ގޮހޮރުގެ އާލާސްކަންފުޅެއްގައި ބުރެޒިލުގެ ރައީސް ޖައިޚް ބޮލްސޮނާރޯ ހަސްފަތާލުގައި އެނދުމަތިކޮށްފިއެެވެ.
2018ވަނަ އަހަރުގެ ސެޕުޓެންބަރު މަހުގެ ތެރޭގައި ބޭއްވި ކެންޕޭން ޙަރަކާތެއްގައި މީހަކުވަނީ ބޮލްސޮނާރޯއަށް ވަޅިން ޙަމަލާދީފައެވެ. އެ ހަމަލާގެ ސަބަބުން ޢުމުރުފުޅުން 66 އަހަރުގެ ބޮލްސޮނާރޯއަށްވަނީ ތަފާތު ޞިއްޙީ އުނދަގޫތަކާ ކުރިމަތިލައްވަން ޖެހިވަޑައިގެންފައެވެ. މަޢުލޫމާތު ލިބިފައިވާ ގޮތުގައި ބޮލްސޮނާރޯ ހަސްފަތާލުގައި އެނދުމަތިކޮށްފައިވަނީ ގޮހޮރު ބެދުމުގެ ސަބަބުންނެވެ.
ހަސްފަތާލުގައި އޮންނަވައި ބޮލްސޮނާރޯ ވިދާޅުވީ އޭނާގެ ޙާލުކޮޅު ގޯސްވީ އާދިއްތަ ދުވަހުގެ މެންދުރުގެ ފަރިއްކޮޅަށްފަހުކަމަށެވެ. އަދި އޭނާއަށް ދެމުންދާ ފަރުވާގެ ދަށުން އޭނާގެ ހަށިކޮޅަށް ހޮޅިއެއް ލައްވާފައިވާކަމަށާއި އޭނާގެ ޙާލުކޮޅު ރަނގަޅުވަމުން އަންނަކަމަށް ބޮލްސޮނާރޯވަނީ ވިދާޅުވެފައެވެ. ބެލެވޭ ގޮތުގައި ބޮލްސޮނާރޯއަށް ދިމާވެވަޑައިގެންފައިވާ ޞިއްޙީ މައްސަލަތަކުގެ ސަބަބުން އޮޕަރޭޝަނެއް ކުރަން ޖެހޭނެއެވެ.
2021ވަނަ އަހަރުގެ ޖުލައި މަހުގެ ތެރޭގައިވެސް ގޮހޮރު ބެދުމުގެ ސަބަބުން ބޮލްސޮނާރޯވަނީ ހަސްފަތާލުގައި އެނދުމަތިކޮށްފައެވެ. 2019ވަނަ އަހަރުގެ ތެރޭގައި ވެރިކަމަށް ވަޑައިގެންނެވި ބޮލްސޮނާރޯވަނީ އަންނަ އޮކްޓޯބަރު މަހުގެ ތެރޭގައި ބާއްވައި ރިޔާސީ އިންތިޚާބުގައި ވާދަކުރައްވާނެކަން އިޢުލާނުކުރައްވައިފައެވެ.