އިންގްލިޝް ޕްރިމިއަރ ލީގުގައި ސައުތުހެމްޕްޓަން އާއި އެސްޓަންވިލާ ބައްދަލުކުރިމެޗް ސައުތުހެމްޕްޓަން ކާމިޔާބުކޮށްފިއެވެ. ސައުތުހެމްޕްޓަންގެ ދަނޑުގައި ކުޅުނު މިމެޗް އެޓީމު ކާމިޔާބުކުރީ އެއްލަނޑު ސުންލަނޑުންނެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ސައުތުހެމްޕްޓަނުން ބޯޅަ ގެންގުޅުނުއިރު ގިނަ ހަމަލާ އުފައްދާފައިވަނީ ވިލާއިންނެވެ. މިމެޗްގައި ސައުތުހެމްޕްޓަނުން ޖެހި ހަމައެކަނި ލަނޑު މެޗްގެ ތިންވަނަ މިނެޓްގައި ޖަހައިދިނީ އެޑަމް އާމްސްޓްރޯންގެވެ. މިމެޗްގެ ފުރަތަމަ ހާފްގައި ސައުތުހެމްޕްޓަންއަށް ލަނޑު ޖަހާނެ ގިނަ ފުރުސަތު ތަކެއް ލިބިގެންދިޔަ ނަމަވެސް އެއިން އެއްވެސް ހަމަލާއެއް ލަނޑަކަށް ބަދަލުކޮށްލެވޭ ގޮތެއް ނުވިއެވެ. އަދި ވިލާގެ ފަރާތުން މިމެޗްގެ ފުރަތަމަ ހާފްގައި މާ އެދެވޭ ކުޅުމެއް ފެނިގެން ގޮސްފައެއް ނުވެއެވެ. ފުރަތަމަ ހާފާއި ޚިލާފަށް ދެވަނަ ހާފްގައި ވިލާއިން އެޓީމުގެ ކުޅުން ރަނގަޅުކޮށް ރަނގަޅު ކުޅުމެއް ދެއްކޭތޯ މަސައްކަތް ކުރިއެވެ. ނަމަވެސް ލަނޑެއް ޖެހޭގޮތް ނުވިއެވެ. މިއީ ޖެހިޖެހިގެން ވިލާ ބަލިވި ހަވަނަ މެޗެވެ.
މިކާމިޔާބީ އާއެކު ސައުތުހެމްޕްޓަން މިހާރު އުޅެނީ 11 މެޗުން ލިބިފައިވާ 14 ޕޮއިންޓާއެކު ތާވަލްގެ 12 ވަނައަށް ކުރިއަށް ޖެހިލާފައެވެ. އަދި ވިލާ އުޅޭނީ 10 މެޗުން ލިބިފައިވާ 10 ޕޮއިންޓާއެކު ތާވަލްގެ 15 ވަނައިގައެވެ.