ހައިޓީގެ ބޮޑުވަޒީރު އެރިއެލް ހެންރީ އަވަހާރަކޮށްލަން ކުރި މަސައްކަތް ނާކާމިޔާބުވެއްޖެއެވެ.
ހައިޓީގެ ބޮޑުވަޒީރުގެ ރަސްމީ އިދާރާއިން ބުނެފައިވަނީ ހެންރީ އަވަހާރަކޮށްލަން މަސައްކަތްކޮށްފައިވަނީ އެ ޤައުމުގެ 218ވަނަ މިނިވަން ދުވަސް ފާހަގަކުރަން ބޭއްވި ޙަފުލާއަށް ކާރުކޮޅުގައި ވަޑައިގަންނަވަނިކޮށްކަމަށެވެ. އެ ގޮތުން ހަތިޔާރުއެޅި ބަޔަކުވަނީ ހެންރީއަށް ޢަމާޒުކޮށް ބަޑީގެ ޙަމަލާތަކެއް ދީފައެވެ. އެ ޙަމަލާގައި އެކަކު މަރުވެ އިތުރު ދެ މީހުންވަނީ ޒަޚަމުވެފައެވެ.
ހައިޓީގެ ފުލުހުން ބުނެފައިވަނީ ހެންރީ އަވަހާރަކޮށްލަން މަސައްކަތްކުރީ ގޭންގަކުންކަމަށް ބެލެވޭކަމަށެވެ. ފާއިތުވި ދުވަސްތަކުގައި ހައިޓީގެ ވެރިކަމުގެ ނިޒާމު ބަލިކަށިވެ އެ ޤައުމުގައި ޙަރަކާތްތެރިވާ ގޭންގުތަކުގެ ނުރައްކާތެރިކަންވަނީ ބޮޑުވެފައެވެ. އަދި ހެންރީ އަވަހާރަކޮށްލަން ޙަމަލާ ދިނުމުގެ ކުރިން ހައިޓީގެ ގޭންގެއްގެ އިސްވެރިއެއްވަނީ އޭނާއަށް ވަރުގަދަ އިންޒާރުތަކެއް ދީފައެވެ.
މިދިޔަ ޖުލައި މަހުގެ 7ވަނަ ދުވަހު ހައިޓީގެ ރައީސް ޖޮވެނެލް މުއީސް ދިރިއުޅުއްވައި ގެކޮޅަށް ހަތިޔާރުއެޅި ބަޔަކު ދިން ބަޑީގެ ޙަމަލާތަކެއްގައި އޭނާވަނީ އަވަހާރަވެފައެވެ.