ޖަރުމަނު ބުންޑަސްލީގާގައި އެންމެފަހުގެޗެމްޕިއަން ބަޔާން މިޔުނިކާއި އާރްބީ ލިޕްޒިގް ބައްދަލުކުރިމެޗް ބަޔާން ކާމިޔާބުކޮށް ޕޮއިންޓް ތާވަލްގައި 9 ޕޮއިންޓްގެ ލީޑެއް ނަގައިފިއެވެ. ބަޔާންގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ 3 ލަނޑު 2 ލަނޑުންނެވެ.
މިމެޗްގެ ފުރަތަމަ ލަނޑު މެޗްގެ 12 ވަނަ މިނެޓްގައި ޖަހައި ލީޑު ނެގީ ބަޔާންއިންނެވެ. މިލަނޑު އެޓީމަށް ޖަހައިދިނީ ތޯމަސް މުލަރއެވެ. ނަމަވެސް ލިޕްޒިގުން ވަނީ މެޗްގެ 27 ވަނަ މިނެޓްގައި އަންޑްރޭ ސިލްވަރ ޖަހައިދިން ލަނޑާއެކު މެޗްގެ ނަތީޖާ ހަމަހަމަކޮށްފައެވެ. މިމެޗްގައި ބަޔާންއިން ދެވަނަ ފަހަރަށް ލީޑު ނެގީ މެޗްގެ 44 ވަނަ މިނެޓްގައި ރޮބަޓް ލެވަންޑޯސްކީ ޖަހައިދިން ލަނޑުންނެވެ. މިމެޗްގައި ދެވަނަ ފަހަރަށް ލިޕްޒިގުން މެޗްގެ ނަތީޖާ ހަމަހަމަ ކުރީ މެޗްގެ 53 ވަނަ މިނެޓްގައި ކްރިސްޓޮފަރ އެންކުންކޫ ޖަހައިދިން ލަނޑުންނެވެ. މިމެޗުން ބަޔާން މޮޅުވި ލަނޑަކީ ލިޕްޒިގްގެ ޖޮސްކޯ ގްވާޑިއޯލް އަތުން ބައިކޮޅަށް ވަން ލަނޑެކެވެ. މިމެޗަކީ ބަޔާންގެ ކީޕަރ މެނުއަލް ނޯޔަރ ބުންޑަސްލީގާގައި މޮޅުވި 310 ވަނަ މެޗެވެ. މިއާއެކު އޭނާ ވަނީ ބަޔާންގެ ކުރީގެ ގޯލް ކީޕަރ އޮލިވަރ ކާންގެ ރިކޯޑާއި އަރާ ހަމަކޮށްފައެވެ.
މިކާމިޔާބީއާއެކު ބަޔާންއަށް މިހާރު މިވަނީ 21 މެޗުން ލިބިފައިވާ 52 ޕޮއިންޓާއެކު ޕޮއިންޓް ތާވަލްގައި 9 ޕޮއިންޓްގެ ލީޑެއް ލިބިގެން ގޮސްފައެވެ. ނަމަވެސް ބަޔާން ވަނީ ދެވަނައިގައި އުޅޭ ބޮރޫޝިއ ޑޯޓްމުންޑަށް ވުރެ އެއްމެޗް އިތުރަށް ކުޅެފައިކަމުން މިފަރަގު 6 ޕޮއިންޓަށް ކުޑަކުރުމުގެ ފުރުސަތު ޑޯޓްމުންޑަށް ލިބިގެން ވެއެވެ.