އ.ދ.ގެ ޗާޓަރާއި، އެ ޗާޓަރުގެ މަޤްޞަދުތަކާއި، އެ ޗާޓަރުގެ އުޞޫލުތަކަށް ފުރިހަމައަށް ޢަމަލުކުރުމަކީ، ދާއިމީ ޞުލްޙައެއް ކަށަވަރުކުރުމަށް އޮތް ހަމައެކަނި މަގުކަމަށް އދގެ އާއްމު މަޖިލީހުގެ ރައީސް އަދި ރާއްޖޭގެ ޙާރިޖީ ވަޒީރު އަބްދުﷲ ޝާހިދު ވިދާޅުވެއްޖެއެވެ.
އދގެ އާއްމު މަޖިލީހުގެ ރައީސްއަބްދުﷲ ޝާހިދު މިހެން ވިދާޅުވީ ހިފާފައިވާ ޔޫކްރެއިންގެ ބިންތަކާއި ގުޅޭގޮތުން، އދ.ގެ އާންމު މަޖިލީހުގައި ދެއްވި ބަޔާނުގައެވެ.
ޔޫކްރެއިންގެ މައްސަލައިގައި އދގެ އާއްމު މަޖިލީހުގައި ތަޤްރީރުކުރައްވަމުން އދގެ އާއްމު މަޖިލީހުގެ ރައީސް އަބްދުﷲ ޝާހިދު ވިދާޅުވީ އ.ދ.ގެ ޗާޓަރުގެ ފުރަތަމަ އިބާރާތުގައި ވަނީ، "ހަނގުރާމައިގެ ނުރައްކަލުން އަންނަން އޮތް ޖީލުތައް ސަލާމަތް ކުރުން" ކަމަށްވާއިރު އެއިބާރާތަކީ އ.ދ އުފެއްދުމުގެ އެންމެ ބޮޑު ހިތްވަރުވެސްކަމަށެވެ. އަދި 1945 އާއި ހަމައަށް ދުނިޔެ އައި އިރު، އެ ޖަމްޢިއްޔާގެ ފައުންޑަރުން ވަނީ އޭގެކުރިން ދުނިޔޭގައި ހިނގި ދެ ހަނގުރާމައިގެ ގެއްލުމާއި، ހަލާކާއި، ކެކުޅުމާއި، ވޭން ތަހައްމަލުކޮށްފައިކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ އ.ދ.ގެ ޗާޓަރުގެ 1 ވަނަ މާއްދާގައި، އ.ދ.ގެ މެންޑޭޓްގެ ގޮތުގައި ކަނޑައަޅާފައިވަނީ، ޞުލްޙަ މަސަލަސްކަން ނަގާލެވިދާނެ ފަދަ ދެބަސްވުންތައް ނުވަތަ ޙާލަތްތައް ޞުލްޙަވެރި މަގުން އަދި ޢަދުލު އިންޞާފާއި ބައިނަލްއަޤުވާމީ ޤާނޫނުތަކާއި، އޭގެ އުޞޫލުތަކާ އެއްގޮތްވާ ގޮތުގެ މަތިން ޙައްލުކުރުމަށްކަމަށެވެ. އެހެންކަމުން، ޤާނޫނުގެ ޙުކޫމަތާއި އެއްގޮތްވާ ގޮތުގެ މަތިން، އަމަންއަމާންކަން ދެމެހެއްޓުމަކީ، އ.ދ.ގެ އެއް މަޤްޞަދުކަން ޝާހިދު ފާހަގަކުރެއްވިއެވެ.
ޝާހިދު ވިދަޅުވީ އ.ދ.ގެ ޙަޔާތުން ވޭތުވެގެން ދިޔަ 76 އަހަރު ދުވަހުގެ ތެރޭގައި އަޅުގަނޑުމެންނަށް އެއްވެސް ފިލާވަޅެއް ލިބިފައިވާނަމަ، އެފިލާވަޅަކީ؛ ދާއިމީ ޞުލްޙައަކީ، ޢަސްކަރީ މުޢާމަލާތްތަކުން ނުވަތަ ހަނގުރާމައިން ޙާޞިލުކުރެވޭ ނުވަތަ ދެމެހެއްޓޭނެ ޞުލްޙައެއް ނޫންކަމާއި، ޙައްލު ގެނެވެން އޮތީ ސިޔާސީ ގޮތުންކަންކަމަށެވެ. އަދި އިންސާނުން ތަހައްމަލް ކުރަންޖެހޭ އަނިޔާއާއި ވޭން ކުޑަކުރުމަށާއި، ހަނގުރާމައިން ލިބިގެންދާ އިގްތިޞާދީ ނިކަމެތިކަމާއި، އަދި ހަނގުރާމައަށް ފަހު، އިޤުތިޞާދު ރުޖޫޢަކުރުމަށް އަދާކުރަންޖެހޭ ޚަރަދާއި އެތަކުލީފުން މިންޖުވެވެން އޮތް އެންމެ އެކަށޭނެ ގޮތަކީ، ހަނގުރާމައަށް މަގު ހުޅުވޭ ފިތުނަތަކުން، އެންމެ ފުރަތަމަވެސް ރައްކާތެރިވެގެން ތިބުންކަން ޝާހިދު ފާހަގަކުރެއްވިއެވެ.
"ދެބަސްވުންތައް ހައްލުކުރަން ބޭނުންވާވަސީލަތް އަޅުގަނޑުމެން ރުކުރުވާލަމާތޯ؟ ޑިޕްލޮމަސީއާއި، އިސް ފަރާތްތަކުގެ މަދަދާއި، ސުލްހައިގެ މެދުވެރިއެއްގެ ރޯލުއަދާކުރުމަށް ތިބި ފަރާތްތަކަށް އިސްކަން ދެމާތޯއެވެ؟ ޞުލްޙައަށް ޙައްޤުވާ ހުރިހާ ފުރުޞަތެއް އަޅުގަނޑުމެން ދޭމާތޯއެވެ؟" ޝާހިދު ވިދާޅުވިއެވެ.
ޝާހިދުގެ ވާހަކަފުޅުގައި އ.ދ.ގެ ޗާޓަރާއި، އެ ޗާޓަރުގެ މަޤްޞަދުތަކާއި، އެ ޗާޓަރުގެ އުޞޫލުތަކަށް ފުރިހަމައަށް ޢަމަލުކުރުމަކީ، ދާއިމީ ޞުލްޙަ އެއް ކަށަވަރުކުރުމަށް އޮތް ހަމައެކަނި މަގުކަމަށް ވިދާޅުވިއެވެ. އަދި މަޝްވަރާތައް އިތުރަށް ވަރުގަދަކޮށް، މަޝްވަރާތައް މެދުވެރިކޮށް، ހަމަ ނުޖެހުންތައް ކުޑަކުރުމަށް ހުރިހާ ފަރާތްތަކަށްވެސް ގޮވާލާކަމަށް ޝާހިދު ވިދާޅުވިއެވެ.
"އަޅުގަނޑުގެ ބަޔާން ނިންމާލާނީ، މީގެ 68 އަހަރު ކުރިން، ކުރީގެ ސެކްރެޓަރީ ޖެނެރަލް ދާގް ހަމްމަރޝްޖޯލްޑް ވިދާޅުވި ވާހަކައެއް ދަންނަވާލަމުން؛ އޭނާ ވިދާޅުވެފައި ވަނީ "އ.ދ.އަކީ އިންސާނާ ގޮވައިގެން ސުވަރުގެ އަށް ދާން އުފެއްދި ތަނެއް ނޫން، ނަމަވެސް މި މުއައްސަސާ އުފެއްދީ އިންސާނިއްޔަތު ނަރަކައިން ސަލާމަތް ކުރުމަށް" ކަމަށް" ޝާހިދު ވިދާޅުވިއެވެ.
ރަޝިޔާއާއި ޔޫކްރެއިން ހަނގުރާމައެއްގެ ތެރޭގައި އޮތްއިރު، ޔޫކްރެއިންގެ އިރުމަތީ ދެ ސަރަޙައްދެއް މިހާރު ވަނީ ރަޝިޔާގެ ކޮންޓްރޯލްގެ ދަށަށް ގެންގޮސްފައެވެ. ރަޝިޔާގެ އަމަލުތައް ދުނިޔޭގެ އެކި ކަންކޮޅުތަކުން ކުށްވެރިކުރަމުންދާއިރު، ހުޅަނގުގެ ބާރުތަކުން ދަނީ ރަޝިޔާއާ ދެކޮޅަށް ދަތިކުރުމުގެ ފިޔަވަޅުތައް އަޅަމުންނެވެ.