މެލޭޝިޔާއަށް ބޯކޮށް ވާރޭވެހުމުން އެ ޤައުމުގެ އެކި ސަރަޙައްދުތަކުގައި ފެންބޮޑުވެ ބިންގަނޑު ކަނޑައިގެން ދިޔުމުން ޙާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް 335 މިލިޔަން އެމެރިކާ ޑޮލަރު ޚަރަދުކުރުމަށް ނިންމައިފިއެވެ.
ޑިސެންބަރު މަހުގެ 17ވަނަ ދުވަހުން ފެށިގެން މެލޭޝިޔާއަށް ބޯކޮށް ވާރޭވެހުމުގެ ސަބަބުން އެ ޤައުމުގެ 8 ސުޓޭޓެއްގައިވަނީ ވަރަށް ބޮޑަށް ފެންބޮޑުވެފައެވެ. އެ ކާރިޘާގައި 48 މީހުން މަރުވެ 70،000އަށްވުރެ ގިނަ މީހުންގެ ގެދޮރުވަނީ ގެއްލިފައެވެ.
މެލޭޝިޔާގެ ބޮޑުވަޒީރު އިސްމާއީލް ޞަބްރީ ޔަޢުޤޫބު ވިދާޅުވީ ސަރުކާރުން އެންމެ ބޮޑު އިސްކަމެއް ދެނީ ޙާލުގައި ޖެހިފައިވާ އެތައް ހާސް ބަޔަކަށް އެހީތެރިކަން ފޯރުކޮށްދިނުންކަމަށެވެ. އެ ގޮތުން އެހީގެ ގޮތުގައި ކަނޑައަޅާފައިވާ 335 މިލިޔަން އެމެރިކާ ޑޮލަރުގެ ބޮޑު ބައެއް ޚަރަދުކުރާނީ ގެއްލުން ލިބިފައިވާ 30،000 ގެދޮރު މަރާމާތުކޮށް ބިލްތަކަށް ފައިސާ ދައްކައި އުޅަނދުތައް މަރާމާތުކޮށް މަރުވި މީހުންގެ ޢާއިލާތަކަށް ބަދަލުދިނުމަށްކަމަށް ޞަބްރީ ވިދާޅުވިއެވެ. އަދި ކާރިޘާގައި އެންމެ ބޮޑު ގެއްލުމެއް ލިބުނު ދެ ސުޓޭޓުކަމަށްވާ ސެލެންގޯއާއި ޕަހަންގު އުމުރާނީ ތަރައްޤީގެ މަސައްކަތްތަކަށާއި އެ ސަރަޙައްދުތައް ސާފުކުރުމަށްވެސް ސަރުކާރުން ޚަރަދުކުރާނެކަމަށް އޭނާ ވިދާޅުވިއެވެ.
ކޮންމެ އަހަރެއްގެ އޮކްޓޯބަރު މަހާއި މާރިޗު މަހާ ދެމެދު މެލޭޝިޔާއަށް ބޯކޮށް ވާރޭވެހި އެ ޤައުމުގެ އިރުމަތީގެ ސަރަޙައްދުތަކުގައި ފެންބޮޑުވެއެވެ. ނަމަވެސް އެހެން އަހަރުތަކާ ޚިލާފަށް މެލޭޝިޔާގެ އާބާދީ ބޮޑެތި ރަށްތަކުގައި ފެންބޮޑުވުމުގެ ސަބަބުން އެ ޤައުމަށް ލިބުނު ގެއްލުންވަނީ ބޮޑުވެފައެވެ. އަދި ކާރިޘާއާ ކުރިމަތިލުމުގައި ސަރުކާރުން ލަސްކޮށްފައިވާކަމަށް ބުނެ ޢާއްމުންވަނީ ވަރަށް ބޮޑަށް ހިތްހަމަނުޖެހުން ފައުޅުކޮށްފައެވެ. އެ ކަމަށް ޞަބްރީވަނީ ޢާއްމުންގެ ފަރާތުން މަޢާފަށްވެސް އެދިވަޑައިގެންފައެވެ.