ރާއްޖޭގެ ޖަލުތަކުގައި އަނިޔާވެރިކަމަށް މިހާރު އެއްވެސް ޖާގައެއް ނޯންނާނެކަމަށާއި، އެފަދަ ކަމެއް ހިނގައިފިނަމަ މިހާތަނަށް ފިޔަވަޅު އަޅާފައިވާނެކަމަށް ހޯމް މިނިސްޓަރ ޢިމްރާން ޢަބްދުﷲ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ރާއްޖޭގެ ޖަލުތަކުގެ ހާލަތާއި ގުޅޭގޮތުން މަޖިލީހުގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުންގެ ސުވާލުތަކަށް ޖަވާބުދެއްވަމުން ހޯމް މިނިސްޓަރ ޢިމްރާން ޢަބްދުﷲ ވިދާޅުވީ، ރާއްޖޭގެ ޖަލުތަކުގައި ކުރާ އަނިޔާ މިހާރު އެއްކޮށް ހުއްޓިފައިވާކަމަށެވެ.
އިމްރާން ވިދާޅުވީ އެމަނިކުފާނު ހޯމް މިނިސްޓަރުކަމާއި ހަވާލުވެވަޑައިގަތްފަހުން ޤައިދީންނަށް ޖަލު އޮފިސަރުން އަނިޔާކުރިކަމުގެ ދެތިން މައްސަލައެއް ހުށަހެޅުނުކަމަށެވެ. އަދި އެ ހުރިހާ ފަހަރަކުވެސް ފިޔަވަޅު އަޅާފައިވާނެކަމުގެ ޔަޤީންކަން މިނިސްޓަރ ދެއްވިއެވެ. އެގޮތުން މިހާތަނަށް އެޅި ފިޔަވަޅުތަކުގެ ތެރޭގައި އޮފިސަރުން މަޤާމުން ވަކިކޮށްފައިވާނެކަމަށާއި، ބައެއް އޮފިސަރުންގެ ރޭންކުވެސް ދަށްކޮށްފައިވާނެކަމަށް އިމްރާން ވިދާޅުވިއެވެ.
"އެންމެ ފުރަތަމަ ސަރުކާރުން އެޓެންޑުކުރި އެއްކަމަކީ ޖަލުގައިކުރާ އަނިޔާތައް ހުއްޓުވުން. އެނގިވަޑައިގަންނަވާނެ އޮފިސަރުންގެ ގޮތުގައި ވެސް ތިބެނީ ހަމަ ދިވެހިން. ފަހަރެއްގައި ދިވެއްސެއްގެ ކިބައިގައި ހުންނާނެ އާދައެއް ނުވަތަ ކޮށްފާނެ ކަމެއް ހުރެދާނެ. ނަމަވެސް އަޅުގަނޑުމެން ކަށަވަރުކުރާ އެއްކަމެއް ވަރަށް ސާފުކޮށް އެބައޮތް. އެއީ ޖަލުގެ ތެރޭގައި ގައިދީއަަކަށް އަނިޔާއެއް ކޮށްފިނަމަ އެއޮފިސަރަކު ދެން އޮފިސަރެއްގެ ގޮތުގައި ނުހުންނާނެކަން. ހުރިހާ އޮފިސަރުންނަށް ވަރަށް ސާފުކޮށް އެނގޭނެ." ހޯމް މިނިސްޓަރ ވިދާޅުވިއެވެ.
ހޯމް މިނިސްޓަރ ޢިމްރާންގެ ވާހަކަފުޅުގައި ޖަލުތަކުގައި ކުރާ އަނިޔާ ހުއްޓުވުން އެއީ ސަރުކާރުގެ މުހިންމު އެއް ވަޢުދެއްކަމަށާއި، ޖަލު އޮޑިޓް ރިޕޯޓްގައި ހުރި ކަންކަން ތަންފީޒް ކުރައްވަމުން އަންނަކަަމަށެވެ.
ހޯމް މިނިސްޓަރގެ ވާހަކަފުޅުގައި ކަރެކްޝަންގެ ބެލުމުގެ ދަށުގައި ހުއްޓާ ނިޔާވި މ. މަލަސް, އިސްމާއީލް ޝަބީންގެ މަރުގެ މައްސަލަ އެޗްއާރްސީއެމާއެކު އިތުރަށް ތަހުގީގުކުރާނެކަށެވެ. އަދި މިހާތަނަށް ބެލި ބެލުމުން އެއްވެސް މީހެއްގެ އިހުމާލު އޮތްކަން އެނގިފައިނުވާކަމަށްވެސް މިނިސްޓަރ ވިދާޅުވިއެވެ.
"މިކަން އަޅުގަނޑު ބަލައިފިން. އެ ކަމުގައި އެއްވެސް ފަރާތަކުން އަދާކުރަން ޖެހޭ ޒިންމާއެއް އަދާނުކޮށްގެން އަދި އެއްވެސް ފަރާތެއްގެ ޒިންމާ ވާން ޖެހޭ ފަދަ ކަމެއް އޮވެގެން އެ މައްސަލަ ދިމާވި ކަމަށް ގަބޫލުކުރެވޭ އެއްވެސް ރެކޯޑެއް ނެތް." އިމްރާން ވިދާޅުވިއެވެ.
މިނިސްޓަރ ޢިމްރާން ވިދާޅުވީ، ގައިދީންނަށް ބޭސް ފަރުވާ ރަނގަޅަށް ދެމުންދޭތޯ އެ މިނިސްޓްރީން ޔަޤީންކުރަމުންދާކަމަށެވެ. އަދި ބައެއް ގައިދީންނަށް ބޭސް ފަރުވާ ނުދީގެންކަމަށް ބުނާ މައްސަލަތަކަށް ބަލާއިރު، ގައިދީން ޑޮކްޓަރުންނަށް ދައްކަން ޖެހޭ މިންވަރަށް ވުރެ އިތުރަށް ވެސް ދައްކައިފަައިވާކަމަށް މިނިސްޓަރ ވިދާޅުވިއެވެ. އެގޮތުން އެއް އަހަރުގެ ތެރޭގައި 40 ފަހަރު ޑޮކްޓަރަށް ދައްކާފައިވާ ގައިދީންވެސް އެބަތިބިކަން މިނިސްޓަރ ފާހަގަކުރެއްވިއެވެ.
ޖަލުތަކުގައި ސިއްޙީ ޚިދުމަތް ފުޅަކުރުމަށް ކުރަމުން އަންނަ މަސައްކަތްތަކާއި ގުޅޭގޮތުން މިނިސްޓަރ ވިދާޅުވީ، ޖަލުގައި ޤާއިމުކޮށްފައިވާ މެޑިކަލް ސެންޓަރުގައި މިހާރު ދެ ސްޕެޝަލިސްޓުން ޚިދުމަތް ދެމުން އަންނަކަމަށެވެ. އަދި އިތުރު ސްޕެޝަލިސްޓުން ހޯދުމުގެ މަސައްކަތް ކުރަމުން އަންނަކަަމަށްވެސް މިނިސްޓަރ ޢިމްރާން ވިދާޅުވިއެވެ. އަދި 2013 ފެށިގެން ޖަލުތަކުގައި ރިހިބިލިޓޭޝަން ޕްރޮގްރާމެއް ހިންގިފައިނެތްއިރު، މިސަރުކާރުން އެކަމަށް ބޭނުންވާ ވަސީލްތަތައް ހޯދައި އެފަދަ ޕްރޮގްރާމްތައްވެސް ހިންގަން ތައްޔާރުވަމުން އަންނަކަމަށް މިނިސްޓަރ ވިދާޅުވިއެވެ.