ސަރަޙައްދީ ރޮނގު ހުރަސްކޮށް ސޫދާނާއި އިތިއޮޕިޔާއާ ދެމެދު އަސްކަރީ ކުރިމަތިލުމެއް ހިނގައިފިއެވެ.
ސޫދާނުގެ އަސްކަރިއްޔާއިން ބުނެފައިވަނީ ޙަމަލާދީފައިވަނީ އިތިއޮޕިޔާގެ ސިފައިންކަމަށާއި އެ ޙަމަލާ ޢަމާޒުވެފައިވަނީ ސަރަޙައްދީ ރޮނގު ކައިރީގައި ހުންނަ ސޫދާނުގެ އަސްކަރީ މަޤާމަކަށްކަމަށެވެ. އެ ޙަމަލާގައި ސޫދާނުގެ 6 ސިފައިން މަރުވެފައިވާކަމަށް އެ ޤައުމުން ބުނެފައިވެއެވެ. އަދި ރައްދުގައި ސޫދާނުގެ ސިފައިންވެސް ޙަމަލާދިންކަމަށާއި އެ ޙަމަލާތަކުގެ ސަބަބުން އިތިއޮޕިޔާގެ ސިފައިންނަށާއި އެ މީހުންގެ އުޅަނދުތަކަށް ބޮޑެތި ގެއްލުންތަކެއް ލިބުނުކަމަށްވެސް ސޫދާނުގެ އަސްކަރިއްޔާއިން ބުނެފައިވެއެވެ. އެ ކުރިމަތިލުމާ ގުޅޭގޮތުން އިތިއޮޕިޔާއިން އެއްވެސް އެއްޗެއް ބުނެފައެއް ނުވެއެވެ.
ސޫދާނާއި އިތިއޮޕިޔާއާ ދެމެދު އަސްކަރީ ކުރިމަތިލުމެއް ހިނގަފައިވަނީ އެ ދެ ޤައުމުގެ ދާޚިލީ ޙާލަތު ވަރަށް ބޮޑަށް ގޯސްވެފައިވާ ދަނޑިވަޅެއްގައެވެ. އެ ގޮތުން ދާދިފަހުން ސޫދާނުގެ އަސްކަރިއްޔާއިން ބަޣާވާތްކޮށް އެ ޤައުމުގެ ސަރުކާރުގެ އިސްވެރިންވަނީ ބަންދުކޮށްފައެވެ. ނަމަވެސް އޭގެ ފަހުން ބަޣާވާތް ނިމުމަކަށް ގެނެސް ބޮޑުވަޒީރުކަންވަނީ އަނެއްކާވެސް ޢަބްދުﷲ ޙަމުދޫކާ ޙަވާލުކޮށްފައެވެ. އޭގެ އިތުރުން އިތިއޮޕިޔާވެސް އޮތީ ދާޚިލީ ބޮޑު ހަމަނުޖެހުންތަކެއްގެ ތެރޭގައެވެ. އެ ގޮތުން އެ ޤައުމުގެ އުތުރުގައި ޙަރަކާތްތެރިވާ ވަކިވެގަންނަން މަސައްކަތްކުރާ ހަނގުރާމަވެރިންނާ ދެކޮޅަށް ކުރަމުންދާ ހަނގުރާމައިގައި ބައިވެރިވުމަށް އެ ޤައުމުގެ ބޮޑުވަޒީރު އަބީ އަޙްމަދުވަނީ ހަނގުރައިމައިގެ ކުރީސަފަށް ވަޑައިގެންފައެވެ.