ރައްޔިތުންނާއި ފުލުހުންނާއި ދެމެދު އޮންނަ ގުޅުން ހަރުދަނާކުރުމަށް ފުލުހުންގެ ޚިދުމަތަކީ ރައްޔިތުންނާ ގާތުންދެވޭ ޚިދުމަތަކަށް ހެދުމަށް ކުޅުދުއްފުށީ ސިޓީގައި އަވަށްޓެރި ފުލުހުންގެ ޚިދުމަތް ފަށައިފިއެވެ. މިޚިދުމަތް ފައްޓަވާދެއްވީ މިނިސްޓަރ އޮފް ހޯމް އެފެއާޒް ޢިމްރާން ޢަބްދުﷲއާއި ކޮމިޝަނަރ އޮފް ޕޮލިސް މުޙައްމަދު ޙަމީދެވެ.
ކުޅުދުއްފުށި ސިޓީގައި އަވައްޓެރި ފުލުހުންގެ ހިދުމަތް ފަށައި އެކަމުގެ ރަސްމީ ލިޔުން ކައުންސިލާ ޙަވާލުކޮށްދެއްވީ ކޮމިޝަނަރ އޮފް ޕޮލިސް މުޙައްމަދު ޙަމީދެވެ.
މިރަސްމިއްޔާތުގައި ވާހަކަފުޅުދައްކަވަމުން ހޯމް މިނިސްޓަރވަނީ ޒަމާނީ ބަދަލުތަކާއެކު ފުލުހުންގެ ޚިދުމަތަށް އަންނަމުންދާ ކުރިއެރުން ފާހަގަކުރައްވާފައެވެ. އަދި ކުޅުދުއްފުށީގައި ފުލުހުންގެ ޚިދުމަތް ފެށުމަކީ އެސިޓީއަށް ލިބޭ އިތުރުކުރިއެރުމެއްކަމަށާއި ކުށްމަދު އަމާން ވެއްޓެއް ޤާއިމުކުރުމަށް ލިބޭ އިތުރު ބާރަކަށްވާނެކަން މިނިސްޓަރ ފާހަގަކުރެއްވިއެވެ. އަދި މިކަމުގެ ސަބަބުން ރައްޔިތުންނަށް ސަލާމަތާއި ރައްކާތެރިކަމުގެ އިޙްސާސްކުރެވިގެންދާނެކަމަށް މިނިސްޓަރ ވިދާޅުވިއެވެ.
މިރަސްމިއްޔާތުގައި ވާހަކަދައްކަވަމުން ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ އަވަށްޓެރި ފުލުހުންގެ ޚިދުމަތަކީ ދިވެހި ފުލުހުންގެ މަސައްކަތަށް ގެންނަށް މަސައްކަތްކުރާ އިންގިލާބީ ބޮޑު ބަދަލެއްކަމަށެވެ. ސީޕީ ވިދާޅުވީ ކޯވިޑް-19އިން އަރައިގަތުމަށް ހުރިހާ އިދާރާއެއް ގުޅިގެން ކުރި މަސައްކަތުން ބޮޑު ކާމިޔާބީއެއް ލިބިފައިވާކަމަށާއި ހަމައެފަދައިން ކުށް މަދު ވެއްޓެއް ޤާއިމުކުރުމަށް ކުރާ މަސައްކަތުގައިވެސް ހުރިހާ ފަރާތްތަކުން އިޚްލާސްތެރިކަމާއެކު މަސައްކަތްކުރާނަމަ ކާމިޔާބުވާނެކަމަށް ސީޕީ ވިދާޅުވެއެވެ.
ކުޅުދުއްފުށި ސިޓީގައި އަވައްޓެރި ފުލުހުންގެ ޚިދުމަތް ފެށުމުގެ އިތުރުން ހޯމް މިނިސްޓަރ ޢިމްރާންއާއި ސީޕީ ޙަމީދުވަނީ ށ.ފޭދޫ ޕޮލިސް ޕޯސްޓުވެސް ހުޅުއްވާދެއްވާފައެވެ.
ށ.ފޭދޫ ޕޮލިސް ޕޯސްޓް ހުޅުއްވައި ދެއްވުމަށްފަހު ޕޮލިސް ޕޯސްޓްގައި ގައުމީ ދިދަ ނަންގަވައި ދެއްވީ މިނިސްޓަރ އޮފް ހޯމް އެފެއަރޒްއެވެ. އަދި ފުލުހުންގެ ޚިދުމަތުގެ ދިދަ ނަންގަވައި ދެއްވީ ކޮމިޝަނަރ އޮފް ޕޮލިސްއެވެ.
މިރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އޮފް ހޯމް އެފެއާޒް ޢިމްރާން ޢަބްދުﷲ ވިދާޅުވީ މިއަދު ފުލުހުންގެ ޚިދުމަތް ބައްޓަންކުރަމުންދަނީ ފުލުހުންނާއި މުއައްސަސާތަކާއި ރައްޔިތުން ގުޅިގެން މަސައްކަތްކުރާ އަވަށްޓެރި ފުލުހުންގެ ފަލްސަފާގެ ތެރެއިންކަމަށެވެ. އަދި އެމަސައްކަތް ރަނގަޅު ގޮތުގައި ދިނުމުން ރަށުގައި އުފެދިގެންދާ ތަފާތު ހާލަތްތައް ކުށަކަށް ބަދަލުވެގެން ދިއުމުގެކުރިން، ގާނޫނީ ގޮތުން އަދަބާ ހަމައަށް ދިއުމުގެ ކުރިން އެކަންކަން ރަނގަޅަށް ދެނެގަނެ އެކަމަށް ހައްލު ހޯދޭނެ ގޮތްތައް ހޯދިގެންދާނެކަމަށްވެސް މިނިސްޓަރ ވިދާޅުވިއެވެ.
އަދި ފޭދޫގައި ގާއިމްވެ މަސައްކަތްކުރާ ފުލުހުންވެސް ރަށުގެ މުއައްސަސާތަކާއި ރައްޔިތުންނާ އެކުގައި އެގޮތުގައި މަސައްކަތް ގެންގޮސްދޭނެކަމަށާއި ފުލުހުންގެ ރީޖަނަލް ކޮމާންޑަރާއި އަތޮޅު ކޮމާންޑަރުގެ އިތުރުން ރަށުގައި ގާއިމްވެތިބޭ ފުލުހުން ރަށުގެ މުއައްސަސަތަކާ ރައްޔިތުންނާ ވަރަށް ގުޅިގެން އެކުގައި މަސައްކަތްކޮށް އަވަސް ފިޔަވަޅުތަކެއް އަޅައި، ރަށަކީ އެންމެ ސުލްހަވެރި، އެކުވެރި އަދި އަމާން ރަށަކަށް ހެދުމަށް މަސައްކަތްކޮށްދެއްވުމަށް މިނިސްޓަރވަނީ އެދިވަޑައިގަންނަވާފައެވެ.
އުތުރުގެ ބައެއް ރަށްތަކަށް ކުރައްވާ ދަތުރުފުޅުގައި ހޯމް މިނިސްޓަރއާއި ސީޕީވަނީ ހއ.ތުރާކުނުގައިވެސް ފުލުހުންގެ މަރުކަޒެއް އިފްތިތާޙްކޮށްދެއްވާފައެވެ.