އެއް މަސްދުވަހަށް ޙަމަލާބަދަލުކުރުން ހުއްޓާލުމަށް ޕާކިސްތާނާއި އެ ޤައުމުގައި ޙަރަކާތްތެރިވާ ޠާލިބާން ޖަމާޢަތް، ޓީޓީޕީން އެއްބަސްވެއްޖެއެވެ.
ޕާކިސްތާނުގެ ސަރުކާރުން ބުނީ ޓީޓީޕީއާއެކު އެއްބަސްވުމަކަށް އައުމަށް މެދުވެރިއެއްގެ ދަޢުރު އަދާކޮށްދީފައިވަނީ އަފްޣާނިސްތާނުގައި ވެރިކަންކުރާ ޠާލިބާން ޖަމާޢަތުންކަމަށެވެ. ޓީޓީޕީއާ އެއްވެސް ގުޅުމެއް ނެތް ނަމަވެސް ޕާކިސްތާނުގެ ސަރުކާރުން ބުނެފައިވަނީ ޙާމަލާބަދަލުކުރުން ހުއްޓާލުމުގެ އެއްބަސްވުމެއް އެކުލަވާލީ އެ ޤައުމުގެ އަމަންއަމާންކަމާއި ސަލާމަތް ކަށަވަރުކޮށް އިޖުތިމާޢީ އަދި އިޤްތިޞާދީ މަސައްކަތްތަކަށް ޖާގަދިނުމަށްކަމަށެވެ. އަދި ޙަމަލާބަދަލުކުރުން ހުއްޓާލާފައިވާ މުއްދަތުގެ ތެރޭގައި ޓީޓީޕީއާ ޞުލްޙަވުމަށް މަޝްވަރާކުރާނެކަމަށާއި ޙަމަލާބަދަލުކުރުން ހުއްޓާލާފައިވާ މުއްދަތު އިތުރުކުރުމަށް މަސައްކަތްކުރާނެކަމަށްވެސް ޕާކިސްތާނުގެ ސަރުކާރުން ބުނެފައިވެއެވެ،
ޕާކިސްތާނުގައި ޙަރަކާތްތެރިވާ ޠާލިބާން ޖަމާޢަތްކަމަށްވާ ޓީޓީޕީއަކީ އަފްޣާނިސްތާނުގައި ވެރިކަންކުރާ ޠާލިބާން ޖަމާޢަތާ ވަކިން ހިންގައި ޖަމާޢަތެކެވެ. ނަމަވެސް ސަރަޙައްދީ ރޮނގު ހުރަސްކޮށް ޓީޓީޕީން އަފްޣާނިސްތާނާއި ޕާކިސްތާނާ ދެމެދު ފަސޭހަކަމާއެކު ދަތުރުކުރެއެވެ. އެ ގޮތުން އެ ސަރަޙައްދުގައި ޓީޓީޕީގެ 5،000 ހަނގުރާމަވެރިން ޙަރަކާތްތެރިވާކަމަށް ޕާކިސްތާނުން ލަފާކުރެއެވެ.
ޓީޓީޕީ އުފައްދާފައިވަނީ 2007ވަނަ އަހަރުގެ ތެރޭގައެވެ. އޭގެ ފަހުން ޓީޓީޕީގެ ޙަމަލާތަކުގައި އެތައް ހާސް ބަޔަކުވަނީ މަރުވެފައެވެ. އަދި ޓީޓީޕީއާ ދެކޮޅަށް 2013ވަނަ އަހަރުގެ ތެރޭގައި ޕާކިސްތާނުން ފެށި އަސްކަރީ ޙަރަކާތްތަކުގެ ސަބަބުން އެތައް މިލިޔަން މީހުންގެ ގެދޮރުވަނީ ގެއްލިފައެވެ.