މެލޭޝިޔާގެ ކުރީގެ ބޮޑުވަޒީރު މަހާތީރު މުހަންމަދު، އަދިވެސް ފަރުވާ ހޯއްދަވަމުން ގެންދަވާ ކަމަށާ، ނަމަވެސް އަމިއްލަ ގެކޮޅަށް ވަޑައިގަތުމުގެ ހުއްދަ އޭނާއަށް ދީފައިވާ ކަމަށް އޭނާގެ އޮފީހުން ބުނެފިއެވެ. މަހާތިރު ފަރުވާ ހޯއްދަވަމުން ގެންދަވަނީ ނޭޝަނަލް ހާޓް އިންސްޓިޓިއުޓްގައެވެ.
އުމުރުފުޅުން 96 އަހަރުގެ މަހާތީރު، ފެބްރުއަރީ މަހުގެ 2ވަނަ ދުވަހުން ފެށިގެން ފިޒިއޮތެރަޕީއަށާއި އިތުރު ފަރުވާއަށް ހޮސްޕިޓަލަށް ވަޑައިގަތުމަށް ޝަރުތުކޮށް، އެނބުރި ވަޑައިގަތުމުގެ ހުއްދަ ދީފައިވާކަމަށް އޭނާގެ އޮފީހުން ނެރުނު ބަޔާނެއްގައި ވެއެވެެ. އަދި އެއްވެސް ވަރަކަށް އިތުރު މީހުން އެގެއަށް ޒިޔާރާތް ނުކުރުމަށް ހޮސްޕިޓަލުން ނަސޭޙަތްތެރިވެފައިވާކަމަށްވެސް އެ ބަޔާނުގައިވެއެވެ.
ވީޑިއޯ މެސެޖެއްގައި މަހާތީރު ވިދާޅުވީ، އޭނާ އަދި މުޅިން ރަނގަޅު ނުވާކަމަށެވެ. އަދިވެސް ވަކި ޕްރޮސީޖރތަކެއް ފުރިހަމަ ކުރަން ޖެހޭތީ ގޭގައި ދުވާލު ހޭދަކުރުމަށްފަހު ހަވީރު އެނބުރި ހޮސްޕިޓަލަށް ވަޑައިގަންނަވަން ޖެހޭކަމަށް މަހާތިރު ވިދާޅުވިއެވެ.
މެލޭޝިއާގެ ނޭޝަނަލް ހާޓު އިންސްޓިޓިއުޓުގައި މަހާތިރު އެޑްމިޓްކޮށްފައިވަނީ ޖަނަވަރީ މަހުގެ 8ވަނަ ދުވަހުއެވެ. މިދިޔަ ޑިސެންބަރު މަހުގެ 16ވަނަ ދުވަހުވެސް އެ ހޮސްޕިޓަލުގައި މަހާތިރު އެޑްމިޓްކޮށްފައިވެއެވެ. މަހާތިރަށް ތަފާތު ޞިއްޙީ މައްސަލަތަކާވަނީ ކުރިމަތިލައްވަން ޖެހިވަޑައިގެންފައެވެ. އޭނާވަނީ ހިތުގެ ގިނަ އޮޕަރޭޝަންތަކެއް ކުރައްވާފައެވެ.
މެލޭޝިޔާގެ ކުރީގެ ބޮޑުވަޒީރުކަން އެންމެ ދިގު މުއްދަތަކަށް ކުރައްވާފައިވަނީ މަހާތިރެވެ. އޭނާވަނީ 1981ވަނަ އަހަރުން 2003ވަނަ އަހަރަށް މެދުނުކެނޑި ބޮޑުވަޒީރުކަން ކުރައްވައިފައެވެ. އަދި 2018ވަނަ އަހަރުގެ ތެރޭގައި އޭނާވަނީ އަލުން ބޮޑުވަޒީރުކަމާ ޙަވާލުވެވަޑައިގެންފައެވެ. ނަމަވެސް ވެރިކަންކުރާ އިއްތިޙާދުގައި ޖެހުނު މައްސަލަތަކަށްފަހު އޭނާވަނީ ބޮޑުވަޒީރުކަމުން އިސްތިޢުފާދެއްވައިފައެވެ. އޭނާއަކީ އަދިވެސް މެލޭޝިޔާގެ ސިޔާސީ މަޞްރަޙުގައި ނުފޫޒުގަދަ ބޭފުޅެކެވެ.