އިންގްލިޝް ޕްރިމިއަރ ލީގުގައި އެންމެފަހުގެ ޗެމްޕިއަން މެންޗެސްޓަރ ސިޓީ އާއި ވެސްޓް ހޭމް ޔުނައިޓެޑް ބައްދަލުކުރިމެޗް ސިޓީއިން ކާމިޔާބުކޮށްފިއެވެ. ސިޓީގެ ދަނޑުގައި ކުޅުނު މިމެޗް ސިޓީ ކާމިޔާބުކުރީ 2 ލަނޑު އެއްލަނޑުންނެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސިޓީއިންނެވެ. ނަމަވެސް ވެސްޓް ހޭމުން ވެސް ދޭތެރެ ދޭތެރެއިން ސިޓީގެ ގޯލަށް ނުރައްކާކޮށްފައިވެއެވެ. މިމެޗުގެ ފުރަތަމަ ހާފްގައި ބޯކޮށް ސްނޯ ފޭބުމުގެ ސަބަބުން ދެޓީމަށްވެސް އަސަރު ކުރިކަން ފެނިގެންިޔައެވެ. ނަމަވެސް އެންމެ ބޮޑަށް އަސަރު ކުރީ ވެސްޓް ހޭމަށެވެ. މިގޮތުން މިމެޗްގައި ސިޓީއިން ޖެހި ފުރަތަމަ ލަނޑު މެޗްގެ 33 ވަނަ މިނެޓްގައި އިލްކާއި ގުންޑޮގާން ޖަހާފައިވަނީ ސްނޯގެ އަސަރު އެންމެ ބޮޑަށް ކުރި ވަގުތާދިމާކޮށެވެ. މިހާފްގައި މީގެއިތުރުންވެސް ލަނޑު ޖަހާނެ ރަނގަޅު ފުރުސަތު ތަކެއް ސިޓީއަށް ލިބިގެންދިޔައެވެ. މިމެޗުގައި ސިޓީއިން ޖެހި ދެވަނަ ލަނޑު މެޗްގެ ފަހު މިނެޓްގައި ޖަހައިދިނީ ފެނާންޑީނިއޯއެވެ. މިނަތީޖާގައި އޮވެގެން މެޗް ނިމެން ދަނިކޮށް ވެސްޓް ހޭމުން ޖެހި ހަމައެކަނި ލަނޑު މެޗުގެ އިތުރު ވަގުތުގެ ހަތަރުވަނަ މިނެޓްގައި ޖަހައިދިނީ މެނުއަލް ލަންޒީނީއެވެ.
މިކާމިޔާބީއާއެކު ސިޓީއަށް މިހާރުވަނީ ކުޅުނު 13 މެޗުން ލިބިފައިވާ 29 ޕޮއިންޓާއެކު ތާވަލްގެ ދެވަނައަށް އަނެއްކާވެސް ކުރިއަށް ޖެހިލާފައެވެ. އަދި އެއްވަނައިގައި އުޅޭ ޗެލްސީ އާއި ދެމެދުގައިވާ ފަރަގުވެސް މިހާރުވަނީ އެއް ޕޮއިންޓަށް ކުޑަވެގެން ގޮސްފައެވެ. ވެސްޓް ހޭމް އުޅެނީ 23 ޕޮއިންޓާއެކު ތާވަލްގެ ހަތަރު ވަނައިގައެވެ.