މޯލްޑިވްސް ފުޑް އެންޑް ޑްރަގް އޮތޯރިޓީން ވަކި ގޮތެއް އަންގަންދެން، އޮސްޓްރޭލިއާގެ "ކޮފިން ބޭ"ގައި އުފައްދާފައިވާ "ޕްރެސްޓިޖް ފުޑްސް އިންޓަރނޭޝަނަލް"ގެ "ރޯ ޕެސިފިކް އޮއިސްޓަރ" ވިއްކުމާއި ބޭނުންކުރުން ހުއްޓާލުމަށް އެއޮތޯރިޓީން އަންގައިފިއެވެ.
އެމްއެފްޑީއޭއިން ނެރުނު ނޫސް ބަޔާނެއްގައި ވިދާޅުވީ އޮސްޓްރޭލިއާގެ "ކޮފިން ބޭ"ގައި އުފައްދާފައިވާ "ޕްރެސްޓިޖް ފުޑްސް އިންޓަރނޭޝަނަލް"ގެ "ރޯ ޕެސިފިކް އޮއިސްޓަރ"ގައި ޖަރާސީމުގެ ބާވަތެއްކަމަށްވާ "ވިބްރިއޯ ޕެރަހެމޮލީޓިކަސް" ހުރިކަމުގެ މަޢުލޫމާތު ލިބިފައިވާކަމަށެވެ.
އެމްއެފްޑީއޭއިން ވިދާޅުވީ މިބާވަތުގެ ރޯ ޕެސިފިކް އޮއިސްޓަރ ރާއްޖެއަށް އެތެރެވެފައިވާކަމަށް ދުނިޔޭގެ ސިއްޙަތު ޖަމުއިއްޔާގެ އިންޓަރނޭޝަނަލް ފުޑް ސޭފްޓީ އޮތޯރިޓީސް ނެޓްވޯކްއިން އެއޮތޯރިޓީއަށް އަންގާފައިވާކަމަށެވެ.
އެއިދާރާއިން ނެރުނު މިއެލާރޓްއާއި ގުޅިގެން މިބާވަތުގެ އުފެއްދުންތަކާއި ގުޅިގެން ކާބޯތަކެތީގެ ރައްކާތެރިކަމަށް އޮތް ހިރާސްގެ މިންވަރު ބެލުމުގެ މަސައްކަތް އެމްއެފްޑީއޭއިން ކުރަމުންދާކަމަށް އެއޮތޯރިޓީއިން ވިދާޅުވެއެވެ. އެހެންކަމުން ރައްކާތެރިކަމުގެ ފިޔަވަޅެއްގެ ގޮތުން މިބާވަތުގެ އޮއިސްޓަރ އެމްއެފްޑީއޭއިން ވަކިގޮތެއް އަންގަންދެން ނުވިއްކުމަށާއި ބޭނުންނުކުރުމަށް އެއޮތޯރިޓީން ވަނީ އަންގާފައެވެ.