ރާއްޖޭގައި ހުންނަ އިންޑިއަން ކަލްޗަރަލް ސެންޓަރާއި އިންޑިއާ ކޮމިޝަނުން އިންތިޒާމްކޮށްގެން، ދާދިފަހުން މަރުވެފައިވާ އިންޑިއާގެ މަޝްހޫރު ލަވަކިޔުންތެރިޔާ ލަތާ މަންގޭޝްކަރުގެ ހަނދާނުގައި ޚާއްސަ ޓްރިބިއުޓެއް ދިނުމަށް ހަފްލާއެއް ބާއްވައިފިއެވެ.
ރާއްޖޭގެ ޤައުމީ ޔުނިވަސިޓީގެ އޮޑިޓޯރިއަމްގައި ބޭއްވި މި ޙަފްލާގައި ލަތާ މަންގޭޝްކަރު ގެ 15 ލަވައެއް ވަނީ ހުށަހަޅާފައެވެ.
މި ހަފްލާގައި ވާހަކަފުޅުދައްކަވަމުން އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު، މުނު މަހާވަރް ވިދާޅުވީ ލަތާ މަންގޭޝްކަރުގެ ހަނދާންތަކާއި އޭނާގެ ލަވަތައް އަބަދުވެސް މީހުންގެ ހަނދާނުގައި ހުންނާނެކަމަށެވެ. އަދި ލަތާގެ އެ ވަކިވުމަކީ އިންޑިއާއަށް ލިބިގެންދިޔަ ވަރަށް ބޮޑު ހިތާމައެއްކަމަށްވެސް އޭނާ ވިދާޅުވިއެވެ.
މި ޓްރިބިއުޓްގައި ރާއްޖޭގެ ޔޫތު މިނިސްޓަރ އަޙްމަދު މަހުލޫފުވެސް ވަނީ ބައިވެރިވެވަޑައިގެންފައެވެ. ޔޫތު މިނިސްޓްރީގެ ފަރާތުން މި ޙަރަކާތް އިންތިޒާމުކުރުމުގައި ދެއްވި އެއްބާރުލެއްވުމަށް އިންޑިއަން ކަލްޗަރަލް ސެންޓަރުން ވަނީ ޝުކުރު ދަންނަވާފައެވެ.
އުމުރުން 92 އަހަރުގައި ލަތާ މަންގޭޝްކަރު މަރުވީ ކޯވިޑަށް ފަރުވާ ދެމުން ދަނިކޮށެވެ. އޭނާއަށް ކޯވިޑު ޖެހިގެން ހޮސްޕިޓަލުގައި އެޑްމިޓުކޮށްފައިވަނީ މިދިޔަމަހުގެ ކުރީކޮޅުއެވެ. ކޯވިޑަށް ޕޮޒިޓިވުމަށްފަހު ލަތާއަށްވަނީ ނިއުމޯނިއާ ޖެހިފައެވެ. އޭނާ މަރުވީ ފަރުވާދެމުން ދަނިކޮށް އައިސީޔޫގައި ވެންޓިލޭޓަރުގައެވެ.
ލަތާ އަކީ އިންޑިއާގެ ރަން އަޑުގެ ގޮތުގައި މަޝްރޫހުކަން ހޯދާފައިވާ ލަވަކިޔުންތެރިއެކެވެ. އުމުރުން އެންމެ 13 އަހަރުގައި އޭނާ ވަނީ ލަވަކިޔުމުގެ ދާއިރާއަށް ނިކުމެފައެވެ. އެގޮތުން ލަތާގެ ލަވަކިޔުމުގެ ކެރިއަރުގައި 70އަށްވުރެ ގިނަ އަހަރު ހޭދަކޮށްފައިވެއެވެ. އެކި ބަހުރުވައިގެން 30000 އަށްވުރެ ގިނަ ލަވަ އޭނާވަނީ ކިޔާފައެވެ.