އިދިކޮޅު ޕީޕީއެމްއިން އިސްނަގައިގެން ކުރިއަށްގެންދާ ސައިކަލު ބުރު ކުރިއަށް ނުގެންދިއުމަށް ފުލުހުން އަންގައިފިއެވެ.
ފުލުހުން ނެރުނު ނޫސްބަޔާނެއްގައި ބުނީ ޕީޕީއެމްއިން އިންތިޒާމްކޮށްގެން މިއަދު މާލޭގެ މަގުތަކުގައި ބެއްވުމަށް ރާވާފައިވާ އުޅަނދުބުރުގައި ހަމަނުޖެހުން ހިންގަން ރާވަމުންދާކަމުގެ މައުލޫމާތު ދިވެހި ފުލުހުންގެ ޚިދުމަތަށް ލިބިފައިވާކަމަށެވެ. އަދި މިފަދަ ހަމަނުޖެހުންތަކަކީ ގިނަ ބަޔަކަށް އޭގެ ނުރައްކާ އޮތް ކަމެއްކަމުގައި ދެކޭކަމަށާއި، އެހެންކަމުން، އާންމު މަސްލަހަލު ހިމާޔަތްކޮށް، އެއްވުންތަކުގެ ބައިވެރިންނާއި އެހެނިހެން ފަރާތްތައް ހިމެނޭ ގޮތުން، ސަލާމަތާއި ރައްކާތެރިކަން ފޯރުކޮށްދިނުމަކީ ދިވެހި ފުލުހުންގެ ޚިދުމަތުގެ ގާނޫނީ ޒިންމާއެއްކަމަށް ފުލުހުން ބުންޏެވެ.
ފުލުހުން ބުނީ އާންމު މަސްލަހަތު ގެއްލި، ސަލާމަތާއި ރައްކާތެރިކަމަށް ބުރޫއަރާނެފަދަ ގޮތަކަށް އުޅަނދުބުރު ކުރިއަށް ގެންދިއުމުގެ ފުރުސަތު ފުލުހުން ނުދޭނެކަމަށެވެ.
ފުލުހުންގެ ބަޔާނާއި ގުޅިގެން ޕީޕީއެމް އިން ބުނީ އެޕާޓިން އެއްވެސް ހަރަކާތެއްގައި ހަމަނުޖެހުން ހިންގަން ރާވާފައި ނުވާނެކަމަށެވެ. މިހާތަނަށްވެސް ބޭއްވި އެއްވެސް ހަރަކާތެއްގައި އެފަދަ ޢަމަލެއް ހިންފައިނުވާނެކަމަށް ޕީޕީއެމްއިން ބުންޏެވެ.