މާޒިޔާ ސްޕޯޓްސް އެންޑް ރެކްރިއޭޝަންގެ ހެޑް ކޯޗުގެ މަގާމަށް ސާބިއާގެ މަޔޮޑްރަގް ޖެސިކް ހަމަޖައްސައިފިއެވެ. މަޔޮޑްރަގަކީ ޔޫރަޕާއި އޭޝިއާގެ މަތީ ފަންތީގައި މަސައްކަތް ކޮށްފައިވާ ކޯޗެެކެވެ.
މާޒިޔާގެ ކޯޗުގެ މަގާމު ހުސްވީ ދާދި ފަހުން ނިމުނު ޕްރެޒިޑެންޓްސް ކަޕަށް ފަހު މާޒިޔާގެ ކޯޗަކަށް ހުރި މުހައްމަދު ޝިޔާޒް (މޯހަން) މަގާމުން ވަކިކުރުމުންނެވެ. ޖެސިކް މާޒިޔާގެ ކޯޗަކަށް ހަމަޖެއްސުމުގެ ކޮންޓްރެކްޓުގައި ސޮއިކުރީ ގަލޮޅު ދަނޑުގައި ބޭއްވި ޚާއްޞަ ރަސްމިއްޔާތެއްގައެވެ.
މާޒިޔާ އިން ވަނީ ޖެސިކްގެ އިތުރުން ސާބިއާގެ ފިޓްނަސް ކޯޗެއް ވެސް ގެނެސްފައެވެ. އެއީ ސާބިއާގެ އިތުރުން އެކި ގައުމުތަކުގައި ފުޓްބޯޅަ އާއި އެހެން ކުޅިވަރުތަކުގައި ވެސް ފިޓްނަސް ކޯޗެއްގެ ގޮތުގައި މަސައްކަތްކޮށްފައިވާ ގޯރާން ގުޒިޖާނެވެ. އޭނާ އާންމުކޮށް މަސައްކަތްކޮށްފައި ހުރީ ކޯޗު ޖެސިކާ އެކުގައެވެ. ޖެސިކް، 63، އަކީ ފުރަތަމަ ޑިވިޝަނުގައި މާޒިޔާ އަށް ކޯޗުކޮށްދޭނެ ބިދޭސީ ތިން ވަނަ ކޯޗެވެ. މާޒިޔާ އަށް މީގެ ކުރިން ފުރަތަމަ ޑިވިޝަނުގައި ދެ ފަހަރެއްގެ މަތިން މެސެޑޯނިއާގެ ކޯޗު މަރުޖާން ސެކުލޮސްކީ ކޯޗުކޮށްދީފައިވެއެވެ. އަދި މިދިޔަ ސީޒަނުގެ މެދުތެރެއިން މާޒިޔާގެ ކޯޗުކަމާ ހަވާލުވީ ސާބިއާގެ ރިސްޓޯ ވިޑަކޮވިޗެވެ. މާޒިޔާއާ މިއަދު ހަވާލުވި، ޖެސިކް ކޯޗިން ކެރިއަރު ފެށީ 1997 ވަނަ އަހަރު ސާބިއާގެ ރެޑްނިކީ އިންނެވެ. އޭގެ ފަހުން ސާބިއާގެ އޯއެފްކޭ ބައޮގްރަޑާއި ޕާޓީޒަން އަށް ކޯޗުކޮށްދީފައިވެއެވެ. އަދި ޓިއުނީޝިއާގެ ސީއެސް ސްފަޒިއޭންއާ ހަވާލުވެ، އެއް އަހަރު އެ ޓީމަށް އިރުޝާދުދީފައިވެއެވެ.
މިދިޔަ 15 ވަރަކަށް އަހަރަށް ބަލާއިރު، ޖެސިކް ވަނީ އީރާނާއި ޔޫއޭއީ، މޮންޓެނީގްރޯ، ޗައިނާ، ލީބިޔާ، މިޔަންމާ އަދި ސައުދީ އަރަބިއްޔާގައި ކޯޗިންގެ މަސައްކަތްތަކެއް ކޮށްފައެވެ. ކޯޗިންގައި ޖެސިކްގެ ކާމިޔާބީތަކަށް ބަލާއިރު، އީރާނުގެ ސްފަޒިއޭން އަށް 2000 ވަނަ އަހަރު އަރަބް ޗެމްޕިއަންސް ލީގު ވަނީ ކާމިޔާބު ކޮށްދީފައެވެ. ސީއެސްކޭއޭ ސޯފިއާ އަށް ބަލްގޭރިއާ ލީގާއި ކަޕް 2005 އާއި 2006 ވަނަ އަހަރު ކާމިޔާބު ކޮށްދީފައިވެއެވެ. އޭގެ ފަހުން ބަލްގޭރިއާގެ ލިޓެކްސް ލޮވެކަށް ބަލްގޭރިއާ ސުޕަ ކަޕާއި ބަލްގޭރިއާ ކަޕް ކާމިޔާބު ކޮށްދީފައިވެއެވެ. މާޒިޔާ، ފުރަތަމަ ޑިވިޝަންގައި 2006 އިން ފެށިގެން ވާދަކުރަން ފެށި ފަހުން އެ ޓީމުގައި ޖުމްލަ ހަ ކޯޗުން ވަނީ އެކި ފަހަރު މަތިން މަސައްކަތް ކޮށްފައެވެ.
ފުރަތަމަ ޑިވިޝަނުގައި މާޒިޔާ އަށް އެންމެ ފުރަތަމަ ކޯޗުކޮށްދިނީ އިސްމާއިލް މަހްފޫޒް (އިންމަ)އެވެ. އިންމަ ވަނީ 2014 ވަނަ އަހަރުގެ ލީގުގެ ކުރިކޮޅުގައި މާޒިޔާ އިން ވަކިވެފަ. ދެން މާޒިޔާއާ ހަވާލުވީ ރާއްޖޭގެ އެންމެ ކާމިޔާބު އެއް ކޯޗު އަލީ ސުޒޭނެވެ. ސުޒޭން ވަނީ 2016 ވަނަ އަހަރުގެ ސީޒަންގެ ނިޔަލަށް މާޒިޔާ އަށް ކޯޗުކޮށްދީފައެވެ. ޖެސިކް، މާޒިޔާގެ ކޯޗުކަމަށް ހަވާލުވެ، އޭނާ ކުރިމަތިލާނެ ފުރަތަމަ މުބާރާތަކީ މި މަހު 16 ވަނަ ދުވަހު ފަށާ ދިވެހި ޕްރިމިއާ ލީގެވެ. އަންނަ މެއި މަހު މާޒިޔާ އިން އޭއެފްސީ ކަޕްގެ ގްރޫޕް ސްޓޭޖުގައި ވާދަކުރާނެއެވެ. މާޒިޔާގައި ޖެސިކްގެ އެންމެ ބޮޑު ޓާގެޓަކަށް ވާނީ އޭއެފްސީ ކަޕްގައި ރަނގަޅު ނަތީޖާއެއް ނެރުމަށެވެ.