ސޫރިޔާގެ ލަޒުޤިއްޔާ ބަނދަރަށް އިސްރާއީލުން ވަރުގަދަ ވައިގެ ޙަމަލާތަކެއް ދީފިއެވެ.
ސޫރިޔާގެ ސަރުކާރުން ބުނެފައިވަނީ އިސްރާއީލުގެ ޢުދުވާނީ ޙަމަލާތަކުގައި ބަނދަރުގައި މުދާ ރައްކާކުރުމަށް ޚާއްޞަކޮށްފައިވާ ސަރަޙައްދުގައި އަލިފާން ރޯވެ ގެއްލުންތަކެއް ލިބުނުކަމަށެވެ. ނަމަވެސް ލިބުނު ގެއްލުމުގެ ތަފުޞީލެއް ސޫރިޔާގެ ސަރުކާރުން ބުނެފައެއް ނުވެއެވެ. އިސްރާއީލުންވެސް އެ ޙަމަލާއާ ގުޅޭގޮތުން އެއްވެސް މަޢުލޫމާތެއް ޢާއްމުކޮށްފައެއް ނުވެއެވެ.
ދާޚިލީ ހަނގުރާމައިގެ ޙާލަތުގައި އޮތް ސޫރިޔާއަށް ފާއިތުވި ދުވަސްތަކުގައި ޔަހޫދީން ދެމުންދާ ޙަމަލާތައްވަނީ އިތުރުވެފައެވެ. ޔަހޫދީންގެ ޙަމަލާތައް މައިގަނޑު ގޮތެއްގައި ޢަމާޒުކުރަނީ ސޫރިޔާގެ ސަރުކާރަށް އެހީތެރިވުމަށް އެ ޤައުމުގައި ޙަރަކާތްތެރިވާ އީރާނުގެ ފައުޖުތަކާއި ލުބުނާނުގެ ހިޒުބުﷲ ޖަމާޢަތުގެ ހަނގުރާމަވެރިންނާ ދެކޮޅަށެވެ.
މީގެ ކުރިންވެސް އިސްރާއީލުންވަނީ ލަޒުޤިއްޔާ ބަނދަރަށް ޙަމަލާތަކެއް ދީފައެވެ. އެ ބަނދަރާ ގާތްގަނޑަކަށް 20 ކިލޯމީޓަރު ދުރުގައި ރަޝިޔާގެ އަސްކަރީ ވައިގެ ބަނދަރެއް އޮވެއެވެ. ފާއިތުވި ދުވަސްތަކުގައި އީރާނާއި ރަޝިޔާގެ އަސްކަރީ އެހީތެރިކަމާއެކު ސޫރިޔާގެ ދާޚިލީ ހަނގުރާމަ ކާމިޔާބުކުރުމާ ގާތަށް އެ ޤައުމުގެ ސަރުކާރުންވަނީ އައިސްފައެވެ.
ދާދި ފަހުން ސޫރިޔާގައިވަނީ ރިޔާސީ އިންތިޚާބެއް ބާއްވައިފައެވެ. އެ އިންތިޚާބު ބޮޑު ތަފާތަކުން ކާމިޔާބުކުރެއްވީ ރައީސް ބައްޝާރުލް އަސަދެވެ. އެއާއެކު ސޫރިޔާއާއި ޢަރަބި ޤައުމުތަކާއެކު އޮންނަ ގުޅުންތައްވަނީ ބަދަހިވާން ފަށައިފައެވެ.