އިންޑޮނޭޝިޔާއަށް ބާރުގަދަ ބިންހެލުމަކާ ކުރިމަތިލާން ޖެހުނު ނަމަވެސް ބޮޑު ގެއްލުމެއް ނުލިބޭކަމަށް އެ ޤައުމުން ބުނެފިއެވެ.
އިންޑޮނޭޝިޔާއިން ބުނެފައިވަނީ ރިކްޓަރ މިންގަނޑުން 7.4 ބާރުގަދަ ބިންހެލުމެއް އައިސްފައިވަނީ އެ ޤައުމުގެ އިރުމަތީގައި އޮންނަ ލަރަންޓުކާއަށްކަމަށެވެ. އެ ބިންހެލުން އައިސްފައިވަނީ ބިމުގެ 12 ކިލޯމީޓަރު އަޑިންނެވެ. އެއާއެކު އެ ސަރަޙައްދަށް ސުނާމީއެއް އަރައިފާނެކަމުގެ އިންޒާރު ދިން ނަމަވެސް ދެ ގަޑިއިރު ފަހުން އެފަދަ ނުރައްކަލެއް ނެތްކަމަށްވަނީ ނިންމައިފައެވެ.
ބިންހެލުމުގެ ސަބަބުން ޒަޚަމުވެފައިވަނީ އެންމެ މީހެއްކަމަށާއި ބައެއް އިމާރާތްތަކަށް ގެއްލުން ލިބުނުކަމަށް އިންޑޮނޭޝިޔާއިން ބުނެފައިވެއެވެ. އަދި ބިންހެލުމުގެ ފަހުން އެތައް ފަހަރަކު ބިންގަނޑު ގުޑި ނަމަވެސް ކަނޑުގެ ލޮނުގަނޑަށް ބަދަލެއް ނާންނަކަމަށްވެސް އެ ޤައުމުގެ އިދާރާތަކުން ބުނެފައިވެއެވެ.
އިންޑޮނޭޝިޔާއަކީ އެ ޤައުމު އޮންނަ ސަރަޙައްދުގެ ގޮތުން ނުރައްކާތެރި ބިންހެލުންތަކަކާ ކުރިމަތިލާން ޖެހިފައިވާ ޤައުމެކެވެ. އެ ގޮތުން 2004ވަނަ އަހަރުގެ ޑިސެންބަރު މަހުގެ ތެރޭގައި އިންޑޮނޭޝިޔާއަށް ކުރިމަތިވި ރިކްޓަރ މިންގަނޑުން 9.1 ބާރުގަދަ ބިންހެލުމުގެ ސަބަބުން ސުނާމީއެއް އަރައި އެ ޤައުމުގެ އިތުރުން ތައިލޭންޑާއި ސުރީ ލަންކާއާއި އިންޑިޔާއިން 230,000 މީހުންވަނީ މަރުވެފައެވެ.