މުޖުތަމަޢުތެރޭގައި ﷲ ނަހީކުރެއްވި މުންކަރާތެއް ހިންގަމުންދާނަމަ އެކަން ހުއްޓުވުމަށް މަސައްކަތް ކުރަންޖެހޭނެކަމަށާއި އެގޮތަށް ޢަމަލުނުކުރާނަމަ އެއީ ﷲގެ ކޯފާ އެބަޔަކަށް އައުން ގާތްކަމެއް ކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
މުޖުތަމަޢުގައި ހުރި ނޭދެވޭ ކަންކަމުގެ ސަބަބުން ޤައުމުތައް ހަލާކު ކުރައްވާފައިވާ ކަމާއި އެބަޔަކު ﷲގެ ނިޢުމަތްތަކަށް ޝުކުރުވެރިވީކަމަށްޓަކާ އެޤައުމުތައް ކުރިއަރައި ދިޔަ ޤައުމުތަކުގެ މިސާލު ޖައްސަވާ މިއަދުގެ ހުކުރު ޚުޠުބާގައިވަނީ މުންކަރާތްތައް މަނާކުރުމަށް ބާރު އަޅުއްވާފައެވެ. މާތްﷲ ޙަރާމްކުރައްވާފައިވާ ކަމެއް މުޖުތަމަޢުގައި ހިނގާނަމަ އެކަން މަނާކޮށް ހުއްޓުވަން ޖެހޭކަމަށާއި އެކަމަށް ބަޔަކު ނުތެދުވާނަމަ އެކަމެއްގެ ޢަޛާބު ޢާއްމުވެގެން އެންމެންގެ މައްޗަށް އައުން ގާތްކަމުގައި ހުކުރު ޚުޠުބާގައިވަނީ ހަނދާންކޮށްދީފައެވެ. މީގެ އިތުރުން ކޮންމެ ދުވަހަކީ އަދި ކޮންމެ އަހަރަކީ އެމީހަކު އެދުވަސްތައް ހޭދަކުރި ގޮތާއި މެދު ސުވާލުވެވޭނެ ދުވަސްތަކެއް ކަމުގައި ޚުޠުބާގައި ވިދާޅުވިއެވެ. އަދި އެއަހަރުތަކާއި ދުވަސްތައް އެމީހަކާއި އެއްކޮޅަށް ނުވަތަ ދެކޮޅަށް ހެކިބަސްދޭނެކަން ޚުޠުބާގައިވަނީ ހަނދާންކޮށްދީފައެވެ.
"ޤައުމެއް ނުވަތަ މުޖުތަމަޢެއްގައި މުންކަރާތްތައް ހިނގަމުންދާނަމަ، އެކަންކަން ހުއްޓުވުމަށް މަސައްކަތް ކުރަންޖެހޭ. އެތަނެއްގައި މުންކަރާތްތައް މަނާނުކުރެވޭނަމަ، އެއީވެސް ﷲގެ ކޯފާ އެބައެއްގެ މައްޗަށް އައުން ގާތްވެގެންވާކަމެއް." ޚުޠުބާގައި ފާހަގަކޮށްފައިވެއެވެ.
ޚުޠުބާގައިވަނީ އާޚިރަތަށްވުރެ ބޮޑަށް ދުނިޔަވީ ކަންކަމަށް ސަމާލުކަންދީ ދުނިޔޭގެ ތަނަވަސްކަން ހޯދުމަށް މަސައްކަތްކުރި ޤައުމުތައް ހަލާކުވެގެން ދިޔަ ގޮތުގެ ވާހަކަ ބަޔާންކޮށްދެއްވާފައެވެ. އަދި މިކުޑަކުޑަ ވަޠަނަށް މާތްﷲ ދެއްވާފައިވާ ގުނާ ޢަދަދުނުކުރެވޭނެ ނިޢުމަތްތަކަކާމެދު އެންމެ ފަހަރަކުވެސް އެކަކުވެސް ވިސްނާލިންތޯ ޙުޠުބާގައިވަނީ ސުވާލުކުރައްވާފައެވެ. ޚުޠުބާގައިވަނީ މުސްލިމު އުއްމަތާއި ބީރައްޓެހި އަދި ޣައިރު މުސްލިމުންގެ ޝިޢާރުތައް ފާޅުކޮށް އެދީންތަކުގެ ޢީދުތައް ފާހަގަކުރުމާއި އެކަންކަމުގައި ބައިވެރިވުމަކީ މުސްލިމުންނަށް ހުއްދަވެގެންވާ ކަމެއް ނޫންކަންވެސް ހަނދާންކޮށްދެއްވާފައެވެ.
"ޣައިރު މުސްލިމުންގެ ޝިޢާރުތައް ފާޅުކޮށް އެބައިމީހުންގެ ޢީދުތަކުގައި ބައިވެރިވުމަކީ މުސްލިމުންނަށް ހުއްދަވެގެންވާ ކަންކަމެއް ނޫން. އެއީ އެބައިމީހުންގެ ކުފުރާއި ޝިރުކުގެ ޝިޢާރުތައް ފާޅުކޮށް އެފަދަ ޢަމަލުތައް ހިންގުމަށް އެހީތެރިވުމުގެ ތެރެއިން ވާކަމެއް." ޚުޠުބާގައި ފާހަގަކޮށްފައިވެއެވެ.
ހުކުރު ޚުޠުބާގައިވަނީ ކަންކަމާއި މެދު ވިސްނާ ފިކުރުކުރާ ބަޔަކަށްވުމަށް ނަސޭޙަތްތެރިވެފައެވެ. އަދި ޢުމުރުގެ ދުވަސްތައް ހެޔޮގޮތުގައި ހޭދަކުރުމަށް ޢަޒުމުކަނޑައެޅުމަށްވެސްވަނީ ނަސޭޙަތްތެރިވެފައެވެ.