ރިސޯޓްތަކުގައި މަސައްކަތްކުރާ މުވައްޒަފުންގެ ތެރެއިން 1 ލައްކައަށްވުރެ ގިނަ މުވައްޒަފުން ބޫސްޓަރ ޑޯޒް ޖަހައިފިއެވެ.
ކޯވިޑުން ރައްކާތެރިވުމަށް ޖަހާ 3 ވަނަ ޑޯޒް ނުވަތަ ބޫސްޓަރ ޑޯޒް އާންމުކޮށް ހުޅުވާލައިގެން ރާއްޖޭގައި ޖަހަން ފަށާފައިވަނީ މިދިޔަ މަހުގެ 15 ވަނަ ދުވަހުއެވެ. މިއާއެކު ބޫސްޓަރ ޑޯޒް ޖެހުމަށް ޝަރުތުހަމަވާ ހުރިހާ ފަރާތްތަކަށް މިހާރު ރާއްޖޭގައި އަންނަނީ ބޫސްޓަރ ޑޯޒް ޖަހަމުންނެވެ.
ރާއްޖޭގެ ރިސޯޓްތަކުގައި މަސައްކަތްކުރާ މުވައްޒަފުންނަކީ ފަތުރުވެރިންނާއި އެންމެ ގާތުން މަސައްކަތްކުރާ މީހުންނެވެ. އެހެންކަމުން ކޯވިޑަށް ހުށައެޅުމުގެ ފުރުސަތު ރިސޯޓް މުވައްޒަފުންނަށް ބޮޑެވެ. މިއާއެކު ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންނަށް ޚާއްސަ އިސްކަމެއްދީގެން އަންނަނީ ވެކްސިން ޖެހުމުގެ މަސައްކަތް ކުރަމުންނެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން މިމަހުގެ 16 ވަނަ ދުވަހާއި ހަމައަށް ރިސޯޓްތަކުގައި މަސައްކަތްކުރާ މުވައްޒަފުންގެ ތެރެއިން 114،039 މީހަކު ވަނީ ކޯވިޑްގެ ބޫސްޓަރ ޑޯޒް ޖަހާފައެވެ. މިއީ ރިސޯޓްތަކުގައި މަސައްކަތްކުރާ މުވައްޒަފުންގެ %40 އެވެ.
ރިސޯޓް މުވައްޒަފުންގެ ބޮޑު އިންސައްތައެއް މިހާރު ވަނީ ވެކްސިންގެ ފުރަތަމަ ޑޯޒް ފުރިހަމަކޮށްފައެވެ. އެގޮތުން ރިސޯޓް މުވައްޒަފުންގެ %99.6 މީހުން ވެކްސިންގެ ފުރަތަމަ ޑޯޒް ވަނީ ޖަހާފައެވެ. މިއީ 398،026 މީހުންނެވެ. ވެކްސިންގެ 2 ޑޯޒް ފުރިހަމަ ކޮށްފައިވަނީ %97.5 މީހުންނެވެ. މިއީ މުޅި ޖުމްލަ 370،639 މީހުންކަމަށް ޓޫރިޒަމް މިނިސްޓްރީގެ ތަފާސްހިސާބުތައް ދައްކައެވެ.
ރާއްޖޭގައި ބޫސްޓަރ ޑޯޒްގެ ގޮތުގައި ދެނީ ފައިޒަރ ވެކްސިނެވެ. ރާއްޖޭގައި މުޅި ޖުމްލަ 152 ރިސޯޓެއް އޮޕަރޭޓްކުރަމުން ދެއެވެ. މި 152 ރިސޯޓްގައި މުޅި ޖުމްލަ 41431 އެއްހާ މުވައްޒަފުން މަސައްކަތްކުރެއެވެ.