މިދިޔަ އޮކްޓޯބަރު މަހުގެ 19ވަނަ ދުވަހު މަރާލާފައިވާ، އައިޖީއެމްއެޗުގެ ނަރުސް، މޭރީ ގްރޭސްގެ މަރުވެފައިވާ ހަށިގަނޑުން ބާރުގަދަ އިންޖިކްޝަނެއްގެ އަސަރު ފެނިފައިވާކަމަށާ، މޭރީގެ މަރުގެ މައްސަލައިގެ ތުހުމަތުގައި ހައްޔަރުކޮށްފައިވާ ހަލީމަތު ލަމްހާގެ ގެއިން ފުލުހުން ހޯދީ އެ ބާވަތުގެ އިންޖިކްޝަންކަމަށް ދައުލަތުގެ ފަރާތުން ޝަރީޢަތުގައި ވިދާޅުވެއްޖެއެވެ.
ދައުލަތުގެ ފަރާތުން މިހެން ވިދާޅުވީ މޭރީގެ މަރުގެ މައްސަލައިގެ ޝަރިޢަތުގައި މިއަދު ކްރިމިނަލް ކޯޓުގައި ކުރިއަށްގެންދިޔަ އަޑުއެހުމުގައެވެ. މިމައްސަލާގައި ދައުލަތުން ދަޢުވާކުރަނީ މޭރީގެ ފިރިމީހާ މާވިންއާއި މާވިންގެ ދިވެހި ލޯބިވެރިޔާ ހަލީމަތު ލަމްހާ އަބްދުއްރަހްމާންގެ މައްޗަށެވެ.
މިއަދުގެ ޝަރީޢަތުގެ އަޑުއެހުމުގައި ދައުލަތުން ވިދާޅުވެފައިވަނީ މަރާލެވުނު މޭރީ ގްރޭސްގެ ލޭގެ ޓޮކްސިކޮލޮޖީ ރިޕޯޓެއް ރާއްޖެއިން ބޭރުން ތައްޔާރު ކުރުމުގެ މަސައްކަތް ކުރަމުންދާކަމަށެވެ. މިހާރު އެރިޕޯޓުގެ ޖަވާބު އަނގަބަހުން ލިބިފައިވާކަމަށާ، އެރިޕޯޓުން ދައްކާގޮތުން ސަކްސިނިއަލްކޯލިން ކިޔާ މާއްދާއެއް މެރީގެ ލޭގައި ހުރިކަން އެނގޭކަމަށް ދައުލަތުން ވިދާޅުވެއެވެ. މޭރީގެ ލެއިން ފެނުނީ ބޮޑެތި އޮޕަރޭޝަންތައް ކުރުމުގައި މީހުން ހޭނެއްތުމަށް ބޭނުންކުރާ އިންޖިކްޝަނެއްގެ އަސަރުކަމަށާ، މިމައްސާލާގައި ތުހުމަތުކުރާ ލަމްހާގެ ގެއިން ފުލުހުން ހޯދި އިންޖެކްޝަންތަކުގެ ތެރޭގައި މިބާވަތުގެ އިންޖިކްޝަންތަކާއި އިތުރު އެހެން ދެ ބާވަތެއްގެ ބާރުގަދަ އިންޖިކްޝަން ހިމެނޭކަމަށް ދައުލަތުގެ ފަރާތުން ވިދާޅުވިއެވެ.
މީގެއިތުރުން މޭރީގެ ހަށިގަނޑުން ވަނީ އިންޖެކްޝަން ޖަހާފައިހުރިކަމުގެ ނިޝާން ފެންނިފައިކަމަށާ، ލަމްހާގެ ގެއިން ފެނުނު ސަކްސިނިއަލްކޯލިން އިންޖިކްޝަނުގައި ޖުމުލަ ހުންނަންޖެހޭ 10 އެމްއެލްގެ ތެރެއިން 6 އެމްއެލް މަދުކަމަށްވެސް މިއަދު ދައުލަތުންވަނީ ޝަރީޢަތުގެ މަޖިލީހުގައި ވިދާޅުވެފައެވެ.
މިމައްސަލާގައި ލަމްހާގެ މައްޗަށް ދައުލަތުން އުފުލާފައިވާ އެއް ދަޢުވާއަކީ އެނގިހުރެ މީހަކު މެރުމުގައި ބައިވެރިވުމުގެ ދަޢުވާއެވެ. އެ ދަޢުވާ އޭނާގެ މައްޗަށް ކުރަނީ މޭރީ މަރާލުމުގައި އެހީތެރިވެދީ، މޭރީ މަރާލުމަށް ރޭވި ރޭވުމުގައި ބައިވެރިވެ އެޢަމަލު ހިންގުމަށް މާވިންނަށް މަގުފަހިކޮށްދީފައިވާކަމުގެ ތުހުމަތުގައެވެ.
ލަމްހާގެ މައްޗަށް ކުރާ އަނެއް ދެ ދަޢުވާގައި ވަނީ އޭނާ ދިރިއުޅޭގެ ކޯޓު އަމުރެއްގެ ދަށުން ބަލާ ފާސްކުރިއިރު އޭނާގެ ކޮޓަރި ތެރެއިން އައިޖީއެމްއެޗްގެ ހުއްދައަކާ ނުލައި އެ ހޮސްޕިޓަލުން ބޭރަށް ގެންދިޔުން މަނާ އިންޖެކްޝަންތަކެއް ފެނިފައިވާކަމަށެވެ. އަދި ހޮސްޕިޓަލުން ބޭރަށް ގެންދިޔުން މަނާ ބޭސްތަކެއްވެސް ލަމްހާގެ ކޮޓަރިން ފެނިފައިވާކަމަށްވެސް އެ ދައުވާގައިވެއެވެ.
މިމައްސަލާގައި ދަޢުވާ އުފުލާފައިވާ މާވިންގެ ޝަރީއަތުގެ އަޑުއެކުމެއްވެސް މިއަދު އޮތެވެ. ލަމްހާއާ މިދެމީހުންގެ ޝަރީޢަތުގެ އަޑުއެހުންތައް ކުރިއަށްގެންދަނީ ވަކިވަކިންނެވެ. ޝަރީޢަތް ނިމެންދެން މާވިން ބަންދުގައި ބަހައްޓަން ކޯޓުންވަނީ ކުރިން އަމުރުކޮށްފައެވެ. އަދި ލަމްހާ ވެސް ޝަރީއަތް ނިމެންދެން ބަންދުކުރަން މިއަދު ކޯޓުން ވަނީ އަމުރުކޮށްފައެވެ.
އޮކްޓޯބަރު މަހުގެ 19ވަނަ ދުވަހު މަރާލި މޭރީގެ މަރުގެ މައްސަލަ ފުލުހުން ތަޙުގީގުކުރަން ފެށީ، އެޙާދިސާއާ ގުޅިގެން އާދަޔާ ޚިލާފައި ކަންތައްތަކެއް ފާހަގަކުރެވިގެންނެވެ. އޭނާ މަރުވެގެން ހޮސްޕިޓަލަށް ގެންގޮސްފައިވަނީ އޭނާގެ ފިރިމީހާއެވެ. އޭރު އޭނާ ބުނީ މޭރީ ދަންޖެހިގެން އަމިއްލައަށް މަރުވީކަމަށެވެ. މޭރީގެ މަރުގެ މައްސަލާގައި ހެދި ޕޯސްޓްމޯޓަމް ރިޕޯޓްގައި ވާގޮތުން މޭރީ މަރާލާފައިވަނީ ނޭވާ ހާސްކޮށްލައިގެންނެވެ. މޭރީގެ އިތުރުން މާވިންއާއި ލަމްހާވެސް މަސައްކަތް ކުރަމުންދިޔައީ އައިޖީއެމް ހޮސްޕިޓަލްގައި ނަރުހެއްގެ ގޮތުގައެވެ.