އެއްބަސްވެފައިވާ ތާވަލާ އެއްގޮތަށް ސޫދާނުގައި އިންތިޚާބު ބާއްވާނެކަމަށާއި އެ ޤައުމުގައި ޤާއިމުކުރާ މަދަނީ ސަރުކާރާ ގުޅިވަޑައިގަތުމުގެ ވިސްނުންފުޅެއް ނުގެންގުޅުއްވާކަމަށް އެ ޤައުމުގެ އަސްކަރިއްޔާގެ ވެރިޔާ ޖެނެރަލް ޢަބްދުލް ފައްތާޙް އަލްބުރުހާން ވިދާޅުވެއްޖެއެވެ.
އޮކްޓޯބަރު މަހުގެ 25ވަނަ ދުވަހު ސޫދާނުގެ އަސްކަރިއްޔާއިން ބަޣާވާތްކޮށް އެ ޤައުމުގެ ސަރުކާރު އުވާލައި ބޮޑުވަޒީރުގެ މަޤާމުގައި ހުންނެވި ޢަބްދުﷲ ޙަމުދޫކުވަނީ ބަންދުކޮށްފައެވެ. ނަމަވެސް ބައިނަލްއަޤްވާމީ މުޖުތަމަޢުން ކަންބޮޑުވުން ފައުޅުކޮށް ބަޣާވާތާ ދެކޮޅަށް ތެދުވުމުން ޙަމުދޫކުވަނީ މިނިވަންކޮށްފައެވެ.
ސޫދާނުގެ އަސްކަރިއްޔާއިން ބަޣާވާތްކުރުމުން އެ ޤައުމުގެ ޢާއްމުންވަނީ މުޒާހަރާކުރަން ފަށައިފައެވެ، އެއާއެކު ސޫދާނުގެ އަސްކަރިއްޔާއިންވަނީ ޢާއްމުންނާ ދެކޮޅަށް ލާއިންސާނީ ޖަރިމާތައް ހިންގައިފައެވެ. އެ ގޮތުން ސޫދާނުގެ އަސްކަރިއްޔާގެ އަނިޔާވެރި ޢަމަލުތަކުގެ ސަބަބުން 14 މީހުން މަރުވެ، 300 މީހުން ޒަޚަމުވެފައިވާކަމަށް އެ ޤައުމުގެ މިނިވަން ޖަމުޢިއްޔާއެއްކަމަށްވާ ސެންޓުރަލް ކޮމިޓީ އޮފް ސޫދާނީސް ޑޮކްޓަރސުންވަނީ ބުނެފައެވެ.
އަލްޖަޒީރާ ޓީވީއަށް ދެއްވި ބަސްދީގަތުމެއްގައި ޖެނެރަލް ބުރުހާން ވިދާޅުވީ ސޫދާނުގެ އިންތިޤާލީ މަރުޙަލާއަށް އަސްކަރިއްޔާއިން އިޚްތިރާމުކުރާނެކަމަށާއި އެއްބަސްވެފައިވާ ތާވަލާ އެއްގޮތަށް އިންތިޚާބު ބާއްވާނެކަމަށެވެ. އަދި ސޫދާނުގެ ރައްޔިތުން ސިޔާސީ ޙަރަކާތްތައް ހިންގުމަށް ޤާނޫނީ ހުރަހެއް ނެތްކަމަށާއި ޞުލްޙަވެރިކަމާއެކު މުޒާހަރާކުރުމުގެ ފުރުޞަތުވެސް އޮންނާނެކަމަށް ބުރުހާން ވިދާޅުވިއެވެ. އޭގެ އިތުރުން އޭނާވަނީ މުޒާހަރާކުރި ބައެއް މީހުން މަރުވެފައިވަނީ އަސްކަރިއްޔާގެ ޢަމަލުތަކުގެ ސަބަބުން ނޫންކަމަށްވެސް ވިދާޅުވެފައެވެ. އެ ގޮތުން އޭނާ ވިދާޅުވީ ސޫދާނުގެ އަސްކަރިއްޔާއިން ޢާއްމުން ނުމަރާނެކަމަށާއި އެފަދަ ޖަރީމާތައް ތަޙްޤީޤުކުރަން ޖެހޭކަމަށެވެ.
މިދިޔަ ސެޕުޓެންބަރު މަހުގެ ތެރޭގައިވެސް ސޫދާނުގެ އަސްކަރިއްޔާއިންވަނީ ބަޣާވާތެއް ކުރުމަށް މަސައްކަތްކޮށްފައެވެ. ނަމަވެސް އެ މަސައްކަތް ނާކާމިޔާބުވުމުން އެ ޤައުމުގެ އަސްކަރިއްޔާއާއި ޢާއްމުންނާ ދެމެދު ބޮޑެތި ހަމަނުޖެހުންތަކެއްވަނީ ހިނގައިފައެވެ.
2019ވަނަ އަހަރުގެ ތެރޭގައި ސޫދާނުގައި ކުރި މުޒާހަރާތަކަށްފަހު އެ ޤައުމުގައި ދިގު ވެރިކަމެއް ކުރެއްވި ޢުމަރު އަލްބަޝީރު އިސްތިޢުފާދެއްވުމުން އެ ޤައުމުގެ އަސްކަރިއްޔާއާއި ޢާއްމުންގެ ބައިވެރިވުމާއެކުވަނީ ސަރުކާރެއް އެކުލަވާލައިފައެވެ. އަދި 2023ވަނަ އަހަރު ނިމުމުގެ ކުރިން އެ ޤައުމުގައި މިނިވަން އަދި އިންޞާފުވެރި އިންތިޚާބެއް ބޭއްވުމަށްވަނީ އެއްބަސްވެފައެވެ.