ޖަރުމަންވިލާތުގައި ކޯވިޑް-19 ފެތުރެން ފެށުނު ފަހުން ރެކޯޑު ޢަދަދެއްގެ ބަޔަކަށް ބަލިޖެހިއްޖެއެވެ. އެ ޤައުމުގައި ޖެހިޖެހިގެން ހަތަރު ދުވަހުވަނީ ބަލިޖެހޭ މީހުންގެ ޢަދަދު އިތުރުވެފައެވެ. އެ ޤައުމުގައި ކޮންމެ 100،000 މީހެއްގެ ތެރެއިން 249 މީހުންނަށް ބަލިޖެހޭކަމަށްވަނީ ރެކޯޑުކޮށްފައެވެ.
ފާއިތުވި 24 ގަޑިއިރުގެ ތެރޭގައި ޖަރުމަންވިލާތުގައި 50,196 މީހުންނަށްވަނީ ކޯވިޑް-19 ޖެހި 235 މީހުންވަނީ މަރުވެފައެވެ. އެއާއެކު އެ ޤައުމުގައި ބަލިޖެހުނު މީހުންގެ ޖުމުލަވަނީ 4.89 މިލިޔަނަށްވުރެ އިތުރުވެފައެވެ. އަދި ބަލިމަޑުކަމުގައި 97,198 މީހުންވަނީ މަރުވެފައެވެ.
ޖަރުމަންވިލާތުގެ ކޯވިޑް-19 ޙާލަތު ގޯސްވެފައިވަނީ އެ ޤައުމުގައި އައު ސަރުކާރެއް އެކުލަވާލުމަށް މަސައްކަތްކުރަމުންދާ ދަނޑިވަޅެއްގައެވެ. ބަލިމަޑުކަމުގެ ހަތަރުވަނަ ރާޅަކާ އެ ޤައުމުން ކުރިމަތިލަމުންދިޔަ ނަމަވެސް ސަރުކާރު އެކުލަވާލުމަށް މަސައްކަތްކުރަމުންދާ ތިން ޕާޓީން ނިންމާފައިވަނީ އެ ޤައުމުގެ ފުރަބަންދުގެ މުއްދަތު އިތުރު ނުކުރަމަށެވެ. އޭގެ ބަދަލުގައި އެ ޕާޓީތަކުން މަސައްކަތްކުރަނީ އަންނަ މާރިޗު މަހުގެ ނިޔަލަށް މާސްކުއެޅުމާއި ގާތްދުރުކަން ބެހެއްޓުމަށް ބާރުއެޅުމަށް ޤާނޫނެއް އެކުލަވާލުމަށެވެ.