ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު އަލްމަރްހޫމް ޙުސައިން ވަހީދު އަވަހާރަވުމާއި ގުޅިގެން އެމަނިކުފާނުގެ ހަނދާނުގައި މަޖިލީހުގައި ހަމަހިމޭންކަމުގެ ސްކޫތެއް މިއަދު ގެނެސްފިއެވެ.
ދައުރުން ބޭރުން މިއަދު މަޖިލީހުގައި ބޭއްވި ޖަލްސާގައި މަޖިލީހުގެ ރައީސް މުޙައްމަދު ނަޝީދު ވަނީ، މަރްހޫމް ހުސައިން ވަޙީދު މަޖިލީހުގައި ކުރައްވަމުންދިޔަ މަސައްކަތްތަކާއި، އެމަނިކުފާނު އަދާކުރެއްވި ދައުރު ފާހަގަކުރައްވާފައެވެ. އަދި މަރްހޫމް ހުސައިން ވަހީދަކީ ޚިދުމަތްތެރި ނަމޫނާ މެމްބަރެއްކަންވެސް ނަޝީދު ފާހަގަކުރެއްވިއެވެ. މިއަދުގެ ޖަލްސާގައި މަރްހޫމް ހުސައިން ވަހީދުގެ ހަނދާނުގައި ގެންނެވި ސުކޫތުގައި 51 މެމްބަރުން ވަނީ ބައިވެރިވެވަޑައިގެންފައެވެ.
ހުސެއިން ވަހީދު އަވަހާރަވީ ކެންސަރުގެ އާލާސްކަންފުޅުގައި އުޅުއްވާތާ ވަނީ ގިނަ ދުވަސްތަކެއް ވެފައެވެ. ހުސައިން ވަހީދުގެ ކަށުނަމާދު ކުރުމާއި ފަސްދާނުލުން އޮތީ އަންގާރަދުވަހުގެ މެންދުރު ނަމާދަށްފަހުއެވެ. ކަށު ނަމާދުގައާއި ފަސްދާނުލުމުގެ ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހާއި، ރައްޔިތުންގެ މަޖިލީހުގެ ރައީސް މުހައްމަދު ނަޝީދުވެސް ބައިވެރިވެވަޑައިގެންނެވިއެވެ.
ބައްޔަށް ފަރުވާ ހޯއްދެވުމަށް ރާއްޖެއިން ބޭރުގައި އަހަރެއްހާ ދުވަހު ހުންނެވުމަށްފަހު އަލުން މަޖިލީހުގެ ޖަލްސާތަކުގައި ހުސެއިން ބައިވެރިވެޑައިގެންނެވީ މިއަހަރުގެ މާރިޗު މަހުގެ 29 ގައެވެ.
މަރްހޫމް ޙުސައިން ވަޙީދު ވަނީ 17 ވަނަ ރައްޔިތުންގެ މަޖިލީހުގައިވެސް ކޮމަންޑޫ ދާއިރާގެ މެންބަރުކަން ކުރައްވާފައެވެ. މަރްހޫމް ހުސައިން ވަހީދުގެ ހަނދާނުގައި މަޖިލީހުގެ އިދާރާގައި ވަނީ ތަޢުޒިޔާގެ ދަފްތަރެއްވެސް ހުޅުވާފައެވެ.