މާދަމާ ބަނގްލަދޭޝްގައި ފަށާ ބަންގްބަންދު ގޯލްޑްކަޕްގައި ވާދަކުރާ ރާއްޖޭގެ ޓީމް ޒުވާން ކުޅުންތެރިން ހިމަނައިގެން ފައިނަލްކޮށްފިއެވެ. ރާއްޖޭގެ ޓީމްގައި ހިމެނޭ އެކާވީސް ކުޅުންތެރިންގެ ތެރޭގައި ތިރީސް އަހަރުން މަތީގެ ހިމެނެނީ އެންމެ ކުޅުންތެރިއެކެވެ. ރާއްޖޭގެ ޓީމްގެ އެވްރެޖް އުމުރު އުޅެނީ ފަންސަވީސް އަހަރުން ދަށުގައެވެ. ސާފް ޗެމްޕިއަންޝިޕް ސްކޮޑުން ފުރުޞަތު ނުލިބޭ ޒުވާން ގިނަ ކުޅުންތެރިންތަކެއް މިފަހަރުގެ ސްކޮޑްގައި ހިމަނާފައިވެއެވެ. އެކުޅުންތެރިންނަކީ ޓީސީގެ މުރުތަލާ އަދުނާން، ނިއުރޭޑިއަންޓްގެ އާދަމް އިޝާމް، އަހުމަދު ސުހެއިލް، ޓީސީގެ އަބުދުﷲ ފަޔާޒު، މާޒިޔާގެ ޤާސިމް ސަމާމް، އީގަލްސްގެ ހުސެއިން ސިފާއު ޔޫސުފް، މާޒިޔާގެ އިބްރާހީމް ހަސީބު، ޓީސީގެ އިބްރާހީމް ވަހީދު ހަސަން އަދި މާޒިޔާގެ މުޙައްމަދު ސާއިފްއެވެ. އެކި ސަބަބުތަކާހުރެ ސާފް ޗެމްޕިއަންޝިޕް ސްކޮޑުން އުނިވި ކުޅުންތެރިންނަކީ ކެޕްޓަން އަލީ އަޝްފާޤް، ކީޕަރު އިމްރާން މުޙައްމަދު، ޑިފެޑަރުންކަމަށްވާ އަމްދާން އަލީ، ޝާފިއު އަހުމަދު، ސަމްދޫހު މުޙައްމަދު، މިޑްފީލްޑަރ މުޙައްމަދު އާރިފް އަދި ފޯވާޑް އަސަދުﷲ އަބުދުﷲއެވެ. މީގެއިތުރުން އެސިސްޓެންޓް ކޯޗު އަސްއަދު އަބުދުލްޣަނީއާއި، ގޯލްކީޕަރ ޓްރޭނަރ އަސްލަމް އަބުދުއްރަހީމް ވަނީ ޓީމުން އިސްތިއުފާދީފައެވެ.