ސްރީ ލަންކާއިން ގެއްލިގެން ހޯދަމުން ދަނިކޮށް، މަރުވެފައި އޮއްވައި ފެނުނު އަފްހާމް ނަސީރުގެ ޕޯސްޓްމޯޓެމް ހަދައި އޭނާގެ ޖަނާޒާ މިރޭ ބާއްވަން ނިންމައިފިއެވެ.
އޭނާ މަރުވެފައި އޮއްވާ ފެނުނީ މިމަހުގެ 5ވަނަ ދުވަހު ވެއްލަވައްތަގެ ގޮނޑުދޮށުންނެވެ. ހަށިގަނޑު ފެނުނުއިރު ޒަޚަމްތަކެއް ވެސް ހުރި ކަމަށްވެއެވެ. ފުލުހުން ވިދާޅުވީ ލަންކާގައި ނިޔާވެފައިވާ ދިވެހި ޒުވާނާގެ ޕޯސްޓްމޯޓަމް މިއަދު ހަދާފައިވާކަމަށެވެ. އަދި ދިވެހި ފުލުހުންގެ ފަރާތުން ލަންކާގައި ހަރަކާތްތެރިވަމުންދާ ޓީމަށް ލަންކާގެ ފުލުހުން މައުލޫމާތު ޚާއްސާކޮށް އެހީތެރިކަން ފޯރުކޮށްދެމުންދާކަމަށާ، ޢާއިލާގެ ފަރާތުން އަންނަނީ މިރޭގެ ވަގުތެއްގައި ޖަނާޒާގެ ކަންކަން ކުރިއަށް ގެންދިއުމަށް މަސައްކަތްކުރަމުންކަމަށް ފުލުހުން ވިދާޅުވެއެވެ.
ދިވެހި ފުލުހުންގެ ކްރައިމް އިންވެސްޓިގޭޝަން ކޮމާންޑްގެ ސީނިއާ އޮފިސަރަކާއި ފުލުހުންގެ އިންވެސްޓިގޭޓަރެއް އަންނަނީ ލަންކާއަށް ގޮސް މިތަހުގީގުގައި އެހީތެރިކަން ފޯރުކޮށްދެމުންނެވެ. އަދި ލަންކާ ފުލުހުން ކުރިޔަށް ގެންދާ ތަހުގީގުގައި ދިވެހި ފުލުހުން ވެސް ބައިވެރިވާނެއެވެ.