ދުވަސްތަކަކަށްފަހު އަފްޣާނިސްތާނުގައި ބާރުގަދަ ބޮމުގެ ޙަމަލާއެއް ދީފިއެވެ.
އަފްޣާނިސްތާނުގެ ސަލާމަތީ ބާރުތަކުން ބުނެފައިވަނީ ބޮމުގެ ޙަމަލާ ޢަމާޒުކޮށްފައިވަނީ އެ ޤައުމުގެ ހުޅަނގުގައި އޮންނަ ހީރާތަށެވެ. އެ ގޮތުން އެ ޙަމަލާގައި 6 މީހުން މަރުވެ 9 މީހުން މަރުވެފައިވާކަމަށާއި އޭގެ ތެރެއިން 3 މީހުން އޮތީ ވަރަށް ނާޒުކު ޙާލަތެއްގައިކަމަށް އެ ޤައުމުގެ ސަލާމަތީ ބާރުތަކުންވަނީ ބުނެފައެވެ. މަޢުލޫމާތު ލިބިފައިވާ ގޮތުގައި އެ ޙަމަލާ ޢަމާޒުކޮށްފައިވަނީ ހީރަތުގައި ޢާއްމު ދަތުރުފަތުރު ކުރަން ބޭނުންކުރާ ކުޑަ ވޭނަކަށެވެ.
މިދިޔަ އޯގަސްޓު މަހުގެ ތެރޭގައި ޠާލިބާނުންގެ ބާރުގެ ދަށަށް އަފްޣާނިސްތާން ގެނެސް އެ ޖަމާޢަތުގެ ވެރިކަމެއް ޤާއިމުކުރުމުން ވާދަވެރި ހަނގުރާމަވެރި ޖަމާޢަތްތަކުންވަނީ އެ ޤައުމުގެ އެކި ސަރަޙައްދުތަކުގައި ނުރައްކާތެރި ޙަމަލާތަކެއް ދޭން ފަށައިފައެވެ. އޭގެ ތެރެއިން ޠާލިބާނުންނަށް އެންމެ ބޮޑު ނުރައްކަލެއް ކުރިމަތިކުރަމުންދަނީ އައިއެސް ޖަމާޢަތުންނެވެ.
ބޮޑެތި އިޤްތިޞާދީ ދަތިތަކެއް ކުރިމަތިވެފައިވީ ނަމަވެސް ފާއިތުވި ދުވަސްތަކުގެ ތެރޭގައި ޠާލިބާނުންގެ ޚާއްޞަ ފައުޖުތަކުންވަނީ އަފްޣާނިސްތާނުގެ ސަލާމަތީ ކަންކަން ބެލެހެއްޓުމަށް ނުކުމެ އެ ޤައުމުގައި އަމަންއަމާންކަން ބެލެހެއްޓުމަށް އެދެވޭ މަސައްކަތްތަކެއް ކޮށްފައެވެ.