ކޯވިޑް-19ގެ ނުރައްކާތެރި އައު ވައްތަރެއް ދެކުނު އެފްރިކާއިން ފެނިއްޖެއެވެ.
ދެކުނު އެފްރިކާގެ ނޭޝަނަލް އިންސްޓިޓިއުޓު ފޮރ ކޮމިޔުނިކަބަލް ޑިސީސަސް، އެންއައިސީޑީން ބުނީ ނުރައްކާތެރި އައު ވައްތަރު ޖެހިފައިވާ 22 މީހުން ފެނިފައިވާކަމަށާއި އެއީ ވާރުތަވުމުގެ ބާރު އިންތިހާއަށް ވަރުގަދަ ވައްތަރެއްކަމަށެވެ. އަދި އެ ވައްތަރާ ދެކޮޅަށް އިންސާނުން ހަށިގަނޑުގެ ދިފާޢީ ނިޒާމުން މަސައްކަތްކުރާކަން ފާހަގަވެފައިނުވައިކަމަށްވެސް އެންއައިސީޑީންވަނީ ބުނެފައެވެ. އެހެންކަމުން ބަލީގެ އެ ވައްތަރާ ގުޅޭގޮތުން ތަފްޞީލީ ތަޙްލީލުތަކެއް ކުރަމުންދާކަމަށް އެ އިދާރާއިން ބުނެއެވެ.
އެންއައިސީޑީން ބުނެފައިވާ ގޮތުގައި ދެކުނު އެފްރިކާއިން ދަތުރުކުރި ބައެއްގެ ގައިން ބޮޓްސްވާނާއާއި ހޮންގް ކޮންގުގައި ބަލިފެތުރެން ފަށާފައިވާކަން ފާހަގަވެފައިވާކަމަށެވެ. އެއާއެކު އިންޑިޔާއިން އެންމެ ފުރަތަމަ ފެނުނު ޑެލްޓާ ވޭރިއެންޓުގެ ސަބަބުން ދިމާވި ނުރައްކާތެރި ޙާލަތު އިޔާދަވާނެކަމުގެ ބިރުވެރިކަންވަނީ ފެތުރިފައެވެ.
ކޯވިޑް-19ގެ ނުރައްކާތެރި އައު ވައްތަރެއް ދެކުނު އެފްރިކާއިން ފެނިފައިވަނީ އެ ޤައުމުގައި ބަލިޖެހޭ މީހުންގެ ޢަދަދު ވަރަށް ބޮޑަށް އިތުރުވެފައިވާ ދަނޑިވަޅެއްގައެވެ. އެ ގޮތުން ދުވާލެއްގެ މައްޗަށް އެ ޤައުމުގައި ބަލިޖެހޭ މީހުންގެ ޢަދަދުވަނީ 1،200އަށްވުރެ އިތުރުވެފައެވެ. މީގެ ހަފުތާތަކެއް ކުރިން އެ ޢަދަދު ހުރީ 100ގައެވެ. އެ ޤައުމުގައި ޖުމުލަ 2.95 މިލިޔަން މީހުންނަށް ބަލިޖެހި 89,657 މީހުންވަނީ މަރުވެފައެވެ.