ބައްދަލުވުމަށް ޙާޒީރުވާން ވަޒީރުން ދެކޮޅުހެދުމުން ތައިލޭންޑުގެ ބޮޑުވަޒީރަށް އިތުރު ހާސްކަމެއް
ތައިލޭންޑުގެ ވަޒީރުންގެ މަޖިލީހުގެ ބައްދަލުވުމަކަށް އެ ޤައުމުގެ ބައެއް ވަޒީރުން ޙާޒިރުވާން ދެކޮޅު ހެދުމުން އެ ޤައުމުގެ ބޮޑުވަޒީރު ޕުރަޔުތު ޗަން އޯޗާއަށް އިތުރު ހާސްކަމަކާ ކުރިމަތިލައްވަން ޖެހިވަޑައިގެންފިއެވެ.
ވަޒީރުންގެ މަޖިލީހުގެ ބައްދަލުވުމަކަށް ޙާޒިރުވާން ދެކޮޅު ހަދާފައިވަނީ އެ ޤައުމުގެ އިއްތިޙާދީ ސަރުކާރުގައި ހިމެނޭ 18 ޕާޓީގެ ތެރެއިން ދެވަނައަށް އެންމެ ބޮޑު ޕާޓީއަށް ނިޞްބަތްވާ ހަތް ވަޒީރުންނެވެ. ތައިލޭންޑުގެ ސަރުކާރުގެ ތެރޭގައި މައްސަލަތައް އިތުރުވެފައިވަނީ ބައިބައިވުމާއި ހަމަނުޖެހުން އުފައްދަން މަސައްކަތްކުރާކަމަށް ބުނެ ވެރިކަންކުރާ އިއްތިޙާދުގައި ހިމެނޭ ޕާޓީއެއް ބޭރުކޮށްފައިވަނިކޮށެވެ. އެ ޕާޓީ ބޭރުކުރުމުން ތައިލޭންޑުގެ ޤާނޫނުހަދާ މަޖިލީހުގެ 21 ގޮނޑިވަނީ ސަރުކާރަށް ގެއްލިފައެވެ.
ތައިލޭންޑުގެ ވެރިކަންކުރާ އިއްތިޙާދުގެ ތެރޭގައި މައްސަލަތަކެއް އުފެދުނީ އެ ޤައުމުގެ ވެރިރަށް ބެންކޮކުގެ ރޭލުތައް ހިންގުމަށް ބީޓީއެސް ގުރޫޕު ހޯލްޑިންގްސަށް ދީފައިވާ ޙުއްދަ އިތުރު 30 އަހަރަށް އިތުރުކުރުމަށް ސަރުކާރުން މަސައްކަތް ފެށުމުންނެވެ. ވެރިކަންކުރާ އިއްތިޙާދުގެ ތެރޭގައި މައްސަލަ ބޮޑުވުމުން ބެންކޮކުގެ ރޭލުތައް ހިންގުމަށް ދޭން އުޅުނު ޙުއްދައާ ގުޅޭގޮތުން އަލުން މަޝްވަރާކުރުމަށް ތައިލޭންޑުގެ ވަޒީރުންގެ މަޖިލީހުންވަނީ ނިންމައިފައެވެ.
ބައެއް ވަޒީރުން ފާޅުގައި ޕުރަޔުތާ ދެކޮޅަށް ޢަމަލުކުރަން ފެށުމުން އޭނާގެ ދަޢުރުގެ އެންމެ ފަހު 12 މަސްދުވަހުގެ ތެރޭގައި އިތުރު މައްސަލަތައް ފެންމަތިވާނެކަމަށްވަނީ ބެލެވިފައެވެ. އޭގެ އިތުރުން ޤާނޫނުހަދާ މަޖިޅީހުގެ ތެރެއިންވެސް ޕުރަޔުތާ ދެކޮޅަށް މަސައްކަތްކުރުމުގެ ރޫޙެއްވަނީ ފެށިފައެވެ. އެ ގޮތުން އެކަށީގެންވާ ޢަދަދަށް މެންބަރުން ޙާޒިރުނުވުމުން ޤާނޫނުހަދާ މަޖިލީހުގެ ޖަލްސާތައް ބާއްވައި ސަރުކާރުން ބޭނުންވާ ޤާނޫނުތައް ފާސްކުރުމަށްވެސްވަނީ ދަތިވެފައެވެ.