ދައުލަތުގެ އިދާރީ ހިންގުމުގެ ތެރޭގައި ހާމަކަން އިތުރުކުރުމުގެ ސަބަބުން ކޮރަޕްޝަނަށް ހުރި ދޮރުތައްވެސް ބަންދުވެގެންދާނެކަމަށް ޕްރޮސެކިއުޓަރ ޖެނެރަލް ހުސައިން ޝަމީމު ވިދާޅުވެއްޖެއެވެ.
ޝަމީމް މިހެން ވިދާޅުވީ ޕްރޮސެކިއުޓަރ ޖެނަރަލްގެ އޮފީހުން މިދިޔަމަހުގެ ކުރި މަސައްކަތްތަކުގެ ތަފާސް ހިސާބު އާއްމުކުރައްވަމުންނެވެ.
ޕްރޮސެކިއުޓަރ ޖެނަރަލް ހުސައިން ޝަމީމް ވިދާޅުވީ ކޮންމެ މަހެއްގެ ތެރޭގައި ޕީޖީ އޮފީހުން ކުރާ މަސައްކަތްތަކާއި ގުޅޭ މައުލޫމާތު ހިއްސާކުރުމަށް ނިންމާފައިވާކަމަށެވެ. އޭގެ ތެރޭގައި ޖިނާއީ ޢަދުލުގެ ނިޒާމުގައި ޕީޖީ އޮފީހުގެ މަސައްކަތާ ގުޅިގެން ކުރެވުނު ކަންތައްތަކާއި، ނުކުރެވި ހުރި ކަންތައްތަކާއި، ނަތީޖާ ނެރެވުނު ގޮތާއި ނުނެރެވި ހުރި ދާއިރާތައް ހިއްސާކުރާ މައުލޫމާތު ހިމެނެއެވެ. މިކަމުގެ ސަބަބުން ޖިނާއީ ޢަދުލުގެ ނިޒާމުގައި މަސައްކަތްކުރާ ހުރިހާ އިދާރާތައް ޖަވާބުދާރީކުރުވަން މަގު ފަހިވެގެންދާނެއެވެ.
"އަޅުގަނޑު ޕްރޮސިކިއުޓަރ ޖެނެރަލްގެ މަޤާމާ ހަވާލުވީއްސުރެ ތަފާސް ހިސާބާއި ނަންބަރަށް ބަލައިގެން ސިޔާސަތު ބައްޓަންކުރަން އެބަ މަސައްކަތްކުރަން. މިކަމަށް ބޭނުންވާ މައުލޫމާތު ހޯދޭނެ ގޮތަށް، އޮފީހުގެ އެތެރޭގެ ނިޒާމުތައް ވަނީ ބަދަލުކުރެވިފައި" ޕްރޮސިކިއުޓަރ ޖެނެރަލް ހުސައިން ޝަމީމު ވިދާޅުވިއެވެ.
ޕީޖީ އޮފީހުން ބުނީ މި މަސައްކަތަށް ވަގުތާއި ފައިސާ އިންވެސްޓް ކުރަމުންދާތާ އަހަރެއްހާ ދުވަސްވެއްޖެކަމަށެވެ. އެގޮތުން މި މަސައްކަތް ދާއިމީ ސިފައެއްގައި ކުރެވޭނެގޮތަށް، މިހާރު އަންނަނީ މުވައްޒަފުންވެސް ތަމްރީނުކުރަމުންކަމަށާއި، ނޭޝަނަލް ބިއުރޯ އޮފް ސްޓެޓިސްޓިކްސްއާއި ޔުނިސެފުގެ އެހީތެރިކަމާއެކު މުވައްޒަފުން މިހާރު ދަނީ ތަމްރީނުވަމުންކަން ޝަމީމް ފާހަގަކުރެއްވިއެވެ.
ޝަމީމް ވިދާޅުވީ މިމަސައްކަތުގެ ސަބަބުން ޖިނާއީ ޢަދުލުގެ ނިޒާމަށް ރައްޔިތުން ކުރާ އިތުބާރު އިތުރުވެގެން ދާނެކަމަށެވެ. އަދި ޓްރާންސްޕޭރަންސީގެ ޒަރީޢާއިން މެނުވީ ރައްޔިތުންގެ އިތުބާރެއް ނުލިބޭނެކަމަށް ޝަމީމް ވިދާޅުވިއެވެ. ޝަމީމް ވިދާޅުވީ ދައުލަތުގެ އިދާރީ ހިންގުމުގެ ތެރޭގައި ހާމަކަން އިތުރުކުރުމުގެ ސަބަބުން ކޮރަޕްޝަނަށް ހުރި ދޮރުތައްވެސް ބަންދުވާނެކަމަށެވެ. އަދި ތަފާސް ހިސާބާއި މަޢުލޫމާތުގެ އަލީގައި ރިޝްވަތާއި ކޮރަޕްޝަން މަދުކުރެވޭނެކަމަށް ޝަމީމް ފާހަގަކުރެއްވިއެވެ.
"މިސާލަކަށް، ދައުލަތުގެ މުވައްޒަފަކު، ވަކި ދުވަހަކު ވަކި ކަމެއް ކުރަން އޮވެފައި، އެދުވަހުގެ ކުރިން ދުވަހަކުވެސް އެކައުންޓަށް ފައިސާ ޖަމާ ނުކުރާ މީހެއްގެ ފަރާތުން، ދައުލަތުގެ މުވައްޒަފުގެ އެކައުންޓަށް، މިދެންނެވި ދުވަހު ފައިސާ ވަދެއްޖެނަމަ، އެކަމުގައި ކޮރަޕްޝަން ހިމެނޭކަމަށް ބެލިދާނެ. މަޢުލޫމާތު ހާމަކުރާނަމަ، މިކަންކަމަކީ ފާހަގަވާނެ ކަންކަން" ޝަމީމް ވިދާޅުވިއެވެ.
ކޮންމެ މަހަކު ޕީޖީ އޮފީހުގެ މަސައްކަތްތަކާއި ގުޅޭ މައުލޫމާތު ހަމަކުރައްވާނެކަމަށް ޝަމީމް ވިދާޅުވިއިރު، އެމަޢުލޫމާތުތައް ހާމަކުރުމަށް، އެމަނިކުފާނު ބޭނުންވާ ސޮފްޓްވެއަރ އަދި ނުލިބޭކަމަށް ޝަމީމް ވިދާޅުވިއެވެ. އެހެންކަމުން، މިދިޔަމަހުގެ ތަފާސް ހިސާބުތައް މަހު މި ހާމަކުރާނީ، ޕީޖީ އޮފީސް ވެބްސައިޓުގައި، މައިކްރޯސޮފްޓް އެކްސަލްގައިކަމަށް ޝަމީމް ވިދާޅުވިއެވެ.
ޝަމީމް ވިދާޅުވީ އޭނާގެ އުއްމީދަކީ، މިހިސާބުތަކަކީ، ސިޔާސަތު ހައްދަވާ ބޭފުޅުންނާއި، ކިޔަވާ ކުދިންނާއި ނޫސްވެރިންނަށް ބޭނުންތެރި އެއްޗަކަށްވުންކަމަށެވެ. އަދި ޕީޖީ މަސައްކަތްކުރާ ގޮތާއި ފެންވަރު ޢާންމުންގެ ކުރިމަތީގައި ވަޒަންކުރެވި، ފެންވަރު ރަނގަޅު މަސައްކަތެއް ކުރުމަށް މިކަމުގެ ސަބަބުން ބާރުއެޅޭނެކަމަށް ޝަމީމް ވިދާޅުވިއެވެ.