ފިލިޕީންސުގައި އަންނަ އަހަރު ބާއްވައި ރިޔާސީ އިންތިޚާބުގައި އެ ޤައުމުގެ ރައީސް ރޮދުރިގޯ ދުތާތޭ ތާޢީދުކުރެއްވި ކެނޑުޑޭޓު ނަން އަބުރައި ނަންގަވައިފިއެވެ.
އަންނަ އަހަރުގެ މެއި މަހުގެ ތެރޭގައި ބާއްވައި ރިޔާސީ އިންތިޚާބުގައި ދުތާތޭ ތާޢީދުކުރެއްވުމަށް ނިންމަވާފައިވަނީ ފިލިޕީންސުގެ ޤާނޫނުހަދާ މަޖިލީހުގެ މެންބަރު ކުރިސްޓޮފަރ ބޮންގު ގޯއަށެވެ. އޭނާއަކީ ދުތާތޭއަށް ވަރަށް ގާތް އަދި ވަރަށް ވަފާތެރި ބޭފުޅެކެވެ. އިންތިޚާބުގައި ގޯ ވާދަނުކުރެއްވުމަށް ނިންމެވުމުން ފިލިޕީންސުގެ ސަރުކާރުން ތާޢީދުކުރާނެ ކެނޑިޑޭޓަކާމެދުވަނީ ސުވާލު އުފެދިފައެވެ.
2016ވަނަ އަހަރުގެ ތެރޭގައި ފިލިޕީންސްގެ ރައީސްގެ މަޤާމާ ޙަވާލުވެވަޑައިގަތް ދުތާތޭގެ ދަރިކަނބަލުން ސާރާ ދުތާތޭ-ކާރްޕިޔޯ އިންތިޚާބުގައި ވާދަކުރެއްވުމަށް ކުރިން ނިންމެވިއެވެ. އަދި އޭނާގެ ރަނިންމޭޓަކަށް ހަމަޖައްސަވާނެކަމަށް ކުރިން ބެލެވިފައިވަނީ ގޯއެވެ. ނަމަވެސް ގޯ ފަހުންވަނީ އަމިއްލަފުޅަށް ރިޔާސީ އިންތިޚާބުގައި ވާދަކުރެއްވުމަށް ނިންމަވައިފައެވެ. އެއާއެކު އޭނާގެ ރަނިންމޭޓަކަށް ސާރާ ވެވަޑައިގަންނަވާނެކަމަށްވަނީ ބެލެވިފައެވެ. ނަމަވެސް ފަހުން ދުތާތޭވަނީ އަމިއްލަފުޅު ދަރިކަނބަލުންނާ ދެކޮޅަށް ގޯގެ ރަނިންމޭޓުކަން ހޯއްދަވަން މަސައްކަތްކުރައްވައިފައެވެ. އެ ނުތަނަވަސްކަމުގެ ތެރެއިން ސާރާވަނީ އެހެން ކެނޑިޑޭޓެއްކަމަށްވާ ފާދިނެންދު މާރްކޮސް ޖޫނިޔަރގެ ރަނިންމޭޓޫކަން ޤަބޫލުކުރައްވައިފައެވެ. ފިލިޕީންސުގެ ކުރީގެ ޚުދުމުހުތާރު ވެރިޔާ ފާދިނެންދު މާރްކޮސްގެ ދަރިކަލުން ޖޫނިޔަރއަކީ މިހާރު އެންމެ ކުރީގައި އުޅުއްވައި ކެނޑިޑޭޓެވެ.
ޢުމުރުން 75 އަހަރުގެ ދުތާތޭއަށް ދެން އޮންނަ ރިޔާސީ އިންތިޚާބުގައި ވާދައެއް ނުކުރެއްވޭނެއެވެ. ނަމަވެސް އޭނާއަށް އެހެން މަޤާމުތަކަށް ކުރިމަތިލެއްވޭނެއެވެ. އެހެންކަމުން އޭނާވަނީ ޤާނޫނުހަދާ މަޖިލީހުގެ ގޮނޑިއަކަށް ވާދަކުރެއްވުމަށް ނިންމަވައިފައެވެ.