ރާއްޖޭގެ ބޯޑަރުގެ ސަލާމަތާއި ރައްކާތެރިކަމާގުޅޭ ކޯސް، ކަމާގުޅޭ އެކި ދާއިރާތަކުގެ 14 މީހަކު، ފުރިހަމަކޮށްފިއެވެ.
ވިޒިޓް ބޯޑް، ސަރޗް އެންޑް ސީޒަރ އިންސްޓްރަކްޓަރ ކޯހާއި ވިޒިޓް ބޯޑް ސަރޗް އެންޑް ސީޒަރ ބޭސިކް ކޯސް، ފުލުހުންނާ އެމްއެންޑީއެފް އަދި ކަސްޓަމްސް ހިމެނޭހެން 14 މުވައްޒަފަކު ވަނީ ފުރިހަމަކޮށްފައެވެ. ކޯހުގެ ނިމުން ފާހަގަކުރުމަށް ބަންޑާރަކޮށީގައި ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވީ އެމްއެންޑީއެފް ކޯސޯޓްގާޑުގެ ކޮމަޑާންޓް ކާނަލް އިބްރާހީމް ޙިލްމީއެވެ.
ޔުނައިޓެޑް ނޭޝަންސް އޮފީސް އޮން ޑްރަގް އެންޑް ކްރައިމްގެ ގްލޯބަލް މެރިޓައިމް ކްރައިމް ޕްރޮގްރާމްގެ ދަށުން ހިންގި މި ދެކޯސް ނިންމުމުގެ ރަސްމިއްޔާތުގައި ޔޫއެންއޯޑީސީގެ ންސްޓްރަކްޓަރ، ޕައުލް ރޮބަރޓް ވަނީ ކޯސްތައް ފުރިހަމަކުރި ބައިވެރިންނަށް ހަނދާނީ ލިޔުން ހަވާލުކޮށްދެއްވައި ކޯހުގައި ކުރިއަށްގެންދިޔަ ބައިތަކުގެ މަޢުލޫމާތު ޙިއްސާކޮށްފައެވެ.
ކޯސްޓްގާޑާއި ޔޫއެންއޯޑީސީ ގުޅިގެން އިންތިޒާމުކުރި ވިޒިޓް ބޯޑް، ސަރޗް އެންޑް ސީޒަރގެ އިންސްޓްރަކްޓަރ ކޯހުގައި ބޭސިކް ކޯހަކީ ކަނޑުމަތީގައި ހަރަކާތްތެރިވާ ލޯ އެންފޯސްމަންޓް އިދާރާތަކަށް ނިސްބަތްވާ ފަރާތްތަކުން އެއް އިދާރާ، އަނެއް އިދާރާއާ ގުޅިގެން މަސައްކަތް ކުރުމުގެ އަމަލީ ތަޖުރިބާ ހޯދަދިނުން ހިމެނެއެވެ. މިކޯހުގައި އެމްއެންޑީއެފް، މޯލްޑިވްސް ޕޮލިސް ސަރވިސް އަދި ސްޓަމްސް ސަރވިސްއިން ބައިވެރިވެފައިވެއެވެ. މިއީ 2ހަފްތާގެ ކޯހެކެވެ. ވީބީއެސް ބޭސިކް ކޯހުގައި އެކި އިދާރާތަކުން 14 މުވައްޒަފުން ބައިވެރިވެ ފުރިހަމަކޮށްފައިވެއެވެ.
ވީބީއެސް ބޭސިކް ކޯހުގައި ބައިވެރިވި ފަރާތްތަކު ތެރޭގައި ދިވެހި ފުލުހުންގެ ޚިދުމަތުގައި މަސައްކަތް ކުރައްވާ 4 ފުލުހުންނާއި، މޯލްޑިވްސް ކަސްޓަމްސް ސަރވިސްގައި މަސައްކަތްކުރައްވާ 2 މުވައްޒަފު އަދި އެމްއެންޑީއެފްގެ ސިފައިންގެ 8 މީހަކު ހިމެނެއެވެ.
ވީބީއެސްއެސް އިންސްޓްރަކްޓަރ ކޯހަކީ، ވީބީއެސްއެސް ބޭސިކް ކޯސް ފުރިހަމަކޮށްފައިވާ ފަރާތްތަކަށް ބައިވެރިވެވޭ ގޮތަށް ކުރިއަށްގެންދާ ކޯހެކެވެ. ނިމިގެންދިޔަ ވީބީއެސްއެސް އިންސްޓްރަކްޓަރ ކޯސް ސިފައިންގެ 4 މީހަކު ވަނީ ފުރިހަމަކޮށްފައެވެ.
ކޯހުގައި ކިޔަވައިދިން މުހިންމު ބައިތަކުގެ ތެރޭގައި ލޯ އެންފޯސްމަންޓް އެޖެންސީތަކުގެ ޒިންމާތަކާއި، ކަނޑުމަތީގެ ބައިނަލްއަޤްވާމީީ ޤާނޫނުތަކާއި، ސެލްފް ޑިފެންސް ޓެކްނިކްސްގެ އިތުރުން، އެރެސްޓިންގ ޓެކްނިކްސް، އަދި މުޢާމަލާތު ކުރުން ފަދަ ހުނަރުތައް ހިމެނެއެވެ. މީގެއިތުރުން ކޯހުގެ ތެރޭގައި، ވީބީއެސްއެސް އިންސްޓްރަކްޓަރ ކޯހުގެ ބައިވެރިންނަށް ވަނީ އިންސްޓްރަކްޝަނަލް
ޓެކްނިކްސް ކިޔަވައިދީފައެވެ.
ކޯހުގެ ތިއަރީ ކުލާސްތަކާއި ބައެއް ޕްރެކްޓިކަލް ކްލާސްތައް ވިލިމާލޭގައި ހުންނަ ފަޔަރ އެންޑް ރެސްކިޔު ޓްރޭނިންގ ސްކޫލާއި، މެރިޓައިމް ރެސްކިއު ކޯޑިނޭޝަން ސެންޓަރުގައި ކުރިޔަށް ގެންގޮސްފައިވެއެވެ. އަދި، ބައެއް ޕްރެކްޓިކަލް ކުލާސްތައް ހުޅުމާލޭގައި ހުންނަ ކޯސްޓްގާޑް އުޅަނދުތައް ބަނދަރުކޮށްފައިވާ ސަރަހައްދުގައި ކުރިއަށް ގެންގޮސްފައިވެއެވެ. މީގެއިތުރުން ތިލަފުށި ކައިރީގައި ވެސް މި ކޯހުގެ ބައެއް ތަމްރީނުތައް ވަނީ ބާއްވާފައެވެ.
ވީބީއެސްއެސް ކޯސްތައް ނިންމުމަށް ބޭއްވި ރަސްމިއްޔާތުގައި އެމްއެންޑީއެފް ކޯސްޓްގާޑުގެ އިސްވެރިންގެ އިތުރުން މޯލްޑިވްސް ޕޮލިސް ސަރވިސްގެ މެރިން ޕޮލިސްގެ ހެޑް، ޗީފް ސްޕްރިންޑެންޓް އޮފް ޕޮލިސް އިބްރާހީމް އަދުނާނު ހަނީފާއި މޯލްޑިވްސް ކަސްޓަމްސް ސަރވިސްގެ ޑެޕިއުޓީ ކޮމިޝަނަރ މުޙައްމަދު މާނިއުގެ އިތުރުން ޔޫއެންއޯޑީސީގެ ހެޑް އޮފް ޕްރޮގްރާމް އޮފިސަރ، ޕައުލް ރޮބަރޓް
ބައިވެރިވެވަޑައިގެންނެވިއެވެ.