އައު އަހަރުގެ ފުރަތަމަ ރޭ އިސްރާއީލުގެ އިސްތިޢުމާރީ ފައުޖުތަކުން ފަލަސްޠީނުގެ ޣައްޒާއަށް ވަރުގަދަ ޙަމަލާތަކެއް ދީފިއެވެ.
ޔަހޫދީން ވަރުގަދަ ޙަމަލާތަކެއް ދީފައިވަނީ އޭގެ ކުރީގެ ދުވަހު ޣައްޒާއިން މެޑިޓެރޭނިޔަން ކަނޑާ ދިމާލަށް ދެ ރޮކެޓު ފޮނުވާލާފައިވަނިކޮށެވެ. ނަމަވެސް ޣައްޒާއިން ފޮނުވާލި ރޮކެޓަކީ އިސްރާއީލުގެ ޔަހޫދީ ދަޢުލަތައް ދިން ޙަމަލާއެއް ކަމެއް ނޭނގެއެވެ. ޢައްޒާގައި ޙަރަކާތްތެރިވާ އެކި ހަނގުރާމަވެރި ޖަމާޢަތްތަކުން އުފައްދައި ރޮކެޓުތައް ތަޖުރިބާކުރުމަށް ޢާއްމުކޮށް މެޑިޓެރޭނިޔަން ކަނޑާ ދިމާލަށް ފޮނުވާލައެވެ.
އިސްރާއީލުގެ ދިފާޢީ ވުޒާރާއިން ބުނެފައިވަނީ ޔަހޫދީންގެ ޙަމަލާތައް ޢަމާޒުކޮށްފައިވަނީ ޣައްޒާގައި ރޮކެޓު އުފައްދާ ކާރުހާނާއަކަށާއި އަސްކަރީ މަޤާމުތަކަށްކަމަށެވެ. އެ ޙަމަލާތަކުގައި އެއްވެސް މީހަކަށް ގެއްލުމެއް ލިބުނުކަމެއް ނޭނގެއެވެ. އަދި ރައްދުގައި ޢައްޒާގައި ޙަރަކާތްތެރިވާ ހަނގުރާމަވެރި ޖަމާޢަތްތަކުން އިސްރާއީލާ ދެކޮޅަށް ޙަމަލާއެއް ދީފައެއްވެސް ނުވެއެވެ.
މިދިޔަ އަހަރުގެ މެއި މަހުގެ ތެރޭގައި ޣައްޒާގައި ވެރިކަންކުރާ ޙަމާސް ޖަމާޢަތާއި ޔަހޫދީންނާ ދެމެދު ކުރި 11 ދުވަހުގެ ހަނގުރާމައަށްފަހު އެ ސަރަޙައްދު ޢާއްމު ގޮތެއްގައި އޮންނަނީ ވަރަށް އަމާންކޮށެވެ. އަދި އޭގެ ފަހުން އެ ދެ ފަރާތުގެ ދެމެދުގައި ޙަމަލާ ބަދަލުކޮށްފައިވަނީ މީގެ ހަތަރު މަސްދުވަސް ކުރިން އެންމެ ފަހަރަކުއެވެ.