ލީބިޔާގެ ޚާރިޖީ ވަޒީރު ނަޖުލާ މަންޤޫޝް މަޤާމުގެ މަސްޢޫލިއްޔަތުތަކުން އެކަހެރިކޮށް ޤައުމުން ބޭރަށް ވަޑައިގަތުން މަނާކޮށްފިއެވެ.
ތިން މެންބަރުންގެ މައްޗަށް އެކުލެވޭ ލީބިޔާގެ ވެރިކަންކުރާ ރިޔާސީ ކަައުންސިލުން އެ ޤައުމުގެ ޚާރިޖީ ވަޒީރާ ދެކޮޅަށް ފިޔަވަޅުތަކެއް އަޅާފައިވަނީ މަޝްވަރާނުކުރައްވައި އަމިއްލަފުޅަށް ނަޖުލާ ކަންކަން ނިންމަވާކަމަށް ތުޙްމަތުކޮށްފައެވެ. ނަމަވެސް މަޤާމުގެ މަސްޢޫލިއްޔަތުތަކުން ނަޖުލާ އެކަހެރިކުރި މުއްދަތެއް އެ ކައުންސިލުން ބުނެފައެއް ނުވެއެވެ.
ލީބިޔާގެ ވަޤުތީ ސަރުކާރުންވަނީ ރިޔާސީ ކަައުންސިލުގެ ނިންމުން ބަލައިނުގަންނަން ނިންމަވައިފައެވެ. އެ ގޮތުން މަޤާމުގެ މަސްޢޫލިއްޔަތުތައް އަދާކުރެއްވުމުގައި ނަޖުލާ ދެމިހުންނަވާނެކަމަށް އެ ޤައުމުގެ ވަޤުތީ ސަރުކާރުންވަނީ ބުނެފައެވެ. އަދި ސަރުކާރުގެ މަޤާމުތަކުގައި ތިއްބެވި ބޭފުޅުން މަޤާމުތަކަށް ޢައްޔަންކުރުމާއި އެކަހެރިކުރުމާއި ވަކިކުރުމުގެ ޙައްޤެއް ރިޔާސީ ކަައުންސިލަށް ނޯންނާނެކަމަށާއި އެފަދަ ނިންމުންތައް ނިންމަވާނީ ބޮޑުވަޒީރުކަމަށް ލީބިޔާގެ ވަޤުތީ ސަރުކާރުންވަނީ ބުނެފައެވެ.
މަޢުލޫމާތު ލިބިފައިވާ ގޮތުގައި ނަޖުލާއާމެދު ރިޔާސީ ކަައުންސިލުން ހިތްހަމަނުޖެހުނީ 1988ވަނަ އަހަރު ލޮކަބީ ޙަމަލާގައި ބޭނުންކުރި ބޮން ތައްޔާރުކުރިކަމަށް ތުޙްމަތުކުރެވޭ މުޙައްމަދު މައްސޫދު އެމެރިކާއާ ޙަވާލުކުރުމަށް އެއްބަސްވެވަޑައިގަތުމުންނެވެ. އެމެރިކާގެ ފުލައިޓެއްގައި ހަރުކޮށްފައި އޮތް ބޮން ގޮވުމުން 270 މީހުން މަރުވިއެވެ. އޭގެ ފަހުން އެމެރިކާއިންވަނީ ލީބިޔާއަށް ޙަމަލާ ދިނުމަށްފަހު އެ ޤައުމާ ދެކޮޅަށް ދަތިކުރުމުގެ ފިޔަވަޅުތަކެއް އަޅައިފައެވެ.