއެވެ.
ޒަކަރިއްޔާ މަންސޫރްވަނީ، އިޖުތިމާޢީ ބަދަހިކަމާއި ވިލުންވެރިކަން އިތުރުކުރުމަށް ޔޫތް މިނިސްޓްރީއާއި ނެޝަނަލް ކައުންޓަރ ޓެރަރިޒަމް ގުޅިގެން ތ.އަތޮޅުގައި ފެށި "ހަފްތާރެސް" ޕްރޮގްރަމްގައި ބައިވެރިވެ ވަޑައިގަންނަވާފައެވެ.
ހަފްތާރެސްއަކީ މުޖުތަމައުގެ އެއްބައިވަންތަކަމާއި، އެއްބައިވަންތަކަން ކުރިއަރުވައި ދެމެހެއްޓުމަށްޓުމާއި އަދި މުޖުތަމައުގައިހުރި އެކިއެކި މައްސަލަތަކާ ގުޅޭ ދާއިރާތަކުން އާންމުންނާއި ޒުވާނުންގެ ހޭލުންތެރިކަން އިތުރުކުރުމަށް މިނިސްޓްރީ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަމަންޓާއި، ނެޝަނަލް ކައުޓަރ ޓެރަރިޒަމް ސެންޓަރ ގުޅިގެން ކުރިއަށްގެންދާ ޕްރޮގްރާމެކެވެ. ތ.އަތޮޅުގައި މިކުރިއަށްގެންދަނީ މީގެ 5ވަނަ ބުރެވެ.
ހަފްތާރެސްގެ ބައިވެރިންނާ ވާހަކަދައްކަވަމުން ޒަކަރިއްޔާ މަންސޫރު ވިދާޅުވީ ހައްދުން ނެއްޓިގެންދާ މިންވަރަށް ކަންކަމަށް ޝަޢުގު ބެހެއްޓުމަކީ ކޮށްގެންވާނެ ކަމެއް ނޫންކަމަށެވެ. ޕާޓީ ސިސްޓަމާއި، ދީނީ ކަންކަމާއި އަދި ހައްދުން ނެއްޓޭ މިންވަރަށް ލޯބިވުމަކީވެސް މުޖުތަމަޢުގައި އެތަށް މައްސަލަަކަތަކެއް އުފެދި ނުރައްކަލަކަށް ހުށައެޅިދާނެ ޙާލަތްތަކެއް މެދުވެރިވެދާނެ ކަމެއްކަމަށެވެ.
ޒަކަރިއްޔާ މަންސޫރް ވިދާޅުވީ ރަށްރަށުގެ ކުދިކުދި މުޖުތަމަޢުގައިވެސް މިފަދަ ކަންކަން ބޮޑެތި ހަމަނުޖެހުންތަކަށް ބަދަލުވާ ހިސާބަށްވެސް ގޮސްފައިވާކަމަށެވެ. މިއީ ވަރަށް ނުރައްކާތެރިކަމެއް ކަމަށާއި، މިކަން ހުއްޓުވުމަށް މުޖުތަމައު އެކަތިގަނޑަކަށްވެ މަސައްކަތް ކުރުމަށް އޭނާ ގޮވާލެއްވިއެވެ.
އޭނާ ވިދާޅުވީ ވަރަށްގިނަ މައްސަލަތަކެއް ދެނެގަނެވި އެކަންކަން ހުއްޓުވުމަށް އާއިލާގެ މާޙައުލު ވަރަށް މުހިންމު ދައުރެއް އަދާކުރާކަމަށެވެ. ޚާއްސަކޮށް އަންހެނުންގެ ދައުރު މިކަމުގައި ބޮޑުކަމަށް ވިދާޅުވިއެވެ.
"ގޭގައި ހުންނަ އަންހެންމީހާއަށް، މަންމަ ނޫނީ އަނބިމީހާއަށް އެނގޭނީ ދަރިންނަށް ނުވަތަ ފިރިންގެ އުޅުމަށް އެއަންނަ ބަދަލުތައް. އެމީހުން ކުށުގެ ޢަމަލެއް ކުރާނަމަ، އެމީހާގެ ދިރިއުޅުމުން އެ ފެންނަން ފަށާ ބަދަލުތައް. އެހެންވީމާ އަންހެނުން ވެފައިވަނީ މިފަދަ ކުށްތައް ހުޓުމަށް މަސައްކަތްކުރުމަށް މުހިންމު ބަޔަކަށް." ޒަކަރިއްޔާ މަންސޫރު ވިދާޅުވިއެވެ.
ޒަކަރިއްޔާ މަންސޫރު ވިދާޅުވީ ރަށެއްގައި މިފަދަ ކުށުގެ ޢަމަލެއް ހިންގާނަމަ، އެކަންކަމާއި އަޅާނުލައި ތިބުމުގެ ބަދަލުގައި އެކަން ހުއްޓުވަން ޖެހޭކަމަށެވެ. ކުށްމަދުކުރުމަށް މަސައްކަތްކުރުމުގައިވެސް އޮންނަ އުސޫލުން ސުލްޙަވެރިކަމާއެކު އެކަންކަން ކުރުމުގެ މުހިންމުކަން ފާހަގަކުރެއްވިއެވެ.
ހަފްތާރެސް ޕްރޮގްރާމް އަމާޒުކޮށްފައިވަނީ ރަށުގެ މުއައްސަސާތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިސްވެރިންނާއި، ބެލެނިވެރިންގެ އިތުރުން ޒުވާނުން އަދި ކްލަބް ޖަމްޢިއްޔާތަކަށެވެ. މި ސެޝަންތައް ކުރިއަށް ގެންދާނީ އެން.ސީ.ޓީ.ސީ، ޔޫތު މިނިސްޓްރީ، މޯލްޑިވްސް ޕޮލިސް ސަރވިސް، ދިވެހިރާއްޖޭގެ އިސްލާމީ ޔުނިވާސިޓީގެ އިތުރުން މޯލްޑިވިއަން ރެޑްކްރެސެންޓްގެ ފަރާތުންނެވެ. ހަފްތާރެސްގެ ޕްރޮގްރާމްތައް ފެށީ 2019ވަނަ އަހަރުއެވެ.