ޢިރާޤުގެ ބޮޑުވަޒީރު މުސްޠަފާ ކާޟިމީ އަވަހާރަކޮށްލުމަށް ޑުރޯން ޙަމަލާއެއް ދީފިއެވެ.
ޢިރާޤުގެ ބޮޑުވަޒީރު އަވަހާރަކޮށްލުމަށް ޑުރޯނުގައި ގޮވައިތަކެތި ހަރުކޮށްގެން ޙަމާލާ ދީފައިވަނީ ވެރިރަށް ބަޣްދާދުގައި ހުންނަ އޭނާގެ ރަސްމީ ގެކޮޅަށެވެ. އެ ޙަމަލާގައި އޭނާއަށް އެއްވެސް ގެއްލުމެއް ލިބިވަޑައިނުގަތް ނަމަވެސް އޭނާގެ 6 ހަށިފާރަވެރިންވަނީ ޒަޚަމުވެފައެވެ. ބަޣްދާދުގެ އެންމެ ސަލާމަތީ ކަންކަން ވަރުގަދަ ސަރަޙައްދަށް ޑުރޯން ޙަމަލާއެއް ދިނީ ކޮން ބައެއްކަމެއް ނޭނގެއެވެ. އަދި އެއްވެސް ޖަމާޢަތަކުން އެ ޙަމަލާގެ ޒިންމާ އުފުލާފައެއް ނުވެއެވެ.
ޙަމަލާއަށްފަހު ޓީވީ މެދުވެރިކޮށް ޤައުމާ މުޙާތަބުކުރައްވަމުން ކާޟިމީ ވިދާޅުވީ ރޮކެޓާއި ޑުރޯން ބޭނުންކޮށްގެން ފިނޑި ޙަމަލާތަކެއް ދިން ނަމަވެސް ޤައުމު އާރާސްތުކޮށް ޤައުމު ބިނާނުކުރެވޭނެކަމަށެވެ. އަދި އޭނާވަނީ ޤައުމުގެ ކުރިމަގަށްޓަކައި ޞުލްޙަވެރިކަން އިސްކުރުމަށް އިލްތިމާޞްކުރައްވައިފައެވެ.
ޢިރާޤުގެ ބޮޑުވަޒީރު އަވަހާރަކޮށްލުމަށް ޙަމަލާއެއް ދީފައިވަނީ އެ ޤައުމުގައި ބޭއްވި ޢާއްމު އިންތިޚާބަށްފަހު އެ ޤައުމުގައި ބޮޑެތި ހަމަނުޖެހުންތަކެއް ހިނގަމުންދަނިކޮށެވެ. އެ ގޮތުން ވޯޓުގެ ނަތީޖާ އޮޅުވާލާފައިވާކަމަށް ބުނެ އެ ޤައުމުގެ ގިނަ ޢަދަދެއްގެ ޢާއްމުން ދަނީ މުޒާހަރާކުރަމުންނެވެ. އެ މުޒާހަރާތަކުގައި ޢިރާޤުގެ ހަނގުރާމަވެރި ޖަމާޢަތްތަކުންވެސްވަނީ ބައިވެރިވެފައެވެ.